khvaab thaa armaan thaa kyaa kuchh tiri palkon pe thaa — Basheer Dada

"mire naalon se jalte hain miri aahon se jalte hain mire dil ke nihaan-khaane mire haathon se jalte hain haqiqat mein masarrat ki bahaarein jin ko haasil hain vahi aksar mire jhaDte hue khvaabon se jalte hain miraa un se lipaT jaanaa vo ik lahza tasavvur thaa harif-e-dil usi dam se miri baanhon se jalte hain shab-e-gham se miri rukti ukhaDti saans chalti hai mire sab maut ke pyaase miri raaton se jalte hain vo aakhir kesari malbus mein uryaan nikal aae vo khul ke ab hamaare zaafaraan-zaaron se jalte hain vo khushbu naam jab se kar liyaa vird-e-zabaan main ne tabhi se itr ke taajir miri saanson se jalte hain"

"tire baad is jahaan mein koi dusraa nahin thaa are be-misaal tujh saa koi bevafaa nahin thaa miraa Dubtaa safina kahun kaise paar utraa mire saath ik khudaa thaa koi naa-khudaa nahin thaa tire ishq ke talaatum ne Dubo diyaa hai varna to ai mauj-e-reg main bhi koi bulbulaa nahin thaa to ThiThurti sardiyon mein kabhi aag lene aati main jigar jalaae rakhtaa koi dil-jalaa nahin thaa vo misaal-e-khvaab-e-manzar na lage palak palak se koi khvaab phir na jaage mujhe ye pataa nahin thaa tire is mariz-e-dil tak tu kabhi pahunch na paai tu ye baat so chhupaae main kahin chhupaa nahin thaa main tamaam hosh kho kar tire dar pe jaan se jaataa tire ghar ke raaston mein kahin mai-kada nahin thaa"

"be-basar aafaat se taklif hoti hai mujhe sar-phire haalaat se taklif hoti hai mujhe jo mire dushman ko samjhaa kar gai kam-zarf hai yaani kis kis baat se taklif hoti hai mujhe aaj bairun-e-qafas sayyaad ki parvaa nahin aap apni zaat se taklif hoti hai mujhe jashn kar meri tabaahi par koi shikva nahin bas tiri auqaat se taklif hoti hai mujhe ham-nashini se tiri har shab bahut shirin thi juz tire ab raat se taklif hoti hai mujhe zulm kaa aadi huun zanjiri miri pahchaan hai khud lagaai ghaat se taklif hoti hai mujhe"

"pyaar ke khaTTe-miThe naame vo likhti hai main paDhtaa huun har shab ko jaane-anjaane vo likhti hai main paDhtaa huun aaj bhi furqat ke lamhon mein mere naam ke harf-e-adaavat TeDhe-meDhe tirchhe aaDe vo likhti hai main paDhtaa huun main naazuk ehsaas likhun to bojh tale vo dab jaati hai lafz javaaban patthar baandhe vo likhti hai main paDhtaa huun roz baqaa-e-baaham ki tajviz pe ham ghul-mil jaate hain baiTh ke aksar maut kinaare vo likhti hai main paDhtaa huun meri ThanDi aah pe vo har tarah samaaat rok chuki hai lekin apne man ki baatein vo likhti hai main paDhtaa huun jab us ki tausif likhun to khushbu se khushbu likhtaa huun badle mein naa-zebaa taane vo likhti hai main paDhtaa huun"

"safar mein raasta jo pur-khatar milaa thaa mujhe bahut hi khuub thaa kyuun raahbar milaa thaa mujhe jahaan mein jab koi jins-e-garaan-shanaas na thaa to itnaa besh-bahaa kyuun guhar milaa thaa mujhe phir us ke baad miraa sar rahaa na shaanon par dayaar-e-ishq mein vo sang-e-dar milaa thaa mujhe main taa-hayaat farishton ke par kutar letaa jigar kaa dard magar mukhtasar milaa thaa mujhe chaman mein yaar-e-sharar-baar ki khudaai mein shajar milaa thaa na koi samar milaa thaa mujhe jo chaahtaa use main bhi tabaah kar detaa usi ke qurb mein aisaa hunar milaa thaa mujhe sunaa thaa sura-e-ikhlaas main ne aazar se sanam-kade mein khudaa kaa hi ghar milaa thaa mujhe hai moajiza ki vo sidra maqaam tak pahunchaa jo ek taair-e-be-baal-o-par milaa thaa mujhe ye meri aabla-paai mujhe mubaarak ho vo din yahi thaa ki izn-e-safar milaa thaa mujhe kabhi 'bashir' ko main ne junun mein dekhaa thaa ajiib saahab-e-fahm-o-nazar milaa thaa mujhe"

