vaqt se pahle darakhton pe samar aane lage — Alam Khursheed

"kuchh chamaktaa saa tah-e-aab nazar to aae Dubne ke liye girdaab nazar to aae koi taabir ki surat bhi nikal aaegi niind to aae kabhi khvaab nazar to aae band kamre ki fazaa kis ko bhali lagti hai mere atraaf mein mahtaab nazar to aae do ghaDi Thahrun kahin main bhi zaraa dam le luun raah mein khitta-e-shaadaab nazar to aae main shikasta huun idhar tu bhi shikasta hai udhar jang mein koi zafar-yaab nazar to aae mushkilein gher ke baiThi hain miraa ghar 'aalam' ab zaraa halqa-e-ahbaab nazar to aae"

"hiraasaan huun siyaahi mein kami hoti nahin hai charaaghaan kar rahaa huun raushni hoti nahin hai bahut chaahaa ki aankhein band kar ke main bhi ji luun magar mujh se basar yuun zindagi hoti nahin hai lahu kaa ek ik qatra pilaataa jaa rahaa huun agarche khaak mein paidaa nami hoti nahin hai darichon ko khulaa rakhtaa huun main har-vaqt lekin havaa mein pahle jaisi taazgi hoti nahin hai main rishvat ke masaail par namaazein paDh na paayaa badi ke saath mujh se bandagi hoti nahin hai main apne ahd ki tasvir har-pal khinchtaa huun ghalat hai sochnaa ye shaairi hoti nahin hai buraa hai dushmani se aashnaa honaa bhi 'aalam' kisi se ab hamaari dosti hoti nahin hai"

"taariki mein zinda rahnaa ham ko nahin manzur jugnu saa taabinda rahnaa ham ko nahin manzur ik pal ko hi chamkein lekin bijli si lahraaein raakh tale paainda rahnaa ham ko nahin manzur naghma chheDein saaz bajaaein apne dil kaa ham mausam kaa saa zinda rahnaa ham ko nahin manzur ham aazaad parinde saari duniyaa apni hai khitte kaa baashinda rahnaa ham ko nahin manzur dast-o-garebaan haal se hain ham fardaa raushan ho maazi mein rakhshanda rahnaa ham ko nahin manzur dil ke vasile se hi ham ne sab kuchh paayaa hai aql tiraa kaarinda rahnaa ham ko nahin manzur"

"aur ik shahr hai kyaa shahr-e-gumaan se aage ham ko jaanaa hai bahut duur yahaan se aage gardish-e-paa kisi manzil pe Thaharti hi nahin dil magar baDhtaa nahin ku-e-butaan se aage gunjti rahti hain saahil ki sadaaein har-dam ham ne dekhaa hi nahin mauj-e-ravaan se aage muddaaa apnaa kisi shakhs pe zaahir na huaa koi jaataa hi nahin tarz-e-bayaan se aage zakhm qaael hon bhalaa chaaragari ke kaise saf-e-dushman hai saf-e-chaara-garaan se aage be-sabab ham se khafaa ho gai duniyaa 'aalam' ham ne likkhaa hai kahaan qissa-e-jaan se aage"

"hairaan ho rahaa huun basirat ke naam par main dekhtaa kuchh aur huun manzar kuchh aur hai mujh ko sitaara aur koi khinchtaa hai kyuun meraa ilaaqa aur hai mehvar kuchh aur hai patthar samajh rahaa hai zamaana to kyaa karun muTThi mein meri jab ki munavvar kuchh aur hai taasir-e-khaak aaegi alfaaz mein mire dil mein hai aur baat labon par kuchh aur hai 'aalam' mujhe bharosa nahin zaaichon pe ab is mein likhaa thaa aur mayassar kuchh aur hai"

"ab chhat pe koi chaand Tahaltaa hi nahin hai dil meraa magar pahlu badaltaa hi nahin hai kab se main yahaan but banaa baiThaa huun sar-e-raah but hai ki shivaale se nikaltaa hi nahin hai sone ki jagah roz badaltaa huun main lekin vo khvaab kisi tarah badaltaa hi nahin hai main khinchtaa rahtaa huun use dil se shab-o-roz vo tiir mire dil se nikaltaa hi nahin hai"

