Ram Awtar Gupta Muztar

navaazaa hai mujhe patthar se jis ne
use main phuul de kar dekhtaa huun

naamus-e-zindagi gham-e-insaan mein Dhaal kar
suuti hai raat jaam se suraj nikaal kar

shaam-e-avadh ne zulf mein gundhe nahin hain phuul
tere baghair subh-e-banaras udaas hai

rah-e-qaraar ajab raah-e-be-qaraari hai
ruke hue hain musaafir safar bhi jaari hai

be-din hue imaan diyaa ham ishq mein sab kuchh kho baiThe
aur jin ko samajhte the apnaa vo aur kisi ke ho baiThe

teraa honaa na maan kar goyaa
tujh ko taslim kar rahaa huun main

dil kaa sukun rizq ke hangaame khaa gae
sukh aadmi kaa chand nivaalon ne Das liyaa

duniyaa tere naam se mujh ko pahchaane
ishq mein aisaa rusvaa kar de yaa-allaah

lamha lamha bikhar rahaa huun main
apni takmil kar rahaa huun main

safar kaa rukh badal kar dekhtaa huun
kuchh apni samt chal kar dekhtaa huun

na aae mere honTon tak jo paimaana nahin aataa
miri khuddaariyon ko haath phailaanaa nahin aataa

dekh liyaa kyaa jaane shaam ki suuni aankhon mein
jhiil mein suraj apni saari laali Daal gayaa