karnaa hai shaairi agar 'naushaad' — Naushad Ali

ik be-qaraar dil se mulaaqaat kijiye
jab mil gae hain aap to kuchh baat kijiye

aabaadiyon mein dasht kaa manzar bhi aaegaa
guzroge shahr se to miraa ghar bhi aaegaa

saamne us ke ek bhi na chali
dil mein baatein hazaar le ke chale

zindagi mukhtasar mili thi hamein
hasratein be-shumaar le ke chale

mere khvaabon ke jharokon ko sajaate rahiye
na sahi vasl magar yaad to aate rahiye

jiinaa taDap taDap kar marnaa sisak sisak kar
fariyaad ek ji hai kyaa kyaa kharaabiyon mein

sab ko ham bhuul gae josh-e-junun mein lekin
ik tiri yaad thi aisi jo bhulaai na gai

sayyaad teraa ghar mujhe jannat sahi magar
jannat se bhi sivaa mujhe raahat chaman mein thi

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

thak gayaa hai dil-e-vahshi miraa fariyaad se bhi
ji bahaltaa nahin ai dost tiri yaad se bhi