dard miThi zabaan pe rakh aae — Diya Jeem

"zabaan pe aane se pahle kahi gai huun main kisi khayaal mein kho kar buni gai huun main mire khayaal ki dahliz itni unchi hai ki aasmaan ke baraabar chuni gai huun main miraa ghurur miri vahshaton pe haavi hai kuchh aise vasf se mumtaaz ki gai huun main mire vajud mein pahron sukut rahtaa hai na jaane kis ki sadaa mein gundhi gai huun main mire khayaal se jal jaate hain charaagh-e-sahar ki taaq-e-shams-o-qamar par rakhi gai huun main vo roz khvaab ke rauzan se dekhtaa hai mujhe ajiib Dor hai jis se bandhi gai huun main sabhi ke dil mein 'diyaa' pyaar kaa jalaati huun varaq varaq pe ujaalaa likhi gai huun main"

"tulu-e-ishq ke manzar thame the kahin kaase kahin par sar thame the nazar dahshat-zada yunhi nahin thi khayaalon mein bahut se Dar thame the barasnaa thaa jinhein aankhon se meri vahi baadal kahin uupar thame the dil-e-muztar taDapne lag gayaa thaa ajab tufaan saanson par thame the tumhaari raah ke patthar the jitne hamaare paanv mein aa kar thame the kai aaseb yaadon ke 'diyaa' ji hamaari ruuh ke andar thame the"

"tumhein is dil se kyaa aadi huaa hai ki jalne kaa diyaa aadi huaa hai use niind aae bhi to kaise aae vo mere khvaab kaa aadi huaa hai vo aae to fazaaein jhumti hain kisi kaa raasta aadi huaa hai kahaa rotaa hai kyuun dil ko sambhaalo to hans kar ye kahaa aadi huaa hai zamaane ko na jaane ye huaa kyaa zamaana aap kaa aadi huaa hai"

"tere aangan mein vafaaon kaa shajar rakkhaa thaa apne honTon pe duaaon kaa shajar rakkhaa thaa kaise na yaad ki khiDki mein Thaharti kal shab mere kamre mein sadaaon kaa shajar rakkhaa thaa yaad-e-jaanaan ke parindon ke sukun ki khaatir apne siine mein vafaaon kaa shajar rakkhaa thaa jaane kyaa soch ke fitrat se mohabbat ki thi mere ajdaad ne gaanv kaa shajar rakkhaa thaa meri qismat mein mohabbat kaa sitaara hi nahin meri qismat mein jafaaon kaa shajar rakkhaa thaa vaise to pyaar ki chhaanv se mohabbat thi 'diyaa' par kahin dil mein anaaon kaa shajar rakkhaa thaa"

"thi ham ne pyaar mein har baat maani kyaa karte hamein hi kahte rahe vo divaani kyaa karte kal us ke hijr ki divaar toD di ham ne nae zamaane mein yaadein puraani kyaa karte tumhaare saath hi kirdaar thaa hamaaraa bhi jo tum gae to ham aage kahaani kyaa karte yunhi uThaa ke buDhaape ko saunp di ham ne tumhaare baad bhari ye javaani kyaa karte nigal liyaa vo nagina ba-vaqt-e-rukhsati hi tumhaare naam ki thi jo nishaani kyaa karte 'diyaa' ye aankh to ik khvaab se hi bhar aai tumhaare naam pe ham zindagaani kyaa karte"

"aap ke vaade kisi kal se bandhe rahte hain chaahne vaale usi pal se bandhe rahte hain tang aa jaati hain pallu se lagi girhein bhi kaise rishte hain jo malmal se bandhe rahte hain subh ki shabnami palkon ko masalte hue haath ik nae khvaab ki konpal se bandhe rahte hain khaTTi miThi si koi baat labon mein le kar munh ko Dhaanpe hue aanchal se bandhe rahte hain sirf mere hi bayaabaan pe paDi os nahin ashk dariyaaon ke baadal se bandhe rahte hain shaam ki zulfein bikharne se ayaan hotaa hai kitne jugnu hain jo kaajal se bandhe rahte hain zindagi sone ki mohlat nahin deti hai 'diyaa' khvaab taabir ke aanchal se bandhe rahte hain"

