shahr-e-taarik ke jalte hue manzar dekho — Ashu Mishra

"tujh ko andaaze nahin raah ki dushvaari ke ham to qaail hain tiri qaafila-saalaari ke ye tire saath mein rone se khulaa hai mujh par hain tiri aankh mein sab ashk adaakaari ke bevafaai bhi agar ki to bataayaa us ko main ne aadaab nibhaae hain vafaadaari ke jashn main ne bhi manaayaa thaa shajar kaTne kaa us ne vo faaede ginvaae mujhe aari ke dasht kaa dasht jin aankhon pe luTaa baiThaa thaa ham bhi pichhe the usi aahu-e-taataari ke ab mujhe yaad nahin pairahan-e-ishq-o-vafaa haan magar naqsh tire vasl ki gul-kaari ke"

"ek patthar rakh liyaa hai sina-e-sad-chaak par zabt kaa pahra lagaayaa dida-e-namnaak par kaun hai jis par nahin khultaa miraa dast-e-hunar kis ki miTTi ek muddat se rakhi hai chaak par chaar din mein hi haqiqat ki zamin par aa giraa chaar din mein bhi uDaa thaa ishq ke aflaak par ye khizaan peDon se patte dil se khushiyaan le gai zor kuchh bhi chal na paayaa mausam-e-saffaak par saanehe paDte raheinge sach ke raste mein hazaar ungliyaan uThti raheingi lahja-e-bebaak par jo bhi aayaa vo tiri aankhon kaa ho ke rah gayaa ye bhanvar ab tak na khul paae kisi tairaak par"

"ek patjhaD saa hai lagaa mujh mein phir koi gul nahin khilaa mujh mein zabt mein mubtalaa miri aankhein ek dariyaa saa sukhtaa mujh mein ghar ki khiDki se jhonkne vaalaa meri aankhon se jhaanktaa mujh mein dil-shikasta mein bhar gai silan koi shiddat se ro rahaa mujh mein teri yaadein bhi kar gaiin hijrat ab to kuchh bhi nahin bachaa mujh mein"

"us ki qurbat mein huaa hai ye khasaaraa meraa aap paDh lijiye har aankh mein qissa meraa har nai saans pe bantaa huun bigaD jaataa huun ye havaa khatm hi kar de na tamaasha meraa ab to honTon pe kabhi phuul bhi khil jaate hain aap ne in dinon dekhaa nahin chehra meraa main ne ro ro ke use ghair kaa hone na diyaa us balaa-khez ko zanjir thaa girya meraa ab nae dasht mujhe dekh ke Dar jaate hain meri vahshat ne baDhaa rakkhaa hai rutba meraa"

"aise khulte hain falak par ye sitaare shab ke jis tarah phuul hon saare ye bahaar-e-shab ke teri tasvir banaa kar tiri zulfon ke liye ham ne kaaghaz pe kai rang utaare shab ke vo musavvir jo banaataa hai sahar kaa chehra us se kahnaa ki abhi dard ubhaare shab ke kyaa kisi shakhs ki hijrat mein jali hain raatein kyuun sharaaron se chamakte hain sitaare shab ke ye tire hijr ne tohfe mein diye hain ham ko ye jo maasum se rishte hain hamaare shab ke ek muddat se hamein niind na aai 'aashu' umr ik kaaT di ham ne bhi sahaare shab ke"

"laakhon ki bhiiD mein bhi koi ham-nafas na ho allaah teri khalq kaa matlab qafas na ho rang-e-jamaal-e-ishq se kunachi bhari ho par tasvir khinchne ke liye canvas na ho kahiye ki kaise dil lage aisi jagah jahaan baatein to be-hisaab hon baaton mein ras na ho main ishq kar rahaa huun magar sochtaa bhi huun pichhle baras jo ho chukaa ab ke baras na ho hairat hai ek umr ki baarish ke baavajud aankhon mein koi shakl hai jo Tas se mas na ho 'mishraa' ji aise shakhs se rahte hain dur-dur jis mein ki rang-e-ishq ho rang-e-havas na ho"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"kyaa apne shahr mein koi aisaa makaan hai samjhun jise ki asl mein vo ik jahaan hai DhunDo haqiqat is mein na afsaana hi koi is kaa bayaan kuchh nahin us kaa bayaan hai apnaa shi'aar ab hai faqat amn-dushmani ye aur baat faakhta apnaa nishaan hai likhne ko ek harf na kahne ko ek lafz yuun to qalam hai haath mein munh mein zabaan hai vo lams jis ke baa'd zamaane guzar gae vo lams ab bhi taaza hai ab bhi javaan hai ho jaaegaa yaqin sabhon kaa hi kal jo aaj meraa yaqin aur sabhon kaa gumaan hai shatranj ki bisaat ki thi apni mez par shatranj ki bisaat ki saaraa jahaan hai"

"charaaghon se kuchh to churaayaa gayaa hai jo thi aag us ko bujhaayaa gayaa hai likhaa thaa jinhein sirf apne lahu se mire un khaton ko jalaayaa gayaa hai hazaaron daf'a us ne ki bevafaai mujhe bevafaa kyon bataayaa gayaa hai mujhe khud nikalnaa paDaa apne ghar se ye mat sochnaa ki bhagaayaa gayaa hai khabar ye mili hai ki mere hi ghar mein kisi ghair ko ab basaayaa gayaa hai mujhe hi sataa kar mujhe hi rulaa kar ye ilzaam mujh par lagaayaa gayaa hai tumhein kyaa bataaun mohabbat mein 'raavat' mujhe kis qadar aazmaayaa gayaa hai"

"bahr-e-rang-e-daastaan rahne diyaa ik tajassus darmiyaan rahne diyaa ab zamin ban kar bichhaa jaataa hai vo main ne jis ko aasmaan rahne diyaa raushni aur khvaab saare hech the apni aankhon mein dhuaan rahne diyaa vo jagah raushan nahin hogi kabhi is mohabbat ko jahaan rahne diyaa maan ne maathaa chuum kar rukhsat kiyaa maamtaa kaa saaebaan rahne diyaa kul milaa ke ye hai raaz-e-tishnagi ham ne dil ko sargiraan rahne diyaa khud hami paamaal Thahre shauq se khush-gumaan ko khush-gumaan rahne diyaa"

"tere tasavvuraat se aage nahin gayaa ye dil tavahhumaat se aage nahin gayaa jo biich raah chhoD gayaa shukr hai vo shakhs meri tavaqqu'aat se aage nahin gayaa shaayad use pasand thiin jhuTi numaaishein lekin main dil ki baat se aage nahin gayaa jazbaat-e-dil ko vo bhi na kuchh Dhang de sakaa main bhi takallufaat se aage nahin gayaa tohfa bhi us ke vaaste kangan liyaa 'zarim' vallah main us ke haath se aage nahin gayaa"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"