ham koi achchhe chor nahin par ek dafa to ham ne bhi — Rais Farogh

fasl tumhaari achchhi hogi jaao hamaare kahne se
apne gaanv ki har gori ko nai chunariyaa laa denaa

bastiyon mein ham bhi rahte hain magar
jaise aavaara havaa sahraaon mein

tez havaa ke saath chalaa hai zard musaafir mausam kaa
os ne daaman thaam liyaa to pal-do-pal ko rukaa bhi hai

mere aangan ki udaasi na gai
roz mehmaan bulaae main ne

meraa bhi ek baap thaa achchhaa saa ek baap
vo jis jagah pahunch ke maraa thaa vahin huun main

ThanDi chaae ki pyaali pi ke
raat ki pyaas bujhaai hai

shor din ko nahin sone detaa
shab ko sannaaTaa jagaa detaa hai

har ek shaakh pe viraaniyaan musallat hain
badan-darakht bhi goyaa hai aashiyaan-e-shab

aisi duniyaa mein kab tak guzaaraa karein tum hi kah do ki kaise gavaaraa karein
raat mujh se miri bebasi ne kahaa bebasi ke liye ek taaza ghazal

ik raat dil-jalon ko ye aish-e-visaal de
phir chaahe aasmaan jahannam mein Daal de

us se hi to chalte hain kaarobaar gulshan ke
vo hi raat-raani hai vo hi gul-hazaara hai

phir is ke baad miri raat be-misaal hui
udhar vo shola-badan thaa idhar main paani thaa