rind-e-kharaab-nosh ki be-adabi to dekhiye — Shakeel Badayuni

meraa azm itnaa buland hai ki paraae sholon kaa Dar nahin
mujhe khauf aatish-e-gul se hai ye kahin chaman ko jalaa na de

unhein apne dil ki khabrein mire dil se mil rahi hain
main jo un se ruuTh jaaun to payaam tak na pahunche

kaafi hai mire dil ki tasalli ko yahi baat
aap aa na sake aap kaa paighaam to aayaa

kal raat zindagi se mulaaqaat ho gai
lab thartharaa rahe the magar baat ho gai

lamhe udaas udaas fazaaein ghuTi ghuTi
duniyaa agar yahi hai to duniyaa se bach ke chal

shaguftagi-e-dil-e-kaarvaan ko kyaa samjhe
vo ik nigaah jo uljhi hui bahaar mein hai

na tum hosh mein ho na ham hosh mein hain
chalo mai-kade mein vahin baat hogi

kahaan milegi misaal meri sitamgari ki
ki main gulaabon ke zakhm kaanTon se si rahaa huun

pyaar hi pyaar hai sab log baraabar hain yahaan
mai-kade mein koi chhoTaa na baDaa jaam uThaa

namak bhar kar mire zakhmon mein tum kyaa muskuraate ho
mire zakhmon ko dekho muskuraanaa is ko kahte hain

hamein hamaari anaaein tabaah kar deingi
mukaalme kaa agar silsila nahin karte

mai pilaa aisi ki saaqi na rahe hosh mujhe
ek saaghar se do aalam hon faraamosh mujhe