Ghazal

"main apne vaqt mein apni ridaa mein rahtaa huun aur apne khvaab ki aab-o-havaa mein rahtaa huun kabhi zamin kabhi sair-gaah-e-maah-o-nujum kabhi main aks-e-nazar-aashnaa mein rahtaa huun samaaaton par utartaa huun misl-e-saut-e-yaqin dilon ke vaahima-e-barmalaa mein rahtaa huun main uDti gard huun ahl-e-hunar ke teshe ki aur ahl-e-dard ki bhi khaak-e-paa mein rahtaa huun main ik faqir-e-khudaa-mast barsar-e-duniyaa jamaal-e-yaar ki hairat-saraa mein rahtaa huun"

"qayaam-o-naql ajaaib ke tarjumaan to nahin amal har ek musalsal hai naa-gahaan to nahin ye markaze ki haraarat kashish kaa baais hai jo ho vo sard to phir ye zamin bhi maan to nahin muhit chaaron-taraf se hai ik khalaa-e-basit zamin ye apni faqat zer-e-aasmaan to nahin havaa uDaae unhein aur kahin bhi le jaae ye Tiile ret ke pakki nishaaniyaan to nahin havaa ke paas amaanat hain sab sadaa-o-aks abhi giraft se baahar hain par nihaan to nahin"

"apne naakhun apne chehre par kharaashein de gae ghar ke darvaaze pe kuchh bhuke sadaaein de gae jaagte logon ne shab-maaron ki jab chalne na di din chaDhe vo raushni ko bad-du'aaein de gae khud hi apne haath kaaTe aur aankhein phoD liin devtaaon ko pujaari kyaa sazaaein de gae ek apni zaat ke nuqte ko markaz maan kar hauslon ke zaaviye behad khalaaein de gae tez tufaanon ne saahil raund Daale the magar jab vo Takraae pahaaDon se ghaTaaein de gae"

"jo khud ko paaein to phir dusraa talaash karein is ik hayaat mein ab aur kyaa talaash karein sitaara-go hai ye shab is ko ghaur se sun lein aur is kaa din jo kahin kho gayaa talaash karein ham apni baat ko divaar hi mein chunvaa dein nazar shabih samaaat sadaa talaash karein hai baab-e-jaan pe rukaa aks-e-mehmaan aa kar sar-e-vajud koi aaina talaash karein havaa mein zahr hai sahraa kaa yaa samundar kaa ye ilm ho to koi badraqa talaash karein"

"kabhi jo nuur kaa mazhar rahaa hai vo kin taarikiyon mein mar rahaa hai kisi suraj kaa TukDaa toD laaein zamin kaa jism ThanDaa paD rahaa hai kahin aasaar DhunDein zindagi ke kabhi ye chaand meraa ghar rahaa hai mataa-e-aasmaan bhi luT na jaae sitaare par sitaara gir rahaa hai havaa mein lafz likkhe jaa rahe hain koi zakhmi parinda uD rahaa hai"

"pesh har ahd ko ik tegh kaa imkaan kyuun hai har nayaa daur nae khauf mein ghaltaan kyuun hai shahr ke shahr hi behosh paDe puchhte hain zindagi apne amal-daaron se naalaan kyuun hai aaina aks moattal to nahin kartaa kabhi itnaa be-aab magar aaina-e-jaan kyuun hai phir se matlub-e-khalaaiq hai gavaahi koi bar-sar-e-koh-e-siyah shola-e-larzaan kyuun hai ye amal hai khas-o-khaashaak ki chhidraai kaa rang-e-rangin-e-gul-o-laala pareshaan kyuun hai"

"ghubaar-e-nur hai yaa kahkashaan hai yaa kuchh aur ye mere chaaron taraf aasmaan hai yaa kuchh aur jo dekhaa arsh-e-tasavvur se baarhaa sochaa ye kaaenaat bhi aks-e-ravaan hai yaa kuchh aur main khoe jaataa huun tanhaaiyon ki vusat mein dar-e-khayaal dar-e-laa-makaan hai yaa kuchh aur firaaq-e-umr ki had kyuun lagaai hai us ne miraa vajud hi us ko giraan hai yaa kuchh aur azal se taa-ba-abad jast ek saaat ki yahi bas arsa-e-kaar-e-jahaan hai yaa kuchh aur"

