Ghazal

"din-ba-din ghaTti hui umr pe naazil ho jaae ik badan aur miri ruuh ko haasil ho jaae morche kholtaa rahtaa huun samundar ke khilaaf jis ko miTnaa hai vo aae miraa saahil ho jaae khel hi khel mein chhu luun main kinaaraa apnaa aise souun ki jagaanaa mujhe mushkil ho jaae lag ke bimaar ke siine se na ronaa aise zindagaani ki tarah maut bhi mushkil ho jaae rakh rahe hain tire patthar mire zakhmon kaa hisaab ab ye majmaa bhi mire kashf kaa qaael ho jaae is qadar der na karnaa ki ye aaseb-nagar raat kaa ruup le aur jism mein daakhil ho jaae jang apnon se hai to dil ko kinaare kar luun raaste mein yahi talvaar na haael ho jaae"

"vo miTTi kaa sitaara hai hamaaraa tayammum par guzaara hai hamaaraa sukhan kaa husn baDh jaataa hai is se khamoshi isti'aara hai hamaaraa idhar koi mohabbat se na dekhe yahi ik dil bichaara hai hamaaraa hamein zinda kiyaa jaae to us par vahi daa'vaa dubaara hai hamaaraa kisi ki dakhl-andaazi nahin hai ye 'ishq aisaa idaara hai hamaaraa kai fir'aun hain ham-‘asr apne samajh liije ishaara hai hamaaraa"

"aaThon pahar kaa ye tiraa mazdur aa gayaa jannat ke dvaar khol miri huur aa gayaa paighambari kaa daa'vaa nahin 'aashiqi kaa hai patthar na maariye jo sar-e-tur aa gayaa sab ne suni jo raat ki lalkaar Dar gae siina thaa jis kaa nuur se maa'mur aa gayaa aaghosh us ki aisi puraani sharaab thi nashshe mein khvaahishon ke bahut duur aa gayaa basta uThaaiye ki ye maktab nahin hai vo basti badal gai nayaa dastur aa gayaa kyaa chaahiye ghulaam ko bas ik nazar ki bhiik shartein tamaam aap ki manzur aa gayaa"

"kaun us ko chaahtaa meri tarah vo bhi tanhaa ho gayaa meri tarah kah diyaa kis ne khudaa miltaa nahin DhunDhiye us kaa pata meri tarah TuTnaa hi thaa ta'alluq ek din hu-ba-hu vo shakhs thaa meri tarah us taraf jaane lage sab raaste shahr divaana huaa meri tarah muft mein kyon kijiye nindein kharaab haan agar vo jaagtaa meri tarah mil gayaa saaraa takabbur khaak mein miT gayaa meraa likhaa meri tarah"

"zamin hasb-e-zarurat ugaai jaati hai phir ek saanche mein khilqat banaai jaati hai khabar mein hain jo kai zar-kharid qissa-go hamein unhin ki kahaani sunaai jaati hai hamaari bazm mein jalte nahin charaagh ke saath yahaan charaagh ki dahshat jalaai jaati hai tamaam raat kaa jaagaa huun maa'zarat mire dost buraa na maan agar niind aai jaati hai hamaare jaam mein ilzaam ke sivaa nahin kuchh hamein sharaab ki tohmat pilaai jaati hai main khud se jang kaa e'laan karne vaalaa huun jo haari jaati nahin hai haraai jaati hai hamaare 'ahd kaa sarmaaya hain ye taalib-e-‘ilm inhein kitaab se nafrat sikhaai jaati hai zamin par hai tamaam andhe 'aashiqon kaa hujum yahaan vafaa bhi nahin aazmaai jaati hai ye kaise khvaab ki takmil mein lagaa hai jahaan ki zahr de ke mohabbat sulaai jaati hai"

"nahin ki tab koi kaaghaz qalam na hotaa thaa vo husn hi thaa qayaamat raqam na hotaa thaa har aadmi ko vahaan milti us ke kaam ki daad khudaa kaa naam khudaa ki qasam na hotaa thaa to kyaa sunaataa farishton ko main kalaam-e-jahaan kisi ki baaton mein pahlu-e-zam na hotaa thaa zaraa si pi thi kabhi jaahilon ke saath sharaab nasha thaa 'ilm kaa aisaa ki kam na hotaa thaa do ek baar to jiite bhi khel khel mein ham magar malaal zaraa besh-o-kam na hotaa thaa hamein hi marnaa paDaa apnaa haal likhne ko kisi kaa dard kisi se raqam na hotaa thaa bahaae jaataa thaa sailaab aansuon kaa hamein kisi ki aankh kaa konaa bhi nam na hotaa thaa"