"vo mujhe zindagi bataataa hai phir bhalaa kyon nazar churaataa hai main usi ko uThaa rahaa thaa par vo mujhe hi faqat giraataa hai yaad us ko kiyaa yahaan main ne par mujhe vo vahaan bhulaataa hai raaz saare bataa diye main ne kyon magar raaz vo chhupaataa hai log masruf hain mohabbat mein aur vo dil miraa dukhaataa hai"

"zindagi bojhal hui aazaar se jism jhuktaa jaa rahaa hai baar se doston ne is qadar dhoke diye aur raghbat baDh gai aghyaar se zindagi kaa ik nayaa imkaan huaa ik daricha khul gayaa divaar se ab bayaan kaise karun rudaad-e-gham kaam mushkil hai dil-e-naa-chaar se hijr ki raaton mein bahtaa hi rahaa ek naala chashm-e-dariyaa-baar se misl-e-majnun regzaaron mein rahe sar paTakte ret ki divaar se ham asiraan-e-mohabbat hain yahaan uljhe hain ab gesu-e-khamdaar se 'qalb' teri ghazlein yuun shaadaan karein dard nikle hai tire ashaar se"

"tere tasavvuraat se aage nahin gayaa ye dil tavahhumaat se aage nahin gayaa jo biich raah chhoD gayaa shukr hai vo shakhs meri tavaqqu'aat se aage nahin gayaa shaayad use pasand thiin jhuTi numaaishein lekin main dil ki baat se aage nahin gayaa jazbaat-e-dil ko vo bhi na kuchh Dhang de sakaa main bhi takallufaat se aage nahin gayaa tohfa bhi us ke vaaste kangan liyaa 'zarim' vallah main us ke haath se aage nahin gayaa"

"taavil-e-ahd-e-fan hi to vahshat kaa hal nahin pesh-e-nazar junun hai yaaro ghazal nahin ab is ke baad ahd ki taarik raat hai ye ikhtitaam-e-shaam hai subh-e-azal nahin ai dost ishq mansab-e-fahm-o-shuur hai ye irtiqaa hai zehn kaa koi khalal nahin ik umr ratjagon ki aziyyat mein kaaT di ab mere khvaab niind kaa radd-e-amal nahin kyaa kyaa ataa-e-neamat-e-rabb-e-karim hai lekin 'samir' dard kaa nemul-badal nahin"

"na koi dost ho meraa na ho adu meraa tum apne munh se agar kah do mujh ko tu meraa fasurdagi mein junun-e-havaa-e-gul yaani khizaan ke daur mein saudaa-e-rang-o-bu meraa jo tum nahin to bahaar-e-jinaan mein khaak nahin bahut vasia hai daamaan-e-aarzu meraa nibhegi ai dil-e-aavaara ab na tujh se miri bas aaj se na main teraa huun aur na tu meraa banaa rahe hain vo jalve ki apne tasvirein dikhaa dikhaa ke tamaashaa-e-rang-o-bu meraa kisi ki zulf-e-siyah kah rahi hai khul khul kar ghaTaa ne rang uDaayaa hai hu-ba-hu meraa mah-e-siyaam kaa aur intizaam kyaa karte janaab-e-shaikh uDaa le gae subu meraa jafaa kaa rang judaa hai vafaa kaa rang judaa malo na dast-e-hinaai mein tum lahu meraa taDap rahi hai jo abr-e-siyaah mein bijli firaaq mein yahi naqsha thaa hu-ba-hu meraa suhaani raat hai chhiTki hai chaandni 'muztar' miri nigaah mein phirtaa hai maah-ru meraa"

"kyaa manzil-e-gham simaT gai hai ik aah mein raah kaT gai hai phir saamne hai pahaaD si raat phir shaam se niind uchaT gai hai pahlu mein ye kaisaa dard uThaa hai ye kaun si raah kaT gai hai aap aae nahin to maut kambakht aa aa ke palaT palaT gai hai uTh uTh ke mariz-e-gham ne puchhaa kyaa hijr ki raat kaT gai hai phir 'saif' havaa-e-yaad-e-rafta har gham ki naqaab ulaT gai hai"