khud apnaa saath bhi chubhne lagaa thaa — Yasmeen Habeeb

hamein bhi tajraba hai be-ghari kaa chhat na hone kaa
darinde, bijliyaan, kaali ghaTaaein shor karti hain

jo chalaa gayaa so chalaa gayaa jo hai paas us kaa khayaal rakh
jo luTaa diyaa use bhuul jaa jo bachaa hai us ko sambhaal rakh

hamein sairaab rakkhaa hai khudaa kaa shukr hai us ne
jahaan banjar zaminein hon anaaein shor karti hain

ye kamra aur ye gard-o-ghubaar us kaa hai
vo jis ne aanaa nahin intizaar us kaa hai

aate rahte hain falak se bhi ishaare kuchh na kuchh
baat kar lete hain ham se chaand taare kuchh na kuchh

kaise hon khvaab aankh mein kaisaa khayaal dil mein ho
khud hi har ek baat kaa karnaa thaa faisla mujhe

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

jab ki pahlu se yaar uThtaa hai
dard be-ikhtiyaar uThtaa hai

ham udaasi ke parastaar sahi
hanste chehron ko duaa dete hain

mere gham mujh se ye puchhaa karte hain
ghar mein pankhaa hai to rassi bhi hogi

mere aangan ki udaasi na gai
roz mehmaan bulaae main ne