us kaa chehra bhi chamak mein na misaali niklaa — Gulzar Bukhari

"aaine kaa munh bhi hairat se khulaa rah jaaegaa jo bhi dekhegaa tujhe vo dekhtaa rah jaaegaa ham ne sab kuchh taj diyaa teri rifaaqat ke liye tujh se bichhDe to hamaare paas kyaa rah jaaegaa mil sakeinge kis tarah khvaabon mein ham jab hijr se niind ho jaaegi rukhsat ratjagaa rah jaaegaa ham agar teri razaa haasil nahin kar paaeinge 'umr bhar ham se hamaaraa dil khafaa rah jaaegaa jaane vaalon ki kami puuri kabhi hoti nahin aane vaale aaeinge phir bhi khalaa rah jaaegaa murtaish aavaaz ki lahrein raheingi der tak saaz chup ho jaaeinge sail-e-sadaa rah jaaegaa 'hir' ko 'gulzaar' le jaaeinge kheDe ek din baansuri par tu dhunein hi chheDtaa rah jaaegaa"

"aks-e-raushan tiraa aaina-e-jaan mein rakkhaa ham ne tasvir ko hairat ke jahaan mein rakkhaa kaun maayus tiri bazm-e-inaayat se uThaa tere ikraam ne kis kis ko gumaan mein rakkhaa koi madhosh na ho saaat-e-gul-bosi mein us ne yuun phuul ko kaanTon ki amaan mein rakkhaa vo samajhtaa thaa ki hain sach ke kharidaar bahut rah gayaa maal sabhi us ki dukaan mein rakkhaa yaad ham aa na sake jashn-e-bahaaraan mein use ham-safar jis ne hamein ahd-e-khizaan mein rakkhaa ik parinda bhi nahin peD pe baaqi 'gulzaar' tiir sayyaad ne kis vaqt kamaan mein rakkhaa"

"charaagh mehmaan hain raat bhar ke makaan munavvar nahin rahegaa ise basaa lo dil-o-nazar mein ki phir ye manzar nahin rahegaa zakhira-e-aab par hai daar-o-madaar baarish ke mausamon kaa kahaan se aaeinge abr ghir kar agar samundar nahin rahegaa huaa hai us se miraa tasaadum to kyon use naa-tamaam chhoDun fasil raste ki TuuT jaaegi yaa miraa sar nahin rahegaa rahi jo tahsil-e-aab-o-daana ki shart khaana-ba-dosh honaa kisi parinde kaa aashiyaana chaman ke andar nahin rahegaa kisi kaa divaar par tasarruf koi huaa baam-o-dar pe qaabiz yahi makinon ki khu rahi to yaqin hai ghar nahin rahegaa isi se qaaem hai shaan us ki yahi hai 'gulzaar' aan us ki rahegi kyaa aabru sadaf ki jo us mein gauhar nahin rahegaa"

"tiri umidon kaa saath degi inaayat-e-barg-o-baar kab tak bahaar hai mehrbaan tujh par magar rahegi bahaar kab tak jalaai tu ne agar na mashal koi charaagh aur DhunD leinge jinhein zarurat hai raushni ki kareinge vo intizaar kab tak khayaal-e-tausia o rifat-e-baam-o-dar ki khvaahish bajaa hai lekin makaan kaa bojh sah sakegi binaa-e-naa-paaedaar kab tak tujhe gumaan hai ki khvaab tere shikast se maavaraa hain shaayad tujhe bachaaegaa sang-baari se aainon kaa hisaar kab tak kabhi to gulzaar baarishon se chaman kaa maahaul saaf hogaa fazaa mein phailaaegaa kudurat havaa se uDtaa ghubaar kab tak"

"zulmaton ki sahar nahin aati aarzu koi bar nahin aati khud-nigar vo hain aur ham khuddaar bigDi banti nazar nahin aati nau-giraftaar-e-daam-e-ulfat hain aah bhi karni sar nahin aati mulk-o-millat bhi ho chuke nilaam ham ko ghairat magar nahin aati arsh se bekason ki aah kabhi lauT kar be-asar nahin aati aib-e-aghyaar par hai sab ki nazar apni surat nazar nahin aati vaqt ki tarah phir mire hamdam zindagi lauT kar nahin aati aadmi aadmi kaa shor bahut aadamiyyat nazar nahin aati muttahid hon jo apne begaane kyon vo surat nazar nahin aati haif 'gulzaar' mulk-o-millat mein ab nasim-e-sahar nahin aati"

"kitni sadiyaan naa-rasi ki intihaa mein kho gaiin be-jahat naslon ki aavaazein khalaa mein kho gaiin rang-o-bu kaa shauq aashob-e-havaa mein le gayaa titliyaan ghar se nikal kar ibtilaa mein kho gaiin kaun pas-manzar mein ujDe paikaron ko dekhtaa shahr ki nazrein libaas-e-khushnumaa mein kho gaiin muntazir chaukhaT pe taabiron ke shahzaade rahe khvaab ki shahzaadiyaan qasr-e-duaa mein kho gaiin saanp ne un ke nasheman mein baseraa kar liyaa peD se chiDiyon ki mahkaarein fazaa mein kho gaiin koi kyaa baab-e-amaan aafat-zadon par kholtaa dastakein gulzaar tufaan ki sadaa mein kho gaiin"