"sukun-e-dil ho magar tum bachaa sake na mujhe dalil-e-dard-e-jigar tum bachaa sake na mujhe tumhi safina tumhi naa-khudaa tumhi saahil main Dubtaa huun magar tum bachaa sake na mujhe kisi ke dast-e-shifaa kaise mere kaam aaein mire tabib agar tum bachaa sake na mujhe huun shab-gazida gham-e-dil bichhaD gae tum bhi mire sharik-e-safar tum bachaa sake na mujhe lage hain dil pe mire chaarasaaz tir-e-balaa tumhi the sina-sipar tum bachaa sake na mujhe koi na dekh sakaa hai miraa ye soz-e-darun tumhi the ahl-e-nazar tum bachaa sake na mujhe paraai aag mein andar se jal rahaa huun main mire chinaar-shajar tum bachaa sake na mujhe"

"is ishq-e-junun-khez mein kyaa kyaa nahin hotaa divaana hai jo qais se lailaa nahin hotaa kuchh hashr lahad par abhi barpaa nahin hotaa aae ho to Thahro koi zinda nahin hotaa kyuun kar ye kahun husn kaa nashsha nahin hotaa hotaa to bahut hai magar itnaa nahin hotaa kuchh kahiye to sharmaa ke jhukaa lete hain gardan bhule se bhi ab vaada-e-fardaa nahin hotaa milte hain vo dil surkh hui jaati hai chuTki naazuk hain bahut khun-e-tamannaa nahin hotaa deti hai mazaa mai kaa hamein talkhi-e-tauba jab haath mein paimaana-e-sahbaa nahin hotaa vo hashr ke din kushte ko Thukraa chuke sau-baar kuchh jaan si paD jaati hai zinda nahin hotaa boli ye tamannaa jo ruke vo dar-e-dil par ghar aap kaa hai aap se pardaa nahin hotaa tiron ko jagah dete hain jo siine mein apne un logon ke ai jaan kaleja nahin hotaa sahraa se qadam ghar ki taraf khaak uThaaun kaanTe se judaa paanv kaa chhaalaa nahin hotaa baiThe nazar aate hain vahi teri gali mein jin kaa kahin duniyaa mein Thikaanaa nahin hotaa furqat mein hai kyuun nazaa ki taklif gavaaraa mar jaaein 'riyaaz' aap se itnaa nahin hotaa"

"hai jo ik maa'raka faisal nahin hone detaa jin vo ho ke mujhe botal nahin hone detaa qatl ik roz hi kartaa huun isi goshe mein aur saabit ise maqtal nahin hone detaa zid hai us ki ki har ik shaakh ho phir sabz hi sabz garche paidaa koi konpal nahin hone detaa raushni apne khayaalon hi se karni hogi koi raushan kahin mash'al nahin hone detaa chun-ki miTTi ki bhi ek apni alag khushbu hai main kahin bhi ise sandal nahin hone detaa ik parinda ki jo sahtaa hai havaaon kaa dabaao aur parvaaz ko paidal nahin hone detaa Dar hai us ko nazar aae na kahin zehn kaa 'aks vo miraa aaina saiqal nahin hone detaa tiraa qaanun hai jangal kaa ghanimat hai ki tu mire is shahr ko jangal nahin hone detaa chalo baat us ki sunein ek 'ajab mantiq se jo kisi baat ko muhmal nahin hone detaa"

"muzhda ai zauq-e-asiri ki nazar aataa hai daam-e-khaali qafas-e-murgh-e-giraftaar ke paas jigar-e-tishna-e-aazaar tasalli na huaa ju-e-khun ham ne bahaai bun-e-har khaar ke paas mund gaiin kholte hi kholte aankhein hai hai khuub vaqt aae tum is 'aashiq-e-bimaar ke paas main bhi ruk ruk ke na martaa jo zabaan ke badle dashna ik tez saa hotaa mire gham-khvaar ke paas dahan-e-sher mein jaa baiThe lekin ai dil na khaDe ho jiye khubaan-e-dil-aazaar ke paas dekh kar tujh ko chaman bas-ki numu kartaa hai khud-ba-khud pahunche hai gul gosha-e-dastaar ke paas mar gayaa phoD ke sar 'ghaalib'-e-vahshi hai hai baiThnaa us kaa vo aa kar tiri divaar ke paas kab faqiron ko rasaai bu-e-mai-khvaar ke paas to bane bu dijiye maikhaane ki divaar ke paas"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"kahe detaa huun go hai to nahin ye baat kahne ki tiri khvaahish nahin dil mein ziyaada der rahne ki bachaa kar dil guzartaa jaa rahaa huun har ta’alluq se kahaan us aable ko taab hai ab choT sahne ki rag-o-pai mein na hangaama kare to kyaa kare aakhir ijaazat jab nahin is ranj ko aankhon se bahne ki bas apni apni tarjihaat apni apni khvaahish hai tujhe shohrat kamaane ki mujhe ik she'r kahne ki jahaan kaa huun vahin ki raas aaegi fazaa mujh ko ye duniyaa bhi bhalaa koi jagah hai mere rahne ki jo kal 'irfaan' par guzri sunaa kuchh us ke baare mein khabar tum ne suni tufaan mein dariyaa ke bahne ki"