Ghazal

"baghal mein ham ne raat ik ghairat-e-mahtaab dekhaa hai tumhin is khvaab ki taabir ho kyaa khvaab dekhaa hai taDap bijli ki bhi dekhi hai vo dil thaam lete hain tiri be-taabiyon ko bhi dil-e-betaab dekhaa hai vo ulfat dost hon naaseh duaa hi dil se nikli hai agar dushman ke ghar bhi majma-e-ahbaab dekhaa hai khudaa ke saamne ai mohtasib sach bolnaa hogaa mire saaghar mein mai dekhi hai yaa khun-naab dekhaa hai 'mubaarak' iztiraab-e-shauq kaa aalam nahin chhuptaa ki jab dekhaa hai ham ne aap ko betaab dekhaa hai"

"mere sar se kyaa gharaz sarkaar ko dekhiye apne dar-o-divaar ko ye ghaTaa aisi ghaTaa itni ghaTaa mai halaal aise mein hai mai-khvaar ko dhamkiyaan dete ho kyaa talvaar ki ham lagaate hain gale talvaar ko apni apni sab dikhaate hain bahaar gul bhi gulshan se chale baazaar ko taaq se miinaa utaar aai bahaar taaq par rakh shaikh istighfaar ko DhunDhtaa phirtaa hai ku-e-ghair mein dil 'mubaarak' ko 'mubaarak' yaar ko"

"naavak kahein sinaan kahein talvaar kyaa kahein tu hi bataa tujhe nigah-e-yaar kyaa kahein shikva na daam kaa hai na sayyaad kaa gila ham aap ho gae hain giraftaar kyaa kahein izhaar-e-haal-e-zaar kaa aison se faaeda aazaar dil kaa tujh se dil-aazaar kyaa kahein karte hain vaaiz aap mazammat sharaab ki kahte hain kyaa janaab ko mai-khvaar kyaa kahein aison se tark-e-mai kaa 'mubaarak' savaal kyaa tauba ki tujh se rind-e-qadah-khvaar kyaa kahein"

"mohabbat mein Thani aksar yahaan tak ki pahunche maarke tiir o kamaan tak chale naavak khinchi zaalim kamaan tak kahaan tak imtihaan aakhir kahaan tak chale jaate hain aavaaz-e-jaras par pahunch jaaeinge bichhDe kaarvaan tak havaa-e-shauq ke jhonke salaamat rahoge tum pas-e-parda kahaan tak na vo ayyaar mujh se puchhtaa hai na dil ki baat aati hai zabaan tak usi sar ko sar-e-shorida kahiye jo pahunche us ke sang-e-aastaan tak niyaaz o naaz ke charche raheinge hamaari aur tumhaari daastaan tak 'mubaarak' ko koi din aur sun lo bayaan kaa lutf hai us khush-bayaan tak"

"dekhe use har aankh kaa ye kaam nahin hai kuchh khel tamaashaa-e-lab-e-baam nahin hai main mo'tarif-e-jurm huun jo chaaho sazaa do ilzaam-e-tamannaa koi ilzaam nahin hai vo subh bhi hoti hai shab-e-taar se paidaa jis ko khatar-e-tirgi-e-shaam nahin hai jo dil hai vo labrez-e-tamannaa hai 'mubaarak' is jaam se achchhaa to koi jaam nahin hai"

"na laae taab-e-did ausaan vaale tire jalve bhi hain kyaa shaan vaale hazaaron mai-kade sar par liye hain ye baadal hain baDe saamaan vaale main un se apne armaan kah rahaa huun vo kahte hain baDe armaan vaale tiri kaafir-adaa ne kis ko chhoDaa kahin imaan se imaan vaale hasinon se 'mubaarak' dab ke milnaa ki hain vo aan vaale shaan vaale"

