kahin aankhein kahin baazu kahin se sar nikal aae — Saleem Figar

shaakh-dar-shaakh tiri yaad ki hariyaali hai
ham ne shaadaab bahut dil kaa shajar rakkhaa hai

vo chaand TuuT gayaa jis se raat raushan thi
chamak rahe the falak par jo sab sitaare gae

andhere ko nigaltaa jaa rahaa huun
diyaa huun aur jaltaa jaa rahaa huun

lafz le kar khayaal ki vusat
sher ki taazgi ki samt gayaa

nazar bachaae guzar jaaun paas se us ke
use bhi aaj zaraa saa Daraa diyaa jaae

gham ki dahshat-gardi mein bhi dil ko khole rakkhaa ham ne
varna is maahaul mein shahron shahron taale paD jaate hain

vo subh ko is Dar se nahin baam par aataa
naama na koi baandh de suraj ki kiran mein

meri nisbat se kare tujh ko na rusvaa duniyaa
khauf paltaa rahaa kal tujh se mulaaqaat ke baa'd

pahle chingaari se ik shola banaataa hai mujhe
phir vahi tez havaaon se Daraataa hai mujhe

aasudgi ne thapkiyaan de kar sulaa diyaa
ghar ki zaruraton ne jagaayaa to Dar lagaa