phir kisi bevafaa ki yaad aai — Sahir Hoshiyarpuri

ham qarib aa kar aur duur hue
apne apne nasib hote hain

hui thi khvaab mein khushbu si mahsus
tum aae khvaab ki taabir dekhi

ham ko aghyaar kaa gilaa kyaa hai
zakhm khaaein hain ham ne yaaron se

jab bigaDte hain baat baat pe vo
vasl ke din qarib hote hain

kaun kahtaa hai mohabbat ki zabaan hoti hai
ye haqiqat to nigaahon se bayaan hoti hai

aakhir taDap taDap ke ye khaamosh ho gayaa
dil ko sukun mil hi gayaa iztiraab mein

mere khvaabon ke jharokon ko sajaate rahiye
na sahi vasl magar yaad to aate rahiye

sab ko ham bhuul gae josh-e-junun mein lekin
ik tiri yaad thi aisi jo bhulaai na gai

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

thak gayaa hai dil-e-vahshi miraa fariyaad se bhi
ji bahaltaa nahin ai dost tiri yaad se bhi

sayyaad teraa ghar mujhe jannat sahi magar
jannat se bhi sivaa mujhe raahat chaman mein thi

jiinaa taDap taDap kar marnaa sisak sisak kar
fariyaad ek ji hai kyaa kyaa kharaabiyon mein