"haan ye badli kaali kaali jaaegi paak-baazon mein bhi Dhaali jaaegi tauba ki rindon mein gunjaaish kahaan jab ye aaegi nikaali jaaegi kuchh balaa-nosh aa gae bhaTTi mein shaikh teri botal aaj khaali jaaegi phuul kyaa Daaloge turbat par miri khaak bhi tum se na Daali jaaegi jaaiye ham apnaa bahlaa leinge dil dil-lagi koi nikaali jaaegi aae bhi to vo 'mubaarak' aae kyaa jaane ki tamhid Daali jaaegi"

"ishq ki chausar kis ne kheli ye to khel hamaare hain dil ki baazi maat hui to jaan ki baazi haare hain kaise kaise lakht-e-jigar hain kyaa kyaa dil ke paare hain aise laal kahaan duniyaa mein jaise laal hamaare hain is ko maaraa us ko maaraa ye bismil vo TuuT gayaa nok palak vaalon se Dariye qaatil un ke ishaare hain chhalni chhalni dil bhi jigar bhi rauzan rauzan siina bhi ek nigaah-e-naaz ne teri tiir hazaaron maare hain phunk rahaa hai soz-e-nihaani kaun is aag pe Daale paani dil ki lagi ne aag lagaa di daagh nahin angaare hain laala-rukhon mein umr gizaari dekhi un ki fasl-e-bahaar aaj bhi gul se gaalon vaale mujh ko 'mubaarak' pyaare hain"

"parde parde mein bahut mujh pe tire vaar chale saaf ab halq pe khanjar chale talvaar chale duri-e-manzil-e-maqsad koi ham se puchhe baiThe sau baar ham us raah mein sau baar chale kaun paamaal huaa us ki balaa dekhti hai dekhtaa apni hi jo shokhi-e-raftaar chale be-piye chaltaa hai yuun jhuum ke vo mast-e-shabaab jis tarah pi ke koi rind-e-qadah-khvaar chale chashm o abru ki ye saazish jigar o dil ko naved ek kaa tiir chale ek ki talvaar chale kuchh is andaaz se sayyaad ne aazaad kiyaa jo chale chhuT ke qafas se vo giraftaar chale jis ko rahnaa ho rahe qaidi-e-zindaan ho kar ham to ai ham-nafaso phaand ke divaar chale phir 'mubaarak' vahi ghanghor ghaTaaein aaiin jaanib-e-mai-kada phir rind-e-qadah-khvaar chale"

"chitvan jo qahr ki hai to tevar jalaal ke matlab ye hai ki rakh de kaleja nikaal ke vaaiz se bahs-e-baada-o-paimaana kyaa karun kuchh log rah gae hain puraane khayaal ke sau daagh jin ke laae hain zer-e-mazaar ham ehsaan jataa rahe hain vo do phuul Daal ke phir DhunDhtaa hai dil khalish-e-khaar-e-aarzu pachhtaa rahaa huun dil se ye kaanTaa nikaal ke ye gham-kada hai is mein 'mubaarak' khushi kahaan gham ko khushi banaa koi pahlu nikaal ke"

"jo paanch vaqt musalle pe qibla-ru nikle unhin buzurgon ke zer-e-baghal subu nikle baDaa maza ho but-e-kam-sukhan jo mahshar mein khudaa ke saamne haazir-javaab tu nikle vo go sunaa kiye lekin adaa ye kahti rahi na zikr-e-mehr-o-vafaa mere ru-ba-ru nikle kisi ko dair kisi ko haram mubaarak ho hamein vo dar ki jahaan dil ki aarzu nikle"

"sitam karo na karo ikhtiyaar baaqi hai jo ham nahin to hamaaraa mazaar baaqi hai gai bahaar magar apni be-khudi hai vahi samajh rahaa huun ki ab tak bahaar baaqi hai hazaar marhala-e-intizaar tai bhi hue hazaar marhala-e-intizaar baaqi hai shikast-e-tauba hai aisi savaab mein daakhil abhi se tauba 'mubaarak' bahaar baaqi hai"

