raat se din kaa vo jo rishta thi — Dinesh Naaidu

"zamaane Thiik hai in se bahut hue raushan magar charaagh kahaan khud ko kar sake raushan sabhi ke zehn mein us kaa khayaal rahtaa hai us ek nuur se hai kitne aaine raushan abhi to ham ko kai roz jagmagaanaa hai hamin hai dasht mein ik aakhiri diye raushan mahak usi ki miri rahnumaai karti hai usi ki chaap se hote hain raaste raushan ham ek umr se taarikiyon mein simTe the jab us ne chhu liyaa to ham bhi ho gae raushan kisi kaa aks mujhe khvaab mein dikhaa thaa kabhi tamaam umr rahe mere rat-jage raushan ye aadhi raat ko dastak si kis ne di dil par ye kis ne kar diye har samt qumqume raushan ham ek rukh se andhere mein aa gae lekin kai rukhon se hamaare hain silsile raushan chalo 'dinesh' ab is dil se un kaa nuur gayaa talaashte hain ilaaqe bache-khuche raushan"

"Daraa rahe hain ye manzar bhi ab to ghar ke mujhe dikhaai khvaab diye raat bhar khanDar ke mujhe har ik ghazal mein main rozaana chaand Taanktaa huun sitaare chumte hain shab utar utar ke mujhe ganvaa di umr use nazm kar nahin paayaa saliqe aate hain vaise to har hunar ke mujhe is ek shauq ne mujh ko miTaa diyaa yaaro bas ek baar kabhi dekhnaa thaa mar ke mujhe kinaare baiTh ke kartaa huun nazm ashkon ko nadi sunaati hai afsaane chashm-e-tar ke mujhe main ik adhuri si tasvir thaa udaasi ki kiyaa hai us ne mukammal tabaah kar ke mujhe"

"jo bhi nikle tiri aavaaz lagaataa nikle aise haalaat mein ab ghar se koi kyaa nikle us ke lahje mein saraabon ki ajab raunaq hai ain mumkin hai vo taptaa huaa sahraa nikle har taraf khvaab vahi khvaab vahi ik chehra ab kisi taur mere ghar se ye malba nikle dasht vaalon ko bataao ki yahaan main bhi huun kyaa pata mujh se hi un kaa koi rasta nikle bas isi aas mein baiThaa huun sar-e-sahraa main koi baadal mujhe aavaaz lagaataa nikle kaash aisaa ho tere shahr mein pyaasaa aauun aur tire qadmon se ho kar koi dariyaa nikle raqs karte the tire haathon pe kitne aalam ab to aankhon se miri rang hinaa kaa nikle tere hone pe bhi ik Dar saa lagaa rahtaa hai kaise is ji se tire hijr kaa dhaDkaa nikle"

"mujh mein aabaad saraabon kaa ilaaqa karne phir chali aai tiri yaad ujaalaa karne din miraa phir bhi kisi taur guzar jaaegaa raat aaegi udaasi ko kushaada karne aur be-vaqt chalaa aataa hai saavan mujh mein ek guzre hue mausam kaa taqaazaa karne main ne jalte hue sahraa mein tiraa naam liyaa saaebaan khud hi chalaa aaya hai saaya karne kaisaa laavaa hai tah-e-aab yahaan aankhon mein kaun aaya hai samundar ko jazira karne"

"miraa ye malba miraa kharaaba tumhaari yaadon se laD rahaa hai usi ki taamir ho rahi hai vo ek ghar jo nahin bachaa hai paDe hue hain jali-bujhi cigareton ke TukDe har ik jagah par aur ek chehra shagufta chehra tamaam ghar mein basaa huaa hai lagaa rahi hai mujhe sadaa-e-havaa dariche se laDte laDte miraa ye kamra khamosh kamra kisi ki aahaT se bhar gayaa hai kahin se saaye bhi aa gae hain mujhe sunaane kahaani apni koi fasaana bhi dhire dhire buland manzar se ho rahaa hai bulaa rahin hain mujhe dobaara udaasiyon ki hasin vaadi kisi ki yaadon kaa sabz-mausam abhi bhi taaza banaa huaa hai jo rang-roghan bikhar rahe hain tamaam ghar mein ataa hai us ki bas ek aamad se us ki viraan khanDar saa ye ghar bhi ji uThaa hai"

