har dost ko aazmaa rahaa huun — Abid Munavari

"muqaddar mein saahil kahaan hai miyaan miri naav be-baadbaan hai miyaan jo barq-e-tapaan se munavvar rahe vahi aashiyaan aashiyaan hai miyaan kahaan jaaiye mai-kada chhoD kar yahi ek jaa-e-amaan hai miyaan abad tak mukammal na ho paaegi shab-e-gham ki ye daastaan hai miyaan kahaan paaon rakkhun pareshaan huun zamin surat-e-aasmaan hai miyaan muqaddas sahi kaarobaar-e-vafaa magar is mein nuqsaan-e-jaan hai miyaan ajab phiki phiki si hai chaandni udaas aaj kyuun chandramaan hai miyaan jahaan dil ke badle mein miltaa hai dil vo duniyaa na jaane kahaan hai miyaan nahin mujh se 'aabid' vo kuchh khaas duur faqat zindagi darmiyaan hai miyaan"

"aur kis kaa ghar kushaada hai kahaan Thahregi raat mujh ko hi mehmaan-navaazi kaa sharaf bakhshegi raat niind aaegi na un be-khvaab aankhon mein kabhi mujh ko thapki dete dete aap so jaaegi raat shaam hargiz din ke siine mein na khanjar ghonpti ye agar maa'lum hotaa khun-bahaa maangegi raat aansuon se tar-ba-tar ho jaaegaa aangan tamaam karb-e-tanhaai pe apne phuuT kar roegi raat chaand-taaron ko chhupaa bhi lein ghane baadal agar jhilmilaate jugnuon se raasta puchhegi raat apne apne lutf se donon navaazeinge mujhe zakhm-e-dil bakhshegaa din us par namak chhiDkegi raat suraj apne rath ko phir aakaash par dauDaaegaa subh kaa taaraa nikalte hi simaT jaaegi raat jab tire juuDe kaa gajraa yaad aaegaa mujhe raat-ki-raani ke phulon se mahak uTThegi raat ghar palaT kar jaaungaa rukh par liye din-bhar ki dhuul mujh ko ai 'aabid' baDi mushkil se pahchaanegi raat"

"jab aasmaan par mah-o-akhtar palaT kar aae ham rukh pe din ki dhuup liye ghar palaT kar aae nazzaara jin kaa baais-e-rahm-e-nigaah thaa aankhon ke saamne vahi manzar palaT kar aae har ghar sulag rahaa thaa ajab sard aag mein jab arsa-gaah-e-jang se lashkar palaT kar aae sad-rashk-e-iltifaat thaa jab us kaa jaur bhi ji kyuun na chaahe phir vo sitamgar palaT kar aae jo baat guftani thi vahi an-kahi rahi be-ras jo tazkire the zabaan par palaT kar aae duniyaa se ho gae na hon aazurda-dil kahin phir is zamin par na payambar palaT kar aae ye baat agar hai sach ki palaTtaa nahin hai vaqt lamhaat-e-gham mire liye kyuun kar palaT kar aae kahte hain us ne dekhi thi kal ek jal-pari har lab pe hai duaa ki shanaavar palaT kar aae ai 'aabid' aasmaan pe na kuchh bhi asar huaa mujh par hi meri aah ke patthar palaT kar aae"

"be-tamannaa huun khasta-jaan huun main ek ujDaa huaa makaan huun main jang to ho rahi hai sarhad par apne ghar mein lahuluhaan huun main gham-o-aalaam bhi hain mujh ko aziiz qadr-daanon kaa qadr-daan huun main zabt tahzib hai mohabbat ki vo samajhte hain be-zabaan huun main lab pe ikhlaas haath mein khanjar kaise yaaron ke darmiyaan huun main chhed hi chhed hain faqat jis mein aisi kashti kaa baadbaan huun main jo kisi ko bhi aaj yaad nahin bhuli-bisri vo daastaan huun main yaa giraan-gosh hai nagar kaa nagar yaa kisi dasht mein azaan huun main shaairi ho ki aashiqi 'aabid' har rivaayat kaa paasbaan huun main"

"khud savaal aap hi javaab huun main zindagi ki khuli kitaab huun main yuun to ik jura-e-sharaab huun main gardish-e-vaqt kaa javaab huun main justaju-e-sukun-e-dil thi mujhe gharq-e-dariyaa-e-iztiraab huun main meri qimat hai pyaar ke do-bol kitne saste mein dastiyaab huun main kabhi naghma-taraaz thaa main bhi aaj TuuTaa huaa rabaab huun main ranj gham dard be-kasi hasrat 'mir' kaa jaise intikhaab huun main kaun mujh par yaqin laaegaa apni nazron mein khud saraab huun main pahle sailaab se pareshaan thaa ab ki mahv-e-talaash-e-aab huun main mukhtalif rang hain mire 'aabid' kabhi jalva kabhi hijaab huun main"