"jabin par khaak hai ye kis ke dar ki balaaein le rahaa huun apne sar ki ubhar aai hain phir choTein jigar ki salaamat barchhiyaan tirchhi nazar ki qayaamat ki haqiqat jaantaa huun ye ik Thokar hai mere fitnagar ki kiyaa majbur aain-e-vafaa ne na karni thi vafaa tum se magar ki na maanoge na maanoge hamaari udhar ho jaaegi duniyaa idhar ki hui an-ban kisi se mujh pe barse balaaein mere sar dushman ke sar ki na tere husn-e-be-parvaa ki ghaayat na koi had mire zauq-e-nazar ki"

"ab kaun baat rah gai ye baat bhi gai yaani kabhi kabhi ki mulaaqaat bhi gai kahte hain vo ki jazba-e-dil ab fareb hai jab dil gayaa to dil ki karaamaat bhi gai jo kuchh kiyaa vo tu ne kiyaa iztiraab-e-shauq sau aafatein bhi aaiin miri baat bhi gai dastaar aap ki jo hui rehn-e-mai-kada tauba hamaari qibla-e-haajaat bhi gai vaade ki kaun raat qayaamat kaa din nahin aasaar-e-subh kahte hain ye raat bhi gai maanaa ki din sidhaare 'mubaarak' shabaab ke rangin tabiaton se mulaaqaat bhi gai"

"tamaashaai to hain tamaashaa nahin hai giraa hai vo parda ki uThtaa nahin hai ye kis ki nazar de gai rog yaa-rab sanbhaale se ab dil sanbhaltaa nahin hai taDap jaaiyegaa taDap jaaiyegaa taDapnaa hamaaraa tamaashaa nahin hai bahut phaans nikli bahut khaar nikle magar dil kaa kaanTaa nikaltaa nahin hai ye har shakhs ki lan-taraani hai kaisi ki har aankh to chashm-e-musaa nahin hai salaamat miri vahshat-e-dil salaamat kahaan meri vahshat kaa charchaa nahin hai miri jaan bhi hai ‘inaayat tumhaari ye dil bhi tumhaaraa hai meraa nahin hai bulaai gai un ki mahfil mein duniyaa magar ek meraa bulaavaa nahin hai zaraa aap samjhaaiye dil ko naaseh main samjhaa rahaa huun samajhtaa nahin hai tumhein dekhne ko tarasti hain aankhein bahut din hue tum ko dekhaa nahin hai"

"kyuun kiyaa karte hain aahein koi ham se puchhe kar gaiin kyaa vo nigaahein koi ham se puchhe le ke dil un ke mukarne ki adaa kyaa kahiye kyuun palaTti hain nigaahein koi ham se puchhe dost dushman ko banaanaa koi tum se sikhe dosti kaisi nibaahein koi ham se puchhe nichi nazrein kiye aate ho jahaan se samjhe jheinpti kyuun hain nigaahein koi ham se puchhe dil mein aane ke 'mubaarak' hain hazaaron raste ham bataaein use raahein koi ham se puchhe"

"phir mile ham un se phir yaari baDhi aur uljhaa dil giraftaari baDhi mehrbaani chaarasaazon ki baDhi jab baDhaa darmaan to bimaari baDhi hijr ki ghaDiyaan kaThin hoti gaiin din ke naale raat ki zaari baDhi phir tasavvur mein kisi ke niind uDi phir vahi raaton ki bedaari baDhi sakhtiyaan raah-e-mohabbat ki na puchh har qadam ik taaza dushvaari baDhi khair saaqi ki salaamat mai-kada jis qadar pi utni hushyaari baDhi daur-daure hain 'mubaarak' jaam ke intihaa ki apni mai-khvaari baDhi"

"dard-e-dil yaar rahaa dard se yaari na gai zindagi ham se to be-lutf gizaari na gai din ke naale na gae raat ki zaari na gai na gai dil se kabhi yaad tumhaari na gai ham to khun-gashta tamannaaon ke maatam mein rahe sina-kubi na gai sina-figaari na gai intizaar aap kaa kab lutf se khaali niklaa raaegaan raat kisi roz hamaari na gai bakhshvaayaa mujhe tum ne to khudaa ne bakhshaa na gai roz-e-jazaa baat tumhaari na gai log kahte hain badaltaa hai zamaana lekin din hamaaraa na gayaa raat hamaari na gai"