"dusre naam se jiyaa jaae zahr shohrat hai kyon piyaa jaae haar maane pe vaar kyaa karnaa 'aql ko raasta diyaa jaae ye bhi mumkin hai mar miTein tum par ye bhi mumkin hai ji liyaa jaae aur kuchh zehn se nikaltaa nahin yaa'ni khud ko bhulaa diyaa jaae aaj yaum-e-shahaadat-e-haq hai aaj chup-chaap rah liyaa jaae jism ke jaagne kaa vaqt hai ye ab mujhe lauTne diyaa jaae khush-gumaani ke jal chuke baaghaat ab to qibla badal liyaa jaae"

"puchhtaa hai mujh se kyaa ho jaaun main ye ishaara hai fanaa ho jaaun main ek rak’at ki nahin koi namaaz tu 'ataa ho to adaa ho jaaun main imtihaan le luun main saazindon kaa kyaa gaate gaate be-suraa ho jaaun main tu kisi kaa hai magar hai to vahi kyaa pata phir mubtalaa ho jaaun main us ki pahli hi nazar hai kimiyaa dekh le to dusraa ho jaaun main soch lo achchhi tarah aisaa na ho intiqaaman baa-vafaa ho jaaun main"

"tez aandhiyon ke saath guzaaraa huaa miraa pahnaa zamin ne jism utaaraa huaa miraa dekh aasmaan tere sitaare kahin nahin lekin chamak rahaa hai sanvaaraa huaa miraa tum bhi palaT ke aaoge vahshi sadaa ke saath ruktaa hai kitni der pukaaraa huaa miraa ik qatl se nimaT ke bahut khush huaa thaa main phir mujh mein ji uThaa vahi maaraa huaa miraa tere sivaa yaqin ke laaiq koi nahin is e'timaad mein bhi khasaaraa huaa miraa muddat ke baa'd khud pe huaa apnaa ikhtiyaar jo kuchh jahaan mein thaa tumhaaraa huaa miraa"

"sabhi ko muskuraa kar maar Daalaa bache ham so Daraa kar maar Daalaa ye qabristaan us ki milkiyat hai nayaa naqsha dikhaa kar maar Daalaa mohabbat mein fanaa honaa nahin thaa kisi ne varghalaa kar maar Daalaa un aankhon kaa baDaa saudaa thaa ham ko hamein aankhein dikhaa kar maar Daalaa latife khuub khidmat-gaar ke the hamein to kal hansaa kar maar Daalaa bas ik majnun hi thaa madd-e-muqaabil use sahraa mein jaa kar maar Daalaa"

"saani nahin thaa us kaa koi baankpan mein raat angDaai le ke jaag uThi thi badan mein raat behuda raushni ki aziyyat thi shahr mein so ham ne tai kiyaa ki guzaareinge ban mein raat kal tum ne haal bhi nahin puchhaa gharib kaa kis tarh kaaTni paDi apne badan mein raat jis ne sabhi ko rang liyaa apne rang mein sach puchhiye to taaq hai bas ek fan mein raat auqaat mehr-o-maah ki maa'lum tab hui jab ham guzaar aae tiri anjuman mein raat chuntaa rahaa tamaam shab us ke badan se phuul aisaa lagaa ki tham si gai ho chaman mein raat"

"jab pher kar nigaah har apnaa paraayaa jaae mushkil ye hai ki aise mein kaun aazmaayaa jaae ham aag se Daraae hue log hain hamein ik mehrbaan nadi ke kinaare basaayaa jaae haan tum vafaa-parast ho bhukaa havas kaa main qasmein na khaai jaaein mujhe kuchh khilaayaa jaae bimaar se to puchhiye us ko hai kis kaa rog chaaragari ke vaaste kis ko bulaayaa jaae donon hi apni kashtiyaan zid mein jalaa chuke behtar hai aise 'ishq ko ab bhuul jaayaa jaae aanaa nahin hai jis ko nahin aaegaa kabhi aankhein bichaai jaaein ki ab dil jalaayaa jaae"