"ham apne kheton mein hosh boeinge fasl-aavar havaas deinge zamin ke nange badan ko aakhir pahaaD kab tak libaas deinge farosh-gaahon se jins-e-taaza kabhi ki naayaab ho chuki hai ye kaar baa-iztiraab chamke ham apni jaanon ki raas deinge ham aab-bardosh Daainon ke gale mein kaanTe utaar deinge ki un ke honTon se khuun barse kuchh aisi shiddat ki pyaas deinge haraarat-o-baardat ki khoji havaaein mahv-e-safar raheingi badalti rut ki khabar hamesha tuyur-e-mausam-shanaas deinge har aae mausam mein konpalon ko sipaas-baar-aavari milegaa to shaakh-e-naa-varda-e-samar ko sazaa-e-radd-e-sipaas deinge"

"tere bikhre lafz bhi afkaar se aari nahin is haqiqat se to koi shakhs inkaari nahin phailtaa jaataa hai ik sartaan tere jism mein nashtaron ke khauf se mat kah ye bimaari nahin guzre vaqton ye ibaarat mein to kho kar rah gayaa vaqt ke maathe ki tahriron kaa tu qaari nahin teri har aavaaz un ke shor mein dab jaaegi un kaa maqsad to tiraa haankaa hai shashkaari nahin maslahat-andesh to kotaah-andeshon mein hai aaina teraa abhi mailaa hai zangaari nahin"

"kabhi sar pe chaDhe kabhi sar se guzre kabhi paanv aan gire dariyaa kabhi mujhe bahaa kar le jaae kabhi mujh mein aan bahe dariyaa gaataa huun mere sur mein sur mil jaae us ki lahron kaa meri aankh mein aansu dekhe to phir apni aankh bhare dariyaa main apni use sunaataa huun vo apni mujhe sunaataa hai main chup to vo bhi chup hai aur main kahun to baat kahe dariyaa kahin barf lapeTe baiThaa hai kahin ret bichhaa kar leTaa hai kabhi jangal mein Deraa Daale kabhi basti aan base dariyaa ai dariyaa! teraa paaT baDaa, ai dariyaa! teraa zor baDaa ai dariyaa! gum ho kar tujh mein qatre kaa naam paDe dariyaa ai shaaer! teraa dard baDaa ai shaaer! teri soch baDi ai shaaer! tere siine mein is jaisaa laakh bahe dariyaa"

"saaraa din be-kaar baiThe shaam ko ghar aa gae khvaab mein chalne lage divaar se Takraa gae main bhari saDkon pe bhi be-chaap chalne lag gayaa ghar mein soe log mere zehn par yuun chhaa gae meraa beTaa mere dushman ki hi tasvirein banaae mere abbaa us ki copy dekh kar ghabraa gae jab bhi suraj Dubte dekhaa main khush hone lagaa par kai manhus chamgaadaD mujhe larzaa gae aasmaan ki samt dekhaa baadalon ke vaaste dekhte hi dekhte chilon ke dil manDlaa gae"

"main lauh-e-arz pe naazil huaa sahifa huun dilon pe sabt huun peshaaniyon pe likkhaa huun puraani rut miraa muzhda sunaa ke jaati hai nai ruton ke jilau mein sadaa utartaa huun main kaun huun mujhe sab puchhne se Darte hain main roz ek nae karb se guzartaa huun main ek zinda haqiqat huun kaun jhuTlaae jo honT band rahein aankh se chhalaktaa huun khuli havaa mein jo aauun to raakh ban jaaun abhi main zer-e-zamin huun magar ubaltaa huun kisi tarah to saveron ki aankh khul jaae main shahr shahr mein suraj uThaae chaltaa huun"

