palkon par nam kyaa phail gayaa — Sabir Waseem

"jo khvaab mere nahin the main un ko dekhtaa thaa isi liye aankh khul gai thi isi liye dil dukhaa huaa thaa udaasiyon se bhari hui iltijaa suni thi kisi nagar mein koi kisi ko pukaartaa thaa vo ik sadaa thi ki haft-aalam mein gunjti thi na-jaane kaise koi kisi se bichhaD gayaa thaa ajiib hairat bikherte the vo daastaan-go ki shab ne jaane se saaf inkaar kar diyaa thaa guzishtagaan ko bhi ye gila thaa sunaa hai main ne sunaa hai un ko bhi ism-e-aazam nahin milaa thaa fazaa sunahri thi rang phailaa thaa chaar jaanib ki chaand se vo zamin pe jaise utar rahaa thaa safar ke aakhir pe shamein raushan si ho gai thiin koi masarrat ki sab hadon se guzar gayaa thaa"

"vo dhuup vo galiyaan vahi uljhan nazar aae is shahr se us shahr kaa aangan nazar aae is gham ke ujaale mein jo ik shakhs khaDaa hai vo duur se mujh ko miraa saajan nazar aae ik hijr ke shoale mein kai baar jale ham is aas mein shaayad ki nayaa-pan nazar aae ye raat gae kaun hai is peD ke niche ik diip saa har shaakh pe raushan nazar aae vo baat kaho jis ko tarasti rahe duniyaa vo harf likho jis mein koi fan nazar aae"

"raah mein shahr-e-tarab yaad aayaa jo bhulaayaa thaa vo sab yaad aayaa jaane ab subh kaa aalam kyaa ho aaj vo aakhir-e-shab yaad aayaa ham pe guzraa hai vo lamha ik din kuchh nahin yaad thaa rab yaad aayaa jab nahin umr to vo phuul khilaa kab kaa bachhDaa huaa kab yaad aayaa raqs karne lagi taaron bhari shab tu bhi is raat ajab yaad aayaa kitnaa iqraar chhupaa thaa is mein tere inkaar kaa Dhab yaad aayaa hosh uDne lage 'naasir' ki tarah aaj vo yaar ghazab yaad aayaa"

"asir-e-shaam hain Dhalte dikhaai dete hain ye log niind mein chalte dikhaai dete hain vo ik makaan ki us mein koi nahin rahtaa magar charaagh se jalte dikhaai dete hain ye kaisaa rang nazar aayaa us ki aankhon mein ki saare rang badalte dikhaai dete hain vo kaun log hain jo tishnagi ki shiddat se kanaar-e-aab pighalte dikhaai dete hain andheri raat mein bhi shahr ke darichon se hamein to chaand nikalte dikhaai dete hain"

"mire dhyaan mein hai ik mahal kahin chaubaaron kaa vahaan jaaun kaise rasta hai angaaron kaa vahaan hariyaali ke kunj mein ek baseraa hai vahaan dariyaa bahtaa rahtaa hai mahkaaron kaa tum dil kaa daricha khol ke baahar dekho to amboh guzarne vaalaa hai dil-daaron kaa miri khalvat ko ye insaanon kaa jangal hai miri vahshat ko ye sahraa hai divaaron kaa ik piile rang ki dhund jami hai chehron par koi aa ke dekhe haal tire bimaaron kaa ham qarya qarya mulkon mulkon phirte hain duniyaa mein koi des nahin banjaaron kaa khvaab ki daulat chain se sone vaalon ki taare ginnaa kaam hai ham bedaaron kaa"

"us jangal se jab guzroge to ek shivaala aaegaa vahaan ruk jaanaa vahaan rah jaanaa vahaan sukh kaa ujaalaa aaegaa ye soch ke uThnaa har din tum is dil kaa phuul khilegaa zarur is aas pe sonaa ab ki shab koi khvaab niraalaa aaegaa jab us ke haath nayaa maazi is safha-e-arz pe likkheinge jab sahar o shaam raqam honge tab meraa havaala aaegaa is be-andesha sahraa mein is unghne vaali ummat par kab jaagne vaalaa utregaa kab sochne vaalaa aaegaa phir ruhein zakhmi zakhmi hain phir koDh se dukhne aae badan yuun lagtaa hai ki shafaaat ko phir koi gvaalaa aaegaa ai raah-e-sukhan ke raah-ravo dil-shaad raho is raah mein bhi khushbu ki savaari Thahregi rangon kaa piyaala aaegaa"

