mujh ko bikhraayaa gayaa aur sameTaa bhi gayaa — Shakeel Azmi

kuchh dinon ke liye manzar se agar haT jaao
zindagi bhar ki shanaasaai chali jaati hai

isi khataa pe bujhaae gae charaagh mire
main jaantaa thaa bahut kuchh havaa ke baare mein

ghar ke divaar-o-dar pe shaam hi se
nazm likhtaa huaa hai sannaaTaa

haar ho jaati hai jab maan liyaa jaataa hai
jiit tab hoti hai jab Thaan liyaa jaataa hai

apni manzil pe pahunchnaa bhi khaDe rahnaa bhi
kitnaa mushkil hai baDe ho ke baDe rahnaa bhi

tumhaari maut ne maaraa hai jite-ji ham ko
hamaari jaan bhi goyaa tumhaari jaan mein thi

sabhi se jab mohabbat chaahte ho
mohabbat kyon nahin karte sabhi se

baat karnaa pyaar ki aasaan se aasaan hai
ishq karnaa karte rahnaa hai kaThin se bhi kaThin

kin manzilon luTe hain mohabbat ke qaafile
insaan zamin pe aaj gharib-ul-vatan saa hai

nahin vo sham-e-mohabbat rahi to phir 'aasim'
ye kis duaa se mire ghar mein raushni si hai

vahaan hamaaraa koi muntazir nahin phir bhi
hamein na rok ki ghar jaanaa chaahte hain ham

kisi ke zakhm par chaahat se paTTi kaun baandhegaa
agar bahnein nahin hongi to raakhi kaun baandhegaa