diip andhon ke darmiyaan hogaa — Ehya Bhojpuri

"haathon ki lakiron kaa likhaa kaaT rahe hain ham apne gunaahon ki sazaa kaaT rahe hain miTti nahin taarikh se koi bhi ibaarat taarikh likhegi ki likhaa kaaT rahe hain hai aaj ki faslon mein adaavat hi adaavat kyaa boyaa thaa ham ne yahaan kyaa kaaT rahe hain ham phuul hain mahkeinge jidhar jaaeinge lekin is baagh mein rahne ki sazaa kaaT rahe hain gaate the kabhi vo bhi mohabbat ke taraane mauqa jo milaa hai to galaa kaaT rahe hain aasaan banaanaa hai mohabbat ki Dagar ko chun chun ke so ham lafz-e-vafaa kaaT rahe hain"

"jab ho gayaa kamaal to cigarette jalaa liyaa yaa phir huaa malaal to cigarette jalaa liyaa khud par kisi ko hansne kaa mauqa nahin diyaa puchhaa kisi ne haal to cigarette jalaa liyaa sukhe gale se lafz ko laanaa thaa zehn tak jab aa gayaa khayaal to cigarette jalaa liyaa ghusse mein khuun ke ghunT to piitaa rahaa magar aankhein huiin jo laal to cigarette jalaa liyaa achchhi nahin hai shai magar 'ahyaa' main kyaa karun karnaa hai shukr-e-haal to cigarette jalaa liyaa"

"tabsira kyon kar rahe ho baarhaa ajdaad par faisla hogaa tumhaaraa aaj ki buniyaad par baat teri mil-milaa kar Thiik hai naqqaad par she'r achchhaa yaa buraa hai munhasir hai daad par sab hifaazat kar rahein hain mustaqil divaar ki jab ki hamla ho rahaa hai mustaqil buniyaad par kaise nikloge bhalaa apne gunah ke jaal se tum ne to ilzaam saaraa rakh diyaa sayyaad par dar-ba-dar phirnaa paDegaa 'aashiqon ko 'umr bhar zulm sahnaa laazmi hai vaaris-e-farhaad par maan ke pairon ke tale jannat ki ne'mat hai magar baap kaa saaya bhi 'ahyaa' chaahiye aulaad par"

"kaise kabhi kisi ko dikhaaegaa aaina jab ek dusre ko laDaaegaa aaina jis raushni pe aks kaa daar-o-madaar hai us raushni ko kaun dikhaaegaa aaina fitrat mein us ki naaz-khiraami nahin to phir kyunkar kisi ke naaz uThaaegaa aaina samjho ki aaine kaa janaaza nikal gayaa jis din amir-e-shahr ko bhaaegaa aaina aisaa nahin ki sirf sanvaaregaa shakhsiyat ehsaan bhi na tum pe jataaegaa aaina pardaa paDaa ho aankhon pe mumkin to hai magar mumkin nahin ki aib chhupaaegaa aaina kah do anaa-parast se 'ahyaa' ki jald hi main aur ham ke darmiyaan aaegaa aaina"

"hain mere zakhm ki raanaaiyaan ajib-o-gharib ki us ko chaahiye gahraaiyaan ajib-o-gharib ye kis kaa zor hai mere charaagh ki lau par banaa rahaa hai jo parchhaaiyaan ajib-o-gharib hamaare khvaab ki galiyon se kaun guzraa hai ki aa rahi hain ye angDaaiyaan ajib-o-gharib nazar utaarti hai vaqt vaqt par meri mili hai maaon ko binaaiyaan ajib-o-gharib jalaae meri hi cigarette miri ayaadat par ye meraa dost bhi hai kaaiyaan ajib-o-gharib"

"hijrat karo to rishta-o-saamaan chhoD kar varna na jaao tum kabhi maidaan chhoD kar yuun to laDaai jhagDe ki aadat nahin mujhe phir bhi ghalat kiyaa thaa garebaan chhoD kar ab koi milne-julne ko aataa nahin hai ghar main bhi huun band kamre mein daalaan chhoD kar achchhe bure se paak yahaan koi shai nahin tum faaeda ginaa karo nuqsaan chhoD kar khushbu bikhernaa miri fitrat hai dosto khushbu bikhertaa huun main gul-daan chhoD kar"

