Ghazal

"ek aisaa bhi marhala hogaa us ne sab kuchh miTaa diyaa hogaa ye jo laDtaa hai raat-din mujh se koi mujh mein bhi dusraa hogaa vo jo sachchi thi vo kahaani thi ye jo qissa hai haadisa hogaa us ne sadiyon ko baandh rakkhaa hai vo jo kahtaa thaa kal rahaa hogaa vo jo TuuTaa thaa niind jaisaa kuchh us kaa naqsha bhi khvaab saa hogaa vo jo kahtaa thaa kuchh nahin baaqi ain mumkin hai kuchh huaa hogaa"

"raasta roknaa paDaa us kaa itnaa ziyaada thaa tazkira us kaa ek aasaan saa havaala hai lafz-ba-lafz bolnaa us kaa log kahte the marne vaalaa hai ye jo chehra hai dusraa us kaa din koi marhala nahin hotaa raat lambi hai sochnaa us kaa ishq patthar hai ek bhaari saa kaun suntaa hai ab kahaa us kaa"

"koi bhi rasm ho kuchh ho bahaanaa hotaa thaa na jaane kyaa thaa ki milnaa milaanaa hotaa thaa kisi se milte agar dil se ho ke milte the ajiib log the kaisaa zamaana hotaa thaa vo laD-jhagaD ke bhi ik dusre pe marte the ye sab to thaa hi magar aanaa-jaanaa hotaa thaa koi bhi toD nahin ahd-e-yaad-e-maazi kaa hazaar gham the magar muskuraanaa hotaa thaa ye tarbiyat thi gharon mein har ek beTi ko kisi bhi haal mein ho ghar bachaanaa hotaa thaa varaq varaq the kitaabon ke mo'atabar itne har ek lafz ko dil mein basaanaa hotaa thaa agar thaa ishq to is mein bhi aisi shiddat thi bhanvar mein aise hi bas kuud jaanaa hotaa thaa"

"kaise kaise raaz chhupaane lagti hain aankhein kaise aankh churaane lagti hain khaamoshi se jab bhi ham do-chaar hue aavaazein aavaaz lagaane lagti hain ishq kaa dariyaa aisaa dariyaa hai jis mein ummidein din raat Thikaane lagti hain jangal to jangal the ab to shahron mein kyaa kyaa chizein aankh dikhaane lagti hain mujh ko baahar jaate dekh ke zindaan se zanjirein tufaan uThaane lagti hain"

"jism TuuTaa hai jaan TuuTi hai umr bhar ki thakaan TuuTi hai vo jo phailaa thaa kal dhuaan ban kar aaj us ki uThaan TuuTi hai aisaa lagtaa hai shahr TuuT gayaa sab se unchi dukaan TuuTi hai koi dhokaa thaa khaa liyaa us ne us ke haathon zabaan TuuTi hai vo ba-zaahir hai mutmain lekin us ke andar ki aan TuuTi hai raqs taari hai saare jangal par koi taaza machaan TuuTi hai"

"aise raste pe aa gayaa huun main jaise patthar koi hai yaa huun main us ne puchhaa hayaat kaa qissa kyaa bataaungaa sochtaa huun main vaqt ghaDiyon ke darmiyaan hai kahin saare mehvar pe ghumtaa huun main mujh se puchho na maajraa dil kaa reza-reza judaa judaa huun main mujh se kahti hai meri khaamoshi shor kartaa huun chikhtaa huun main ab to ik naam hai zamaane mein ab to naqshe pe aa gayaa huun main mere andar hazaar-haa chehre kitnaa marbut aaina huun mein ishq kartaa hai apni man-maani tum samajhte ho sar-phiraa huun main kis ne mujh ko 'adam' pukaaraa hai kis kaa lahja hai dekhtaa huun main"

"hamein pataa bhi nahin kis ki vo kahaani thi vo is qadar thi nai ki bahut puraani thi kabhi jo dekh liyaa us ko dekhte hi rahe vo apne aap mein Thahri hui ravaani thi tumhaari yaad kaa rakkhaa hai canvas varna hamaare khvaab ne surat nai banaani thi tumhaare paas to qisse kahaaniyaan hain bahut kabhi jo ham ne kahi bhi nahin sunaani thi ye rishte naate faqat bojh thaa ki Dhone the vafaa bhi sochiye aise hi bas nibhaani thi vahin pe khaak se milnaa thaa khaak honaa thaa usi ke shahr mein shohrat agar kamaani thi vo roz roz kaa marnaa kamaal thaa lekin ye zindagi to miri jaan aazmaani thi"

"zamin se aasmaan tak kaa safar hai yaqin jaisaa gumaan tak kaa safar hai hamein to raat din chalnaa hai lekin khudaa jaane kahaan tak kaa safar hai mire us ke taalluq ki kahaani junun ke darmiyaan tak kaa safar hai tire inkaar kaa saaraa khulaasa tiri halki si haan tak kaa safar hai kitaab-e-ishq ki har daastaan mein har ik qissa ziyaan tak kaa safar hai"

"safar andar safar karte agar tum kahaani mukhtasar karte agar tum hamein manzur the saare tamaashe kisi unvaan par karte agar tum siyaasat masala koi nahin thaa kisi ke naam par karte agar tum hamaare raabte kaTne lage hain kahin phir naama-bar karte agar tum haqiqat khul ke aa jaati nazar mein haqiqat par nazar karte agar tum"

"use bhi lauT kar aanaa nahin thaa vo jis ke saamne rasta nahin thaa usi ke khvaab dekhe jaa rahe the jise ham ne kabhi dekhaa nahin thaa hamaaraa zaahir-o-baatin mukammal kisi ke ishq mein Duubaa nahin thaa isi ummid par zinda the ab tak masihaa lauT kar aayaa nahin thaa saron ki bhiiD thi hadd-e-nazar tak magar un mein koi zinda nahin thaa ghane peDon ki majburi to dekho kahin bhi duur tak saaya nahin thaa"

"use pahle pahal achchhaa lagegaa nayaa rasta nayaa rasta lagegaa taalluq toDnaa mushkil nahin hai yahi ki dusraa jhaTkaa lagegaa miraa ehsaan hai tujh par mohabbat agar aisaa kahun kaisaa lagegaa tumhaare naam kaa chaltaa hai sikka kaho kuchh bhi kaho achchhaa lagegaa mire vahm-o-gumaan mein bhi nahin thaa ye sadma is qadar gahraa lagegaa yahi sab jaan kar chhoDaa thaa us ko vo apnaa hai to phir apnaa lagegaa"

"kisi ke ishq kaa maaraa huaa hai mukammal jiit ke haaraa huaa hai baDaa be-dard hai vo kyaa bataaein hamein to jaan se pyaaraa huaa hai ilaaj-e-ishq hai dard-e-mohabbat vo jis se dard kaa chaara huaa hai ye kaisaa rabt hai qisse mein yaaro kahaani ki tarah saaraa huaa hai kisi ke vaaste sang-e-malaamat kisi ki aankh kaa taaraa huaa hai"

"kisi ko phir use paane ki zid hai hamaare darmiyaan aane ki zid hai miri chaahat hai us ko rok lenaa magar vo hai ki bas jaane ki zid hai dayaar-e-shaam se aage nikal kar mohabbat ke azaa-khaane ki zid hai shuur-e-gham vahaan pahunchaa ki ab to khushi ko marsiya-khaane ki zid hai kisi ki pyaas zinda jaavedaan hai kisi ko phir se mar jaane ki zid hai furaat-e-jism se khemein haTaa kar amir-e-shaam ke aane ki zid hai"