"jis ke aane se huaa hai daf'atan paani sharaab yaar ye to lag rahi hai jaani-pahchaani sharaab jis ne tujh ko chakh liyaa ho us kaa nashsha puchh mat jannaton mein bhi na milne ki ye nuraani sharaab main kahaa shahron mein qillat is qadar paani ki hai bol uThaa kam-zarf haasil hai ba-aasaani sharaab kaun ho tum kis jahaan se aae ho batlaao to 'aks paDte hi nadi mein ho gayaa paani sharaab"

"the ik khudaa ke saamne itne pasaare haath ik dusre ki Dor na aai hamaare haath saahil ki narm ret pe kuchh der to ruko dariyaa miraa badan hai to donon kinaare haath rakh kar hamein ghumaa diyaa khvaahish ke chaak par tum ne alag hi Dhang se thaame hamaare haath naahaq hamaari jaan kaa tum ne ziyaan kiyaa pahle bhi kam hasin nahin the tumhaare haath sahraa mein huun to qais baraabar khaDaa huaa ret aankhon mein paDe ki ab aaein sitaare haath"

"jo tere saath zaraa der tak rukaa hotaa main ik khayaal se aage nahin gayaa hotaa faqir log rahe apne apne haal mein mast nahin to shahr kaa naqsha badal chukaa hotaa main apne dil se mukhaatib thaa taajiron se nahin ki naap tol ke sab kuchh kahaa sunaa hotaa vo baadshaah-e-mohabbat mein haar bhi jaate to saltanat kaa baDaa kaam ho gayaa hotaa koi to jaag gayaa hotaa baagh jalne tak miri sadaa se kisi kaa bhalaa huaa hotaa ham aise log to uktaa gae the 'ishq se bhi vo bevafaa nahin hotaa to jaane kyaa hotaa bhalaa huaa ki judaa ho gayaa vo jaadugar main band aankhein liye saath chal rahaa hotaa"

"jism-e-maslub kaa yak-lakht nayaa ho jaanaa saamne aanaa tiraa jashn bapaa ho jaanaa nisf imaan pe naachiz Tikaa hai kab se maan letaa nahin bande kaa khudaa ho jaanaa der tak us ne lagaae rakhaa siine se mujhe jis se sikhaa hai darakhton ne haraa ho jaanaa dushman-e-jaan ho agar aise khudaaon kaa hujum ham ne sikhaa nahin raazi-ba-razaa ho jaanaa aaj sar kaaT ke jannat nahin maangi tum ne hai buri baat namaazon kaa qazaa ho jaanaa aise mansube ko naakaam kareinge ham log is mein shaamil hai agar teraa khudaa ho jaanaa"

"apni aaghosh-e-faraaghat mein paDaa rahtaa huun vaqt itnaa hai ki hairat mein paDaa rahtaa huun aa bataataa huun tujhe kitni hasin hai duniyaa main jahaan teri mohabbat mein paDaa rahtaa huun tu mujhe jaantaa hai aur bahut jaantaa hai bas isi nashsha-e-shohrat mein paDaa rahtaa huun tujh se milne kaa bhi imkaan ziyaan lagtaa hai jaane kis 'aalam-e-vahshat mein paDaa rahtaa huun jaari-o-saari hai bas ek tamanna kaa tavaaf raat din hujra-e-hasrat mein paDaa rahtaa huun haath apne nahin baDhte kisi khvaahish ki taraf khaak uDti hai to khalvat mein paDaa rahtaa huun mujh ko baandhaa hai kisi shaam ki raqqaasa ne surmai husn ki chaahat mein paDaa rahtaa huun jism ki jaagti duniyaa mein andheraa kar ke main ki bas ruuh ki dahshat mein paDaa rahtaa huun"

"ik aan mein hui ojhal zamin nigaahon se koi pukaarne vaalaa nahin nigaahon se khudaa gunaah ki lazzat ko barqaraar rakhe na dekh aise mujhe khashmagin nigaahon se ghazal ke husn ko darkaar naazirin nahin ziyaada kaam na lein saama’in nigaahon se tamaam phuul mujhe rang se lubhaate the tamaam raushniyaan yaad thiin nigaahon se shuru’-e-‘ishq mein kam paD gae the jab alfaaz kai zabaanein taraashi gaiin nigaahon se main aasmaan pe thaa tum ko yaad to hogaa mujhe utaaraa gayaa baa’d-azin nigaahon se mire vo she'r bhi aae pasand us ko vaah chhupaa rakhaa thaa jinhein nukta-bin nigaahon se"

