raqs karne kā milā hukm jo dariyāoñ meñ — Qateel Shifai

kis tarah apnī mohabbat kī maiñ takmīl karūñ
ġham-e-hastī bhī to shāmil hai ġham-e-yār ke saath

subūt-e-ishq kī ye bhī to ek sūrat hai
ki jis se pyaar kareñ us pe tohmateñ bhī dhareñ

rahegā saath tirā pyaar zindagī ban kar
ye aur baat mirī zindagī vafā na kare

uf vo marmar se tarāshā huā shaffāf badan
dekhne vaale use tāj-mahal kahte haiñ

kyā maslahat-shanās thā vo aadmī 'qatīl'
majbūriyoñ kā jis ne vafā naam rakh diyā

nikal kar dair-o-ka.aba se agar miltā na but-ḳhāna
to Thukrā.e hue insāñ ḳhudā jaane kahāñ jaate

baḌe baḌe ġham khaḌe hue the rasta roke rāhoñ meñ
chhoTī chhoTī ḳhushiyoñ se hī ham ne dil ko shaad kiyā

vo to ḳhush-bū hai havāoñ meñ bikhar jā.egā
mas.ala phuul kā hai phuul kidhar jā.egā

jis khet se dahqāñ ko mayassar nahīñ rozī
us khet ke har ḳhosha-e-gandum ko jalā do

ab ḳhushī hai na koī dard rulāne vaalā
ham ne apnā liyā har rang zamāne vaalā

mirī jaan aaj kā ġham na kar ki na jaane kātib-e-vaqt ne
kisī apne kal meñ bhī bhuul kar kahīñ likh rakhī hoñ masarrateñ

jo ḳhushāmad kare ḳhalq us se sadā raazī hai
sach to ye hai ki ḳhushāmad se ḳhudā raazī hai