ek bhi aaftaab ban na sakaa — Yusuf Zafar

saans lene ko hi jiinaa nahin kahte hain 'zafar'
zindagi thi jo tire vasl kaa imkaan hotaa

un ki mahfil mein 'zafar' log mujhe chaahte hain
vo jo kal kahte the divaana bhi saudaai bhi

zahr hai mere rag-o-pai mein mohabbat shaayad
apne hi Dank se bichchhu ki tarah mar jaaun

aa mire chaand raat suuni hai
baat banti nahin sitaaron se

paani ko aag kah ke mukar jaanaa chaahiye
palkon pe ashk ban ke Thahar jaanaa chaahiye

thak ke patthar ki tarah baiThaa huun raste mein 'zafar'
jaane kab uTh sakun kyaa jaaniye kab ghar jaaun

zamaana laakh sitaaron ko chhu ke aa jaae
abhi dilon ko magar haajat-e-rafu hai vahi

kuchh aur din abhi is jaa qayaam karnaa thaa
yahaan charaagh vahaan par sitaara dharnaa thaa

taa-falak le gai betaabi-e-dil tab bole
hazrat-e-ishq ki pahlaa hai ye ziinaa apnaa

shab-e-vaada fasil-e-hijr se aage chamaktaa hai tiraa ism-e-sitaara-ju
ki jaise koi paivand-e-ridaa-e-subh aa jaae kisi qindil ki zad mein

chaand sitaare jhiil samundar murat teri kyaa dekhun
Duub gayaa aankhon ke andar surat teri kyaa dekhun

sar ko na pheink apne falak par ghurur se
tu khaak se banaa hai tiraa ghar zamin hai