"biphar uTThaa zabaan se juun hi nikli baat bose ki idhar qillat mohabbat ki udhar ifraat bose ki main jis ki saltanat mein kaasa-bardaari pe raazi thaa usi shahzaadi ne ji bhar ke di khairaat bose ki mu'aafi kaa tasavvur hi nahin us ki shari'at mein kal us ne intiqaaman mujh pe ki barsaat bose ki zabaan kaa garm bosa sair jannat ki karaa laayaa zamin vaalo tumhein maa'lum kyaa auqaat bose ki labon ke donon misre lab se mauzun kar ke dekhe hain samajh mein yuun nahin aai hain maa’ruzaat bose ki to ai husn-e-azal tujh se ijaazat chaahtaa huun main ijaazat chaahte hain ab mire jazbaat bose ki labon par aakhiri ik mohr lag jaae to so jaaun vagarna khatm hogi hi nahin ye baat bose ki"

"is baar intizaam to sardi kaa ho gayaa kyaa haal peD kaTte hi basti kaa ho gayaa is baar sangsaar hue be-gunaah log ik raasta badan ki bahaali kaa ho gayaa jizya vasul kijiye yaa shahr ujaaDiye ab to khudaa bhi aap ki marzi kaa ho gayaa miTTi ke ik diye ki mujhe bad-duaa lagi lau de ke ek baar main miTTi kaa ho gayaa jalte makaan dekh ke log itne khush hue pal mein samaan hi jaise divaali kaa ho gayaa niklaa na main bhi ghar se suni main ne bhi vo chikh kitnaa baDaa ilaaqa sipaahi kaa ho gayaa"

"nae charaagh ki lau paanv se lipaTti hai magar vo raat kahaan raaste se haTti hai main khaanqaah-e-badan se udaas lauT aayaa yahaan bhi chaahne vaalon mein khaak baTti hai zaraa saa sach bhi kisi se kahaa nahin jaataa zaraa si baat pe gardan hamaari kaTti hai ye kis ke paanv rakhe hain havaa ke siine par agar main saans bhi letaa huun 'umr ghaTti hai abhi bahut hain andheron ko pujne vaale yahaan charaagh bujhaao to raat kaTti hai"

"ham tashaddud ke isti'aare nahin kyaa koi saanp ko bhi maare nahin minnatein ki to thiin yazidon se main nadi huun mire kinaare nahin haath mein haath de to aauun main Dubnaa hai to phir pukaare nahin us se khud faasle baDhaae hain haar jiiti hai ham ne haare nahin tum bane ho baDi mohabbat se rang ne khud hi ruup dhaare nahin ab ye sailaab roko qattaalo ye mire aansuon ke dhaare nahin kashtiyaan main jalaa chukaa huun magar us ko samjhaao yuun pukaare nahin ye hi saabit karo ki so jaaein ho kisi aur ke hamaare nahin"

"qarib aane lage hain duur ke din vahi ji haan hamein manzur ke din ghalat auqaat mein naazil hue ham farishton ki hain raatein huur ke din zabaanein kaaT kar samjhaayaa us ne ye hain sultaani-e-jamhur ke din vo uThte kyon nahin sajde mein hain jo gae kyaa sarmad-o-mansur ke din mukammal chhuT hai nashtar-zani ki mubaarak hon nae naasur ke din akaDte the bahut lo aa gae naa nae changez aur taimur ke din mili imaan ki munh maangi qimat baDaa maatam huaa masrur ke din"

"zaraa saa ho mayassar vo jo mujh ko zaraa saa aae chain aae to mujh ko main shaah-e-'ishq kaa sanduqcha huun kabhi fursat mile to kholo mujh ko sar-e-saahil miri jurat raqam hai yahaan to kam se kam ab mat ro mujh ko agarche train aani thi tumhaari kahe jaataa thaa main hi roko mujh ko koi to raaz apnaa kholo mujh par kabhi to pyaar se kuchh kah do mujh ko"