halqa-e-shaam-o-sahar se nahin jaane vaalaa — Syed Amin Ashraf

is tarah chashm-e-nim-vaa ghaafil bhi thi bedaar bhi
jaise nasha ho raat kaa yaa subh kaa taDkaa huaa

main par-shikasta na thaa baadalon ke biich magar
miri uDaan kaa zanjir se lipaT jaanaa

hai taa-hadd-e-imkaan koi basti na bayaabaan
aankhon mein koi khvaab dikhaai nahin detaa

ik chaand hai aavaara-o-betaab o falak-taab
ik chaand hai aasudgi-e-hijr kaa maaraa

lazzat-e-did khudaa jaane kahaan le jaae
aankh hoti hai to hotaa nahin qaabu dil par

kahin bhi taair-e-aavaara ho magar tai hai
jidhar kamaan hai udhar jaaegaa kabhi na kabhi

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

jab ki pahlu se yaar uThtaa hai
dard be-ikhtiyaar uThtaa hai

khaak ke zarron se uf uf ki sadaa aati hai
meraa afsaana-e-gham qissa-e-maazi na huaa

chaaraagar kyaa samajh sakeinge bhalaa
dard kaisaa hai aur davaa kyaa hai

hai gor-e-gharibaan mein vahi 'shams' kaa madfan
turbat jo koi dil ke dhaDakne ki sadaa de