"bosida khadshaat kaa malba duur kahin dafnaao jismon ki is shahr-e-panah mein taaza shahr basaao saare jism kaa resha resha soch ki quvvat paae phir har saans kaa haasil chaahe sadiyon par phailaao apnaa aap nahin hai sab kuchh apne aap se niklo badbuein phailaa detaa hai paani kaa Thahraao muddat se kyuun chaaT rahe ho lafzon ki divaarein siine mein makhfi khaakon ki vaazeh shakl banaao apnaa apnaa kafan utaarein laashein uDti jaaein pyaasi zabaan nikaale dharti chaaTe apne ghaao"

"paani mein bhi pyaas kaa itnaa zahr milaa hai honTon par aate har qatra suukh rahaa hai andhe ho kar baadal bhaage phirte hain gaate gaate ek parinda aag huaa hai phuul aur phal to taaza konpal par aate hain piilaa patta is vahshat mein TuuT rahaa hai gardish gardish chalne se hi kaT paaegaa chaaron jaanib ek safar kaa jaal bichhaa hai usi peD ke niche dafn bhi honaa hogaa jis ki jaD par main ne apnaa naam likhaa hai"

"zabaan chup hai magar zehn ro rahaa hai lahu ki jite-jaagte logon kaa so rahaa hai lahu tamaam umr milaa zahr is tasalsul se ki apne-aap mein tiryaak ho rahaa hai lahu ragon mein utri hai jo shai vo naa-muvaafiq hai ki saare jism mein kaanTe se bo rahaa hai lahu bas ek daaere mein raqs kar rahe hain havaas khayaal hai ki bagula bilo rahaa hai lahu har ek lahza utarti kasaafatein mujh mein aur ek gardish-e-paiham mein dho rahaa hai lahu koi kumak to mile ab mudaafaat ke liye vagarna rang ki taaqat bhi kho rahaa hai lahu"

"shuaaein aise mire jism se guzarti gaiin lahu mein jaise mire kirchiyaan utarti gaiin na jaane chehre huun aainda nasl ke kaise bas ek khauf se meri ragein sikuDti gaiin mujhe to lagte hain naakhun bhi apne zahr bujhe mere liye to miri ungliyaan bhi marti gaiin jazire kitne garaan paaniyon ki god mein hain panaah ke liye sochein miri bikharti gaiin ye gardishon kaa tavaazun bigaD na jaae kahin isi tarah jo zamin ki tahein udhaDti gaiin khalaa hayaat ke imkaan se to nahin aari pa justujuein kuchh apni hi maand paDti gaiin"

"zaraa haTe to vo mehvar se TuuT kar hi rahe havaa ne nochaa unhein yuun ki bas bikhar hi rahe hain be-nishaan jo uDe the bagula-zad ho kar zamin pe leTne vaale zamin par hi rahe bahaar jhaaDiyon par TuuT TuuT kar barsi duaaein maangte ashjaar be-samar hi rahe khushaa ye saaya o khushbu ki taair-e-khush-rang na phir ye vaqt rahe aur na ye shajar hi rahe banaaein aisaa makaan ab ki chaand aur suraj jidhar bhi jaaein magar raushni idhar hi rahe"

"andheri bastiyaan raushan manaare Duub jaaeinge zamin roti rahi to shahr saare Duub jaaeinge jhulas deingi jo sahraai havaaein reshmi saae dhuein ke zahr mein rangin nazaare Duub jaaeinge abhi se kashtiyaan sab saahilon ki samt rukh moDein ki jab tufaan aayaa phir ishaare Duub jaaeinge baDhegi un ki lau koi agar sinche haraarat se barasti barf mein saare sharaare Duub jaaeinge yunhi palte rahe gar hasht-paa is jhiil ki tah mein kisi din sath par hanste shikaare Duub jaaeinge fareb-e-maah-o-anjum se nikal jaaein to achchhaa hai zaraa suraj ne karvaT li ye taare Duub jaaeinge chaTaanon par karein kanda nishaani apne hone ki sunahre kaaghazon ke goshvaare Duub jaaeinge"