"is ishq-e-junun-khez mein kyaa kyaa nahin hotaa divaana hai jo qais se lailaa nahin hotaa kuchh hashr lahad par abhi barpaa nahin hotaa aae ho to Thahro koi zinda nahin hotaa kyuun kar ye kahun husn kaa nashsha nahin hotaa hotaa to bahut hai magar itnaa nahin hotaa kuchh kahiye to sharmaa ke jhukaa lete hain gardan bhule se bhi ab vaada-e-fardaa nahin hotaa milte hain vo dil surkh hui jaati hai chuTki naazuk hain bahut khun-e-tamannaa nahin hotaa deti hai mazaa mai kaa hamein talkhi-e-tauba jab haath mein paimaana-e-sahbaa nahin hotaa vo hashr ke din kushte ko Thukraa chuke sau-baar kuchh jaan si paD jaati hai zinda nahin hotaa boli ye tamannaa jo ruke vo dar-e-dil par ghar aap kaa hai aap se pardaa nahin hotaa tiron ko jagah dete hain jo siine mein apne un logon ke ai jaan kaleja nahin hotaa sahraa se qadam ghar ki taraf khaak uThaaun kaanTe se judaa paanv kaa chhaalaa nahin hotaa baiThe nazar aate hain vahi teri gali mein jin kaa kahin duniyaa mein Thikaanaa nahin hotaa furqat mein hai kyuun nazaa ki taklif gavaaraa mar jaaein 'riyaaz' aap se itnaa nahin hotaa"

"muzhda ai zauq-e-asiri ki nazar aataa hai daam-e-khaali qafas-e-murgh-e-giraftaar ke paas jigar-e-tishna-e-aazaar tasalli na huaa ju-e-khun ham ne bahaai bun-e-har khaar ke paas mund gaiin kholte hi kholte aankhein hai hai khuub vaqt aae tum is 'aashiq-e-bimaar ke paas main bhi ruk ruk ke na martaa jo zabaan ke badle dashna ik tez saa hotaa mire gham-khvaar ke paas dahan-e-sher mein jaa baiThe lekin ai dil na khaDe ho jiye khubaan-e-dil-aazaar ke paas dekh kar tujh ko chaman bas-ki numu kartaa hai khud-ba-khud pahunche hai gul gosha-e-dastaar ke paas mar gayaa phoD ke sar 'ghaalib'-e-vahshi hai hai baiThnaa us kaa vo aa kar tiri divaar ke paas kab faqiron ko rasaai bu-e-mai-khvaar ke paas to bane bu dijiye maikhaane ki divaar ke paas"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"kahe detaa huun go hai to nahin ye baat kahne ki tiri khvaahish nahin dil mein ziyaada der rahne ki bachaa kar dil guzartaa jaa rahaa huun har ta’alluq se kahaan us aable ko taab hai ab choT sahne ki rag-o-pai mein na hangaama kare to kyaa kare aakhir ijaazat jab nahin is ranj ko aankhon se bahne ki bas apni apni tarjihaat apni apni khvaahish hai tujhe shohrat kamaane ki mujhe ik she'r kahne ki jahaan kaa huun vahin ki raas aaegi fazaa mujh ko ye duniyaa bhi bhalaa koi jagah hai mere rahne ki jo kal 'irfaan' par guzri sunaa kuchh us ke baare mein khabar tum ne suni tufaan mein dariyaa ke bahne ki"

"bahr-e-rang-e-daastaan rahne diyaa ik tajassus darmiyaan rahne diyaa ab zamin ban kar bichhaa jaataa hai vo main ne jis ko aasmaan rahne diyaa raushni aur khvaab saare hech the apni aankhon mein dhuaan rahne diyaa vo jagah raushan nahin hogi kabhi is mohabbat ko jahaan rahne diyaa maan ne maathaa chuum kar rukhsat kiyaa maamtaa kaa saaebaan rahne diyaa kul milaa ke ye hai raaz-e-tishnagi ham ne dil ko sargiraan rahne diyaa khud hami paamaal Thahre shauq se khush-gumaan ko khush-gumaan rahne diyaa"