us ne khat mein banaaein hain aansu — Salman Saeed

ham hain zanjiron ki khan-khan ke bigaaDe hue log
teri paazeb ki chhan-chhan mein nahin aa sakte

aap ke haath mein hai mujh se ta'alluq kaa remote
aap chaahein to ye channel bhi badal sakte hain

tire kuche ki miTTi baa-vafaa hai
mire pairon se lipTi jaa rahi hai

log kahte hain mujhe is liye tanhaai-pasand
mujh se paagal ko kahin paas biThaanaa na paDe

vo hijr-zaade shab-e-vasl ye bhi bhuul gae
charaagh un ko jalaane nahin bujhaane the

faqat ye lakDi nahin hai tumhaari baisaakhi
shajar ke haath kaTe hain ise banaane mein

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

mire aibon ko ginvaayaa to sab ne
kisi ne meri gham-khvaari nahin ki

hamaare she'r naghme aur sajde
adaa jo ho na paae kyaa hue vo

zindagi kaa har ik gham uThaate hue
main sanbhalne lagaa laDkhaDaate hue