"vaaizo ye sharaab-khaana hai ham faqiron kaa aastaana hai 'ishq mein jaan dene vaalon ne maut ko bhi hayaat jaanaa hai raat ko khvaab mein ye dekhaa thaa khuld mein bhi sharaab-khaana hai ruThnaa zindagi se ai 'aabid' maut kaa hausla baDhaanaa hai"

"is ishq-e-junun-khez mein kyaa kyaa nahin hotaa divaana hai jo qais se lailaa nahin hotaa kuchh hashr lahad par abhi barpaa nahin hotaa aae ho to Thahro koi zinda nahin hotaa kyuun kar ye kahun husn kaa nashsha nahin hotaa hotaa to bahut hai magar itnaa nahin hotaa kuchh kahiye to sharmaa ke jhukaa lete hain gardan bhule se bhi ab vaada-e-fardaa nahin hotaa milte hain vo dil surkh hui jaati hai chuTki naazuk hain bahut khun-e-tamannaa nahin hotaa deti hai mazaa mai kaa hamein talkhi-e-tauba jab haath mein paimaana-e-sahbaa nahin hotaa vo hashr ke din kushte ko Thukraa chuke sau-baar kuchh jaan si paD jaati hai zinda nahin hotaa boli ye tamannaa jo ruke vo dar-e-dil par ghar aap kaa hai aap se pardaa nahin hotaa tiron ko jagah dete hain jo siine mein apne un logon ke ai jaan kaleja nahin hotaa sahraa se qadam ghar ki taraf khaak uThaaun kaanTe se judaa paanv kaa chhaalaa nahin hotaa baiThe nazar aate hain vahi teri gali mein jin kaa kahin duniyaa mein Thikaanaa nahin hotaa furqat mein hai kyuun nazaa ki taklif gavaaraa mar jaaein 'riyaaz' aap se itnaa nahin hotaa"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"kahe detaa huun go hai to nahin ye baat kahne ki tiri khvaahish nahin dil mein ziyaada der rahne ki bachaa kar dil guzartaa jaa rahaa huun har ta’alluq se kahaan us aable ko taab hai ab choT sahne ki rag-o-pai mein na hangaama kare to kyaa kare aakhir ijaazat jab nahin is ranj ko aankhon se bahne ki bas apni apni tarjihaat apni apni khvaahish hai tujhe shohrat kamaane ki mujhe ik she'r kahne ki jahaan kaa huun vahin ki raas aaegi fazaa mujh ko ye duniyaa bhi bhalaa koi jagah hai mere rahne ki jo kal 'irfaan' par guzri sunaa kuchh us ke baare mein khabar tum ne suni tufaan mein dariyaa ke bahne ki"

"kyaa apne shahr mein koi aisaa makaan hai samjhun jise ki asl mein vo ik jahaan hai DhunDo haqiqat is mein na afsaana hi koi is kaa bayaan kuchh nahin us kaa bayaan hai apnaa shi'aar ab hai faqat amn-dushmani ye aur baat faakhta apnaa nishaan hai likhne ko ek harf na kahne ko ek lafz yuun to qalam hai haath mein munh mein zabaan hai vo lams jis ke baa'd zamaane guzar gae vo lams ab bhi taaza hai ab bhi javaan hai ho jaaegaa yaqin sabhon kaa hi kal jo aaj meraa yaqin aur sabhon kaa gumaan hai shatranj ki bisaat ki thi apni mez par shatranj ki bisaat ki saaraa jahaan hai"

"charaaghon se kuchh to churaayaa gayaa hai jo thi aag us ko bujhaayaa gayaa hai likhaa thaa jinhein sirf apne lahu se mire un khaton ko jalaayaa gayaa hai hazaaron daf'a us ne ki bevafaai mujhe bevafaa kyon bataayaa gayaa hai mujhe khud nikalnaa paDaa apne ghar se ye mat sochnaa ki bhagaayaa gayaa hai khabar ye mili hai ki mere hi ghar mein kisi ghair ko ab basaayaa gayaa hai mujhe hi sataa kar mujhe hi rulaa kar ye ilzaam mujh par lagaayaa gayaa hai tumhein kyaa bataaun mohabbat mein 'raavat' mujhe kis qadar aazmaayaa gayaa hai"