main ik pahaaDi tale dabaa huun kise khabar hai — Rafiq Sandelvi

Duub jaaein na phuul ki nabzein
ai khudaa mausamon ki saansein khol

suraj ki tarah maut mire sar pe rahegi
main shaam talak jaan ke khatre mein rahungaa

mujid jo nuur kaa hai vo meraa charaagh hai
parvaana huun main anjuman-e-kaaenaat kaa

kyon bhalaa kachche makaanon kaa tumhein aayaa khayaal
tum to dariyaa the tumhein tez guzar jaanaa thaa

tum ne to kahaa thaa ki chalo Duub marein ham
ab saahil-e-dariyaa pe khaDe karte ho Taa-Taa

us ne dariyaa ko lagaa kar Thokar
pyaas ki umr baDhaai hogi

banaane baiThtaa huun to teri tasvir banti hai
koi panchhi koi titli koi dariyaa banaane par

phir ret ke dariyaa pe koi pyaasaa musaafir
likhtaa hai vahi ek kahaani kai din se