Ghazal

"hasb-e-maqsud ho gayaa huun main raakh kaa duud ho gayaa huun main ek kamre talak basirat hai kitnaa mahdud ho gayaa huun main naam pahle baraae-naam to thaa ab to mafqud ho gayaa huun main yuun khinche muflisi mein sab rishte jaise mardud ho gayaa huun main manfaat baanTtaa rahaa kal tak aaj be-sud ho gayaa huun main shahr radd-o-qubul mein aa kar bud-o-naabud ho gayaa huun main umr ki naa-rasaa masaafat mein gard-aalud ho gayaa huun main huzn ki yaas ki vadiat par ain masud ho gayaa huun main baab-e-shahr-e-sukhan huaa thaa 'ali' nutq-e-masdud ho gayaa huun main"

"meri imlaak samajh be-sar-o-saamaani ko ek muddat se main laahaq huun pareshaani ko ab ye maamul ke gham mujh ko rulaane se rahe saanehe chaahiyein ashkon ki faraavaani ko lauT aaegi jo aflaak se fariyaad miri kaun bakhshegaa sanad meri sanaa-khvaani ko pesh-e-manzar bhi vahi thaa jo pas-e-zaat rahaa gham ki miraas mili aankh ki hairaani ko siina sad-chaak karo dil se na aghraaz karo qaid rahne do abhi dasht mein zindaani ko maut bhi dekh ke angusht-ba-dandaan hai 'ali' marqad-e-zist se lipTi hui viraani ko"

"dar-e-shahi se dar-e-gadaai pe aa gayaa huun main narm bistar se chaarpaai pe aa gayaa huun badan ki saari tamaazatein maand paD rahi hain vo bebasi hai ki paarsaai pe aa gayaa huun nahin hai chehre kaa haal paDhne ki khu kisi mein sukut toDaa hai lab-kushaai pe aa gayaa huun husul-e-ganj-e-ataa-e-ghaibi ke vaaste ab sifaat-e-rabbi ki jubba-saai pe aa gayaa huun utaar pheinkaa musaalahat kaa libaas main ne sukut toDaa hai lab-kushaai pe aa gayaa huun futur mujh mein nahin hai koi sabab to hogaa duaaein detaa huaa duhaai pe aa gayaa huun 'ali' mein sabze ko raundne ki sazaa ke baais barahna-sar se barahna-paai pe aa gayaa huun"

"shahr-e-dil kunj-e-bayaabaan nahin thaa pahle main kabhi itnaa pareshaan nahin thaa pahle baaein pahlu mein jo ik sang paDaa hai saakit ye dhaDaktaa bhi thaa be-jaan nahin thaa pahle shahryaaron se maraasim the bahut hi gahre tira-bakhton se bhi anjaan nahin thaa pahle lafz ruThe hue rahte the qalam se aksar jin se tajdid kaa imkaan nahin thaa pahle jab safar kaaT liyaa hai to milaa hai sab kuchh saath mere koi saamaan nahin thaa pahle ab bhi be-naam basar hote hain auqaat mire dil mein tauqir kaa armaan nahin thaa pahle aaj chaadar ke baraabar hai mire qad ki bisaat main kisi shahr kaa sultaan nahin thaa pahle khaae baiThaa hai zamaane se taalluq kaa fareb tu 'ali' itnaa to naadaan nahin thaa pahle"

"khasaara-dar-khasaara kar liyaa jaae junun ko istiaara kar liyaa jaae ye nuqta bhi qarin-e-maslahat hai adaavat ko gavaara kar liyaa jaae darun-e-dil yam-e-afsurdagi hai koi tinkaa sahaaraa kar liyaa jaae sukhan-haae baraa-e-guftani se ghazal ko shaah-paara kar liyaa jaae sar-e-aab-e-ravaan sahraa bichhaa kar saraabon se kinaara kar liyaa jaae ziyaa aankhon ki putli mein samo kar andhere kaa nazaara kar liyaa jaae bhalaa kyaa khel hai kaar-e-mohabbat jo daanista dobaara kar liyaa jaae ye dil mein hai ki saare ashk pi kar badan ko miTTi gaaraa kar kiyaa jaae basaani hai koi basti ki sahraa 'ali' ab istikhaara kar liyaa jaae"

"tasavvur munkashif-az-baam ho jaane se Dartaa huun ataa-e-kashf ke itmaam ho jaane se Dartaa huun zamin-o-arsh ke baaham taalluq ke tanaazur mein zamin-o-arsh kaa idghaam ho jaane se Dartaa huun kabhi sab kar guzarne kaa junun bechain rakhtaa hai kabhi yuun bhi huaa sab kaam ho jaane se Dartaa huun mohabbat irtibaat-e-qalb se mashrut hoti hai yaqin-o-rabt ke ibhaam ho jaane se Dartaa huun kahaan mujh ko mayassar misr kaa baazaar aaegaa khud apni zaat mein nilaam ho jaane se Dartaa huun 'ali' bahr-e-mohabbat kaa shanaavar huun khudaa shaahid vafaa ke naam pe ilzaam ho jaane se Dartaa huun"

"har bure vaqt ke afaaal badal detaa hai ishq daanaaon ke aqvaal badal detaa hai barg-e-jaan haiat-e-ajzaa kaa pareshaan saa juz dekhte dekhte ashkaal badal detaa hai vaqt bedaar magar hai to taghayyur kaa asiir jo badalnaa ho ba-har-haal badal detaa hai ik zaraa sabr ki parvaaz kaa khaaliq yak-dam vaqt aane pe par-o-baal badal detaa hai koi majzub-e-ilaah jazb-o-junun mein aa kar kurra-e-arz ke abdaal badal detaa hai haath aa jaae agar nuskha-e-aqavaal-e-'ali' ek ik qaul-e-mah-o-saal badal detaa hai"

"na maah-ru na kisi maahtaab se hui thi hamein to pahli mohabbat kitaab se hui thi fareb-e-kul hai zamin aur namuna-e-azdaad ki ibtidaa hi gunaah-o-savaab se hui thi bas ek shab ki kahaani nahin ki bhuul sakein har ek shab hi mumaasil itaab se hui thi vajud-e-chashm thaa Thahre samundaron ki misaal numud-e-haalat-e-dil ik habaab se hui thi jazaa-e-ishq-e-haqiqi rahi talab apni khataa-e-ishq-e-majaazi janaab se hui thi usi se tira-shabi mein hai manzaron kaa vajud vo raushni jo mashiyyat ke baab se hui thi vahi to jehd-e-musalsal ki ibtidaa thi 'ali' jab aashnaai qadam ki rikaab se hui thi"