"is ishq-e-junun-khez mein kyaa kyaa nahin hotaa divaana hai jo qais se lailaa nahin hotaa kuchh hashr lahad par abhi barpaa nahin hotaa aae ho to Thahro koi zinda nahin hotaa kyuun kar ye kahun husn kaa nashsha nahin hotaa hotaa to bahut hai magar itnaa nahin hotaa kuchh kahiye to sharmaa ke jhukaa lete hain gardan bhule se bhi ab vaada-e-fardaa nahin hotaa milte hain vo dil surkh hui jaati hai chuTki naazuk hain bahut khun-e-tamannaa nahin hotaa deti hai mazaa mai kaa hamein talkhi-e-tauba jab haath mein paimaana-e-sahbaa nahin hotaa vo hashr ke din kushte ko Thukraa chuke sau-baar kuchh jaan si paD jaati hai zinda nahin hotaa boli ye tamannaa jo ruke vo dar-e-dil par ghar aap kaa hai aap se pardaa nahin hotaa tiron ko jagah dete hain jo siine mein apne un logon ke ai jaan kaleja nahin hotaa sahraa se qadam ghar ki taraf khaak uThaaun kaanTe se judaa paanv kaa chhaalaa nahin hotaa baiThe nazar aate hain vahi teri gali mein jin kaa kahin duniyaa mein Thikaanaa nahin hotaa furqat mein hai kyuun nazaa ki taklif gavaaraa mar jaaein 'riyaaz' aap se itnaa nahin hotaa"

"hai jo ik maa'raka faisal nahin hone detaa jin vo ho ke mujhe botal nahin hone detaa qatl ik roz hi kartaa huun isi goshe mein aur saabit ise maqtal nahin hone detaa zid hai us ki ki har ik shaakh ho phir sabz hi sabz garche paidaa koi konpal nahin hone detaa raushni apne khayaalon hi se karni hogi koi raushan kahin mash'al nahin hone detaa chun-ki miTTi ki bhi ek apni alag khushbu hai main kahin bhi ise sandal nahin hone detaa ik parinda ki jo sahtaa hai havaaon kaa dabaao aur parvaaz ko paidal nahin hone detaa Dar hai us ko nazar aae na kahin zehn kaa 'aks vo miraa aaina saiqal nahin hone detaa tiraa qaanun hai jangal kaa ghanimat hai ki tu mire is shahr ko jangal nahin hone detaa chalo baat us ki sunein ek 'ajab mantiq se jo kisi baat ko muhmal nahin hone detaa"

"muzhda ai zauq-e-asiri ki nazar aataa hai daam-e-khaali qafas-e-murgh-e-giraftaar ke paas jigar-e-tishna-e-aazaar tasalli na huaa ju-e-khun ham ne bahaai bun-e-har khaar ke paas mund gaiin kholte hi kholte aankhein hai hai khuub vaqt aae tum is 'aashiq-e-bimaar ke paas main bhi ruk ruk ke na martaa jo zabaan ke badle dashna ik tez saa hotaa mire gham-khvaar ke paas dahan-e-sher mein jaa baiThe lekin ai dil na khaDe ho jiye khubaan-e-dil-aazaar ke paas dekh kar tujh ko chaman bas-ki numu kartaa hai khud-ba-khud pahunche hai gul gosha-e-dastaar ke paas mar gayaa phoD ke sar 'ghaalib'-e-vahshi hai hai baiThnaa us kaa vo aa kar tiri divaar ke paas kab faqiron ko rasaai bu-e-mai-khvaar ke paas to bane bu dijiye maikhaane ki divaar ke paas"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"kahe detaa huun go hai to nahin ye baat kahne ki tiri khvaahish nahin dil mein ziyaada der rahne ki bachaa kar dil guzartaa jaa rahaa huun har ta’alluq se kahaan us aable ko taab hai ab choT sahne ki rag-o-pai mein na hangaama kare to kyaa kare aakhir ijaazat jab nahin is ranj ko aankhon se bahne ki bas apni apni tarjihaat apni apni khvaahish hai tujhe shohrat kamaane ki mujhe ik she'r kahne ki jahaan kaa huun vahin ki raas aaegi fazaa mujh ko ye duniyaa bhi bhalaa koi jagah hai mere rahne ki jo kal 'irfaan' par guzri sunaa kuchh us ke baare mein khabar tum ne suni tufaan mein dariyaa ke bahne ki"