"jo nigaah-e-naaz kaa bismil nahin dil nahin vo dil nahin vo dil nahin botalein khaali gaiin zer-e-abaa aaj mai-khaane mein mai faazil nahin meri dushvaari hai dushvaari miri meri mushkil aap ki mushkil nahin kah rahi hai har adaa qaatil tumhein tum kahe jaao ki ham qaatil nahin bahki bahki hai 'mubaarak' baat baat khair to hai kyuun Thikaane dil nahin"

"aab-o-daana tiraa ai bulbul-e-zaar uThtaa hai fasl-e-gul jaati hai saamaan-e-bahaar uThtaa hai shaikh bhi muztarib-ul-haal pahunch jaataa hai jaanib-e-mai-kada jab abr-e-bahaar uThtaa hai marhabaa baar-e-amaanat ke uThaane vaale kyaa kaleja hai tumhaaraa ki ye baar uThtaa hai khaar-e-sahraa-e-mohabbat ki khaTak kyaa kahiye jab qadam uThtaa hai apnaa sar-e-khaar uThtaa hai du-e-aah-e-dil-e-sozaan hai 'mubaarak' apnaa jo dhuaan shama se balin-e-mazaar uThtaa hai"

"bad-zan hain ahl-e-kaaba mujh dair-aashnaa se kahte hain mujh ko kaafir fariyaad hai khudaa se bedaad mohtasib ki fariyaad hai khudaa se barse sharaab ghar ghar mai-khvaar ki duaa se chitvan badal rahi hai naam aa gayaa vafaa kaa tevar bigaD rahe hain afsaana-e-vafaa se ham kyuun tumhein bataaein ham kyuun tumhein jataaein roz-e-jazaa na jaane maangeinge kyaa khudaa se vo puchhte hain mujh se kaise ho tum 'mubaarak' main kah rahaa huun achchhaa sarkaar ki duaa se"

"begaana-e-vafaa tiraa sheva hi aur hai ahl-e-vafaa kaa taur-tariqa hi aur hai dair o haram ki raah mein rakhte nahin qadam ham rah-ravaan-e-shauq kaa rasta hi aur hai dil bevafaa ke haath na bechegaa baa-vafaa tum se nahin banegaa ye saudaa hi aur hai allaah dil na tum ko taDaptaa huaa dikhaae dekhaa na jaaegaa ye tamaashaa hi aur hai jalva-farosh aap hain main dil-farosh huun aison se kyaa banegaa ye saudaa hi aur hai TukDe hain dil jigar ke 'mubaarak' ki sher hain ghazlon kaa aap ki to safina hi aur hai"

"tum vaqt pe kar jaate ho paimaan faraamosh ye bhuul nahin hoti miri jaan faraamosh mehraab-e-ibaadat kham-e-abru hai buton kaa kar baiThe hain kaabe ko musalmaan faraamosh aabaad rahe shaad rahe yaad tumhaari mujh se nahin hone ki kisi aan faraamosh kab bhulte hain paanv mire dasht-navardi karte hain kahaan haath girebaan faraamosh"

"kahte hain ki de meri balaa daad kisi ki kaanon ko maza deti hai fariyaad kisi ki ronaa hai tiraa kaam magar dida-e-tar dekh tasvir-e-khyaali na ho barbaad kisi ki kartaa huun gila un se jo viraani-e-dil kaa kahte hain ye basti nahin aabaad kisi ki aabaad khudaa rakkhe tujhe ku-e-mohabbat miTTi nahin hoti yahaan barbaad kisi ki kuchh aur to ham paas 'mubaarak' nahin rakhte rakhtaa hai tamannaa dil-e-naashaad kisi ki"