vo teri bhi to pahli mohabbat na thi 'qatil' — Qateel Shifai

abhi to baat karo ham se doston ki tarah
phir ikhtilaaf ke pahlu nikaalte rahnaa

aakhri hichki tire zaanun pe aae
maut bhi main shaairaana chaahtaa huun

apne haathon ki lakiron mein sajaa le mujh ko
main huun teraa tu nasib apnaa banaa le mujh ko

nikal kar dair-o-kaaba se agar miltaa na but-khaana
to Thukraae hue insaan khudaa jaane kahaan jaate

kyuun sharik-e-gham banaate ho kisi ko ai 'qatil'
apni suuli apne kaandhe par uThaao chup raho

ab jis ke ji mein aae vahi paae raushni
ham ne to dil jalaa ke sar-e-aam rakh diyaa

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

dil-e-fasurda pe sau baar taazgi aai
magar vo yaad ki jaa kar na phir kabhi aai

tark-e-ulfat bhi musibat hai ab is kaa kyaa 'ilaaj
vo judaa ho kar bhi to dil se judaa hotaa nahin

ik 'umr se ulfat ke kaTahre mein khaDaa hai
bhugtaae hain is dil ne muqadmaat musalsal

vasvase Daste rahe ishq mein saanpon ki tarah
be-asaa raah-e-khatarnaak pe din guzre hain