"tujh ko khiffat se bachaa luun paani tishnagi apni chhupaa luun paani khaak uDti hai har ik chehre par kis ki aankhon se nikaalun paani dhuup dariyaa pe nazar rakhti hai tujh ko kuuze mein chhupaa luun paani uDte phirte hain saron par baadal khvaab aankhon mein basaa luun paani roz bachchon ko sulaa duun yunhi roz patthar ko ubaalun paani aag se kheltaa hai kal mujh ko aa tujhe apnaa banaa luun paani khaarzaaron pe chalun nange paanv khushk dharti ki duaa luun paani sabr ki had bhi to kuchh hoti hai kitnaa palkon pe sambhaalun paani bhuul jaaun na kahin tairaaki kyuun na kashti hi jalaa luun paani apni vahshat kaa ik izhaar sahi kar ke sard aag jalaa luun paani zakhm ho phuul ho yaa angaara ho jo raushan to bulaa luun paani shart hai teri rifaaqat varna vaqt ki aag mein Daalun paani aag matlub-e-lab-e-tishna hai main tujhe kaise bulaa luun paani chashm-e-ahbaab jo ho khushk 'ataa' khuun ko apne banaa luun paani"

"ilaahi mahshar mein bahr-e-pursish jab ek darbaar aam hogaa miri baghal mein suraahi hogi zabaan par teraa naam hogaa nasib tujh ko nahin ye neamat to zahmat-e-tur kar gavaaraa yahaan to hote hain roz jalve kalim tujh ko kalaam hogaa nigah rahe aasmaan pe teri hai taair-e-arsh-aashiyaan tu nazar mein jis ki zamin hogi vahi giraftaar-e-daam hogaa qubul kar markaz-e-haqiqat tiraa makaan laa-makaan hai ai dil majaaz ke daaere mein aakar fuzul paaband-e-naam hogaa harim-e-kaaba-o-dair donon hain qaabil-e-ehtiraam lekin nazaaa-e-baaham ke hon na markaz to phir dili-ehtiraam hogaa tu nashsha-e-zohd kaa hai taalib tujhe kahaan vajd-e-jaavedaani jo rind-e-mast-e-mudaam hogaa vo raazdaar-e-davaam hogaa shuur kahte hain jis ko aaqil vo roz mehvar badal rahaa hai jo aa gayaa jaada-e-junun mein sukun mein us kaa qiyaam hogaa na hongi hal mushkilaat 'aiman' fuzul sab koshishein hain teri khudaa se imdaad ki duaa kar baghair is ke na kaam hogaa"

"dam-ba-khud meri anaa teri adaa bhi dam-ba-khud tere pahlu mein rahaa main aur rahaa bhi dam-ba-khud dekhiye pahle lahu Tapke ki phailein kirchiyaan dam-ba-khud teri nazar bhi aaina bhi dam-ba-khud itnaa sannaaTaa ki jaise avvalin shaam-e-firaaq dam-ba-khud hai aasmaan bhi aur havaa bhi dam-ba-khud yaad hai tujh ko vo pahle lams ki hiddat ki jab rah gai thi dafatan teri hayaa bhi dam-ba-khud ek se aalam mein donon mukhtalif asbaab se dam-ba-khud teraa karam meri duaa bhi dam-ba-khud aisaa lagtaa hai ki donon se nahin nisbat mujhe dam-ba-khud umr-e-ravaan sail-e-fanaa bhi dam-ba-khud khauf-e-tajdid-e-taaluq darmiyaan haail rahaa dam-ba-khud teraa sitam meraa galaa bhi dam-ba-khud yuun gumaan hotaa hai donon ki tavaqqoa ek thi dam-ba-khud teri vafaa meri sazaa bhi dam-ba-khud jab khule meri haqiqat tum vo manzar dekhnaa dam-ba-khud naa-aashnaa bhi aashnaa bhi dam-ba-khud"

"yaar ke bhes mein mahbub sitamgar niklaa phuul ham jis ko samajhte the vo patthar niklaa ek roTi ke evaz de gayaa jannat ki duaa mere kuche kaa bhikaari bhi mukhayyar niklaa aaj-kal aankh kaa dekhaa bhi ghalat hotaa hai jis ko samjhe the apaahij vo tavangar niklaa vaqt kamzor ko shah-zor banaa detaa hai shaam ko Duubaa magar subh mein khaavar niklaa ghar badalne se bhi taqdir badal jaati hai siip mein paani paDaa ban ke vo gauhar niklaa jo mire zehn-o-takhayyul mein bahut unchaa thaa us kaa qad taalib-e-duniyaa ke baraabar niklaa jis ke zimme thi mire ghar ki hifaazat 'muztar' dushmanon kaa mire vo shakhs bhi ham-sar niklaa"

"khauf dil mein na tire dar ke gadaa ne rakkhaa din ko kashkol bharaa shab ko sirhaane rakkhaa fikr-e-meaar-e-sukhan baais-e-aazaar hui tang rakkhaa to hamein apni qabaa ne rakkhaa raat fōtpath pe din bhar ki thakan kaam aai us kaa bistar bhi kyaa sar pe bhi taane rakkhaa khauf aayaa nahin saanpon ke ghane jangal mein mujh ko mahfuz miri maan ki duaa ne rakkhaa ye alag baat samundar pe vo barsi 'saajid' aur kisi khet ko pyaasaa na ghaTaa ne rakkhaa"

"dard kab dil mein mehrbaan na rahaa haan magar qaabil-e-bayaan na rahaa ham jo gulshan mein the bahaar na thi jab bahaar aai aashiyaan na rahaa gham garaan jab na thaa garaan thaa mujhe jab garaan ho gayaa garaan na rahaa doston kaa karam maaaz-allaah shikva-e-jaur-e-dushmanaan na rahaa bijliyon ko duaaein detaa huun dosh par baar-e-aashiyaan na rahaa"