ham use yaad bahut aaeinge — Qateel Shifai

ahbaab ko de rahaa huun dhokaa
chehre pe khushi sajaa rahaa huun

rahegaa saath tiraa pyaar zindagi ban kar
ye aur baat miri zindagi vafaa na kare

chars ki bu tujhe bataa degi
''ye dhuaan saa kahaan se uThtaa hai''

chalo achchhaa huaa kaam aa gai divaangi apni
vagarna ham zamaane bhar ko samjhaane kahaan jaate

thak gayaa main karte karte yaad tujh ko
ab tujhe main yaad aanaa chaahtaa huun

na chhaanv karne ko hai vo aanchal na chain lene ko hain vo baanhein
musaafiron ke qarib aa kar har ik baseraa palaT gayaa hai

mere khvaabon ke jharokon ko sajaate rahiye
na sahi vasl magar yaad to aate rahiye

tum se mile to khud se ziyaada
tum ko akelaa paayaa ham ne

kar kuchh aisaa ki tujhe yaad rakhun
bhuul jaane kaa taqaazaa hi sahi

chheDtaa kyuun hai khudaa ke liye sayyaad mujhe
nau-giraftaar huun aati nahin fariyaad mujhe

koi shikva na gham na koi yaad
baiThe baiThe bas aankh bhar aai

ishq ki choT kaa kuchh dil pe asar ho to sahi
dard kam ho yaa ziyaada ho magar ho to sahi