suraj sitaare chaand mire saath mein rahe — Rahat Indori

main aa kar dushmanon mein bas gayaa huun
yahaan hamdard hain do-chaar mere

ik mulaaqaat kaa jaadu ki utartaa hi nahin
tiri khushbu miri chaadar se nahin jaati hai

hamaare piir 'taqi-mir' ne kahaa thaa kabhi
miyaan ye 'aashiqi 'izzat bigaaD deti hai

aankh mein paani rakho honTon pe chingaari rakho
zinda rahnaa hai to tarkibein bahut saari rakho

ye zaruri hai ki aankhon kaa bharam qaaem rahe
niind rakkho yaa na rakkho khvaab meyaari rakho

botalein khol kar to pi barson
aaj dil khol kar bhi pi jaae

vo chaand hai to aks bhi paani mein aaegaa
kirdaar khud ubhar ke kahaani mein aaegaa

chaand taare to mire bas mein nahin hain 'aazar'
phuul laayaa huun miraa haath kahaan tak jaaataa

sharaab o saaqi-e-mah-ru jo saath hon 'bedaar'
to khush-numaa hai shab-e-maahtaab mein dariyaa

yaad-e-jaanaan utar ke aai hai
shab ke ziine se chaandni ki tarah

raat bhi murjhaa chali chaand bhi kumhlaa gayaa
phir bhi tiraa intizaar dekhiye kab tak rahe

main akasr aasmaan ke chaand taare toD laataa thaa
aur ik nannhi si guDiyaa ke liye zevar banaataa thaa