dil kaa sukun rizq ke hangaame khaa gae — Ram Awtar Gupta Muztar

navaazaa hai mujhe patthar se jis ne
use main phuul de kar dekhtaa huun

shaam-e-avadh ne zulf mein gundhe nahin hain phuul
tere baghair subh-e-banaras udaas hai

teraa honaa na maan kar goyaa
tujh ko taslim kar rahaa huun main

duniyaa tere naam se mujh ko pahchaane
ishq mein aisaa rusvaa kar de yaa-allaah

lamha lamha bikhar rahaa huun main
apni takmil kar rahaa huun main

rah-e-qaraar ajab raah-e-be-qaraari hai
ruke hue hain musaafir safar bhi jaari hai

main baDaa ho gayaa huun magar bachpanaa
mere dil se kabhi bhi gayaa hi nahin

unhein apne dil ki khabrein mire dil se mil rahi hain
main jo un se ruuTh jaaun to payaam tak na pahunche

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

main badalte hue haalaat mein Dhal jaataa huun
dekhne vaale adaakaar samajhte hain mujhe

havaa shaakhon mein rukne aur ulajhne ko hai is lamhe
guzarte baadalon mein chaand haail hone vaalaa hai

dil-e-haris hi apnaa na ho sakaa qaane
vagarna tere karam mein to kuchh kami na rahi