"raftagaan ki sadaa nahin main huun ye tiraa vaahima nahin main huun tere maazi ke saath dafn kahin meraa ik vaaqi'a nahin main huun kyaa milaa intihaa-pasandi se kyaa main tere sivaa nahin main huun ek muddat mein jaa ke mujh pe khulaa chaand hasrat-zada nahin main huun us ne mujh ko muhaal jaan liyaa main ye kahtaa rahaa nahin main huun main hi 'ujlat mein aa gayaa thaa idhar ye zamaana nayaa nahin main huun meri vahshat se Dar gae shaayad yaar baad-e-fanaa nahin main huun main tire saath rah gayaa huun kahin vaqt Thahraa huaa nahin main huun gaahe gaahe sukhan zaruri hai saamne aaina nahin main huun sarsari kyuun guzartaa hai mujh se ye miraa maajraa nahin main huun us ne puchhaa kahaan gayaa vo shakhs kyaa bataataa ki thaa nahin main huun ye kise dekhtaa hai mujh se udhar tere aage khalaa nahin main huun"

"phir khuun mein vahshat raqsaan hai tajdid sitam karne ke liye ik taaza zakhm ki khvaahish hai ik sadma kam karne ke liye ham din-bhar duniyaa-daari mein hans hans ke baatein karte hain phir saari raat pighalte hain ik ashk raqam karne ke liye vo vasl ki jis ne ham donon ko yaksar be-buniyaad kiyaa ab fursat hai aa mil baiThein us vasl kaa gham karne ke liye ik kaari zakhm ki chaahat ne kyaa kyaa na hamein gulzaar kiyaa ham kis kis se mansub hue ik hijr baham karne ke liye insaan ke jiine marne ke majburi ke mukhtaari ke ye saare khel zaruri hain taamir adam karne ke liye"

"nahin piitaa main par navaazish hui hai baDi mausamon ki sifaarish hui hai bahut din se sahraa ke jaisaa ye dil hai na baadal ghire hain na baarish hui hai yahaan hai bulandi jo kirdaar ki to vahaan khaal-o-khad ki numaaish hui hai tiri jhiil jaisi jo dekhi hain aankhein miri Duub jaane ki khvaahish hui hai chhalaktaa nahin khuun zakhmon se aise kahin naakhunon ki bhi kaavish hui hai hamein 'ishq mein mubtalaa kar rahe hain nazar aur dil mein ye saazish hui hai vahaan dushmanon ki baDi yaad aai jahaan doston ki navaazish hui hai vafaa-daariyon kaa sila mil rahaa hai hamaari sadaa aazmaaish hui hai pareshaaniyon mein jo ham mubtalaa hain yaqinan koi ham se laghzish hui hai vahin apni aankhon ko ham chhoD aae jahaan manzaron ki numaaish hui hai raqibon ko hai chhuT mahfil mein un ki mire aane jaane pe bandish hui hai ghazal kahnaa 'faaruq' main chhoD dungaa isi baat par un se ranjish hui hai"

"jab se aayaa huun tere gaanv mein rang hi rang hain fazaaon mein aa ki dukh sukh ki koi baat karein baiTh kar shishamon ki chhaanv mein main bhi kartaa huun zabt ki koshish to bhi takhfif kar adaaon mein vo tiraa dafatan bichhaD jaanaa vo miraa dekhnaa khalaaon mein ho agar koi gosh-bar-aavaaz ik khamoshi bhi hai sadaaon mein yahi mere liye ghanimat hai saans le luun khuli fazaaon mein"

"bas ki ik lams ki ummid pe vaare hue hain so tire saamne ye khaak pasaare hue hain jaane kab un ko bujhaa baiThe koi baad-e-alam sar-e-mizhgaan-e-tamannaa jo sitaare hue hain zindagi tu bhi hamein vaise hi ik roz guzaar jis tarah ham tujhe barson se guzaare hue hain nit-nae naqsh karein us pe aziyyat ke raqam aa ki ham takhti-e-dil apni pachaare hue hain kab kuchal jaaein kisi paanv se ham barg-e-vajud vaqt ki dhuup mein vaise hi karaare hue hain jaante hain ki tu hi ishq-badan ko hai libaas ham tiraa ruup jo aashuftagi dhaare hue hain apni jurat ki sataaish ho ki ham chob-mizaaj rabt rakhte hain sadaa un se jo aare hue hain"

"phir bahaar aai hai phir josh mein saudaa hogaa zakhm-e-derinaa se phir khuun Tapaktaa hogaa biiti baaton ke vo naasur hare phir honge baat niklegi to phir baat ko rakhnaa hogaa yurishein kar ke umanD aaeingi suuni shaamein laakh bhaTkein kisi unvaan na saveraa hogaa ji ko samjhaaeinge matvaali havaa ke jhonke phir koi laakh sambhaale na sambhalnaa hogaa kaisi rut aai havaa chalti hai ji Doltaa hai ab to hansnaa bhi taDapne kaa bahaanaa hogaa TuuT jaaegaa ye laachaari-e-daaem kaa fusun aur is tarah ki jaise koi aataa hogaa dil dhaDakne ki sadaa aaegi sune-pan mein duur baadal kahin parbat pe garajtaa hogaa"