"chaak par miTTi ko mar jaanaa hai khvaab-e-taamir bikhar jaanaa hai ham ko us dasht mein jaanaa hogaa vahshaton kaa yahi harjaanaa hai saahibo ham hain usi saf ke log jin se sahraa ko sanvar jaanaa hai saamne hashr ki had hai saahab ab hamein lauT ke ghar jaanaa hai qabr-gaah hain sadaaon ki yahaan bas yahin ham ko bhi mar jaanaa hai tum ko khone kaa tumhein paane kaa ham ne har qism kaa Dar jaanaa hai koi bhi raah nahin hai us tak ham ko maalum hai par jaanaa hai lo nazar aane lagaa us kaa hashr qaafile vaalo Thahar jaanaa hai kis liye tairnaa ashkon mein sadaa ab tah-e-dida-e-tar jaanaa hai vo 'dinesh' us ki gali hai aage dekh lo tum ko kidhar jaanaa hai"

"vo mujhe zindagi bataataa hai phir bhalaa kyon nazar churaataa hai main usi ko uThaa rahaa thaa par vo mujhe hi faqat giraataa hai yaad us ko kiyaa yahaan main ne par mujhe vo vahaan bhulaataa hai raaz saare bataa diye main ne kyon magar raaz vo chhupaataa hai log masruf hain mohabbat mein aur vo dil miraa dukhaataa hai"

"zindagi bojhal hui aazaar se jism jhuktaa jaa rahaa hai baar se doston ne is qadar dhoke diye aur raghbat baDh gai aghyaar se zindagi kaa ik nayaa imkaan huaa ik daricha khul gayaa divaar se ab bayaan kaise karun rudaad-e-gham kaam mushkil hai dil-e-naa-chaar se hijr ki raaton mein bahtaa hi rahaa ek naala chashm-e-dariyaa-baar se misl-e-majnun regzaaron mein rahe sar paTakte ret ki divaar se ham asiraan-e-mohabbat hain yahaan uljhe hain ab gesu-e-khamdaar se 'qalb' teri ghazlein yuun shaadaan karein dard nikle hai tire ashaar se"

"tere tasavvuraat se aage nahin gayaa ye dil tavahhumaat se aage nahin gayaa jo biich raah chhoD gayaa shukr hai vo shakhs meri tavaqqu'aat se aage nahin gayaa shaayad use pasand thiin jhuTi numaaishein lekin main dil ki baat se aage nahin gayaa jazbaat-e-dil ko vo bhi na kuchh Dhang de sakaa main bhi takallufaat se aage nahin gayaa tohfa bhi us ke vaaste kangan liyaa 'zarim' vallah main us ke haath se aage nahin gayaa"

"taavil-e-ahd-e-fan hi to vahshat kaa hal nahin pesh-e-nazar junun hai yaaro ghazal nahin ab is ke baad ahd ki taarik raat hai ye ikhtitaam-e-shaam hai subh-e-azal nahin ai dost ishq mansab-e-fahm-o-shuur hai ye irtiqaa hai zehn kaa koi khalal nahin ik umr ratjagon ki aziyyat mein kaaT di ab mere khvaab niind kaa radd-e-amal nahin kyaa kyaa ataa-e-neamat-e-rabb-e-karim hai lekin 'samir' dard kaa nemul-badal nahin"

"na koi dost ho meraa na ho adu meraa tum apne munh se agar kah do mujh ko tu meraa fasurdagi mein junun-e-havaa-e-gul yaani khizaan ke daur mein saudaa-e-rang-o-bu meraa jo tum nahin to bahaar-e-jinaan mein khaak nahin bahut vasia hai daamaan-e-aarzu meraa nibhegi ai dil-e-aavaara ab na tujh se miri bas aaj se na main teraa huun aur na tu meraa banaa rahe hain vo jalve ki apne tasvirein dikhaa dikhaa ke tamaashaa-e-rang-o-bu meraa kisi ki zulf-e-siyah kah rahi hai khul khul kar ghaTaa ne rang uDaayaa hai hu-ba-hu meraa mah-e-siyaam kaa aur intizaam kyaa karte janaab-e-shaikh uDaa le gae subu meraa jafaa kaa rang judaa hai vafaa kaa rang judaa malo na dast-e-hinaai mein tum lahu meraa taDap rahi hai jo abr-e-siyaah mein bijli firaaq mein yahi naqsha thaa hu-ba-hu meraa suhaani raat hai chhiTki hai chaandni 'muztar' miri nigaah mein phirtaa hai maah-ru meraa"

"kyaa manzil-e-gham simaT gai hai ik aah mein raah kaT gai hai phir saamne hai pahaaD si raat phir shaam se niind uchaT gai hai pahlu mein ye kaisaa dard uThaa hai ye kaun si raah kaT gai hai aap aae nahin to maut kambakht aa aa ke palaT palaT gai hai uTh uTh ke mariz-e-gham ne puchhaa kyaa hijr ki raat kaT gai hai phir 'saif' havaa-e-yaad-e-rafta har gham ki naqaab ulaT gai hai"