jaane ko jaae fasl-e-gul aane ko aae har baras — Nooh Narvi

aap jo kahte hain sab hazrat-e-naaseh hai bajaa
kyaa karun zehn se ye lafz utar jaate hain

kambakht kabhi ji se guzarne nahin deti
jiine ki tamannaa mujhe marne nahin deti

satyanaas ho gayaa dil kaa
ishq ne khuub ki ukhaaD-pachhaaD

aaj aaeinge kal aaeinge kal aaeinge aaj aaeinge
muddat se yahi vo kahte hain muddat se yahi ham sunte hain

aate aate raah par vo aaeinge
jaate jaate bad-gumaani jaaegi

kuchh aur ban paDi na savaal-e-visaal par
hairat se dekh kar vo mire munh ko rah gae

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

koi shikva na gham na koi yaad
baiThe baiThe bas aankh bhar aai

khuub gahri jo lagi choT to ham ne jaanaa
vaqt lagtaa hai kisi dard ko jaate jaate

chali samt-e-ghaib siin kyaa havaa ki chaman zuhur kaa jal gayaa
magar ek shaakh-e-nihaal-e-gham jise dil kaho so hari rahi