Ghazal

"paagal kaise ho jaate hain dekho aise ho jaate hain khvaabon kaa dhandaa karti ho kitne paise ho jaate hain mere kaam khudaa kartaa hai tere vaise ho jaate hain duniyaa saa honaa mushkil hai tere jaise ho jaate hain"

"main jab vajud ke hairat-kade se mil rahaa thaa mujhe lagaa main kisi moajize se mil rahaa thaa main jaagtaa thaa ki jab log so chuke the tamaam charaagh mujh se mire tajrabe se mil rahaa thaa havas se hotaa huaa aa gayaa main 'ishq ki samt ye silsila bhi usi raaste se mil rahaa thaa khudaa se pahli mulaaqaat ho rahi thi miri main apne aap ko jab saamne se mil rahaa thaa ‘ajib lai thi jo taasir de rahi thi mujhe ‘ajib lams thaa har zaaviye se mil rahaa thaa main us ke sina-e-shaffaaf ki hari lau se dahak rahaa thaa so puure maze se mil rahaa thaa savaab-o-taaat-o-taqvaa fazilat-o-alqaab paDe hue the kahin main nashe se mil rahaa thaa tire jamaal kaa bujhnaa to laazmi thaa ki tu baghair 'ishq kiye aaine se mil rahaa thaa zamin bhi mire aaghosh-e-surkh mein thi 'ali' falak bhi mujh se hare zaaiqe se mil rahaa thaa"

"sukut-e-shaam kaa hissa tu mat banaa mujh ko main rang huun so kisi mauj mein milaa mujh ko main in dinon tiri aankhon ke ikhtiyaar mein huun jamaal-e-sabz kisi tajrabe mein laa mujh ko main buDhe jism ki zillat uThaa nahin saktaa kisi qadim tajalli se kar nayaa mujh ko main apne hone ki takmil chaahtaa huun sakhi so ab badan ki hiraasat se kar rihaa mujh ko mujhe charaagh ki hairat bhi ho chuki maa'lum ab is se aage koi raasta bataa mujh ko us ism-e-khaas ki tarkib se banaa huun main mohabbaton ke talaffuz se kar nayaa mujh ko darun-e-sina jise dil samajh rahaa thaa 'ali' vo niili aag hai ye ab pataa chalaa mujh ko"

"zan-e-hasin thi aur phuul chun ke laati thi main she'r kahtaa thaa vo daastaan sunaati thi ye phuul dekh rahe ho ye us kaa lahja thaa ye jhiil dekh rahe ho yahaan vo aati thi munaafiqon ko miraa naam zahr lagtaa thaa vo jaan-bujh ke ghussa unhein dilaati thi 'arab lahu thaa ragon mein badan sunahraa thaa vo muskuraati nahin thi diye jalaati thi use kisi se mohabbat thi aur vo main nahin thaa ye baat mujh se ziyaada use rulaati thi main us ke baa'd kabhi Thiik se nahin jaagaa vo mujh ko khvaab nahin niind se jagaati thi 'ali' ye log tumhein jaante nahin hain abhi gale lagaa ke miraa hausla baDhaati thi 'ali' se duur raho log us se kahte the vo meraa sach hai bahut chikh kar bataati thi main kuchh bataa nahin saktaa vo meraa kyaa thi 'ali' ki us ko dekh ke bas apni yaad aati thi"

"is tarah se na aazmaao mujhe us ki tasvir mat dikhaao mujhe 'ain mumkin hai main palaT aauun us ki aavaaz mein bulaao mujhe doston ko na aag lag jaae apni D-P mein mat lagaao mujhe"

"sab ko hotaa hai hamaaraa to nahin ho saktaa 'ishq thaa 'ishq dubaara to nahin ho saktaa main to pahle hi tujhe haar ke baiThaa huun yahaan ab khasaare mein khasaara to nahin ho saktaa haan mire paas mohabbat ke 'alaava kyaa hai aur mohabbat se guzaaraa to nahin ho saktaa chaahtaa huun ki use paas bulaa luun lekin itne logon mein ishaara to nahin ho saktaa"

"tere aage sar-kashi dikhlaaungaa? tu to jo kah de vahi ban jaaungaa ai zaburi phuul ai niile gulaab mat khafaa ho main dobaara aaungaa saat sadiyaan saat raatein saat din ik paheli hai kise samjhaaungaa yaar ho jaae sahi tujh se mujhe tere qabze se tujhe chhuDvaaungaa tum bahut maasum laDki ho tumhein nazm bhejungaa duaa pahnaaungaa koi dariyaa hai na jangal aur na baagh main yahaan bilkul nahin rah paaungaa yaad karvaaugaa tujh ko tere zakhm teri saari neamatein ginvaaungaa chhoDnaa us ke liye mushkil na ho mujh se mat kahnaa main ye kar jaaungaa main 'ali'-zaryun huun kaafi hai ye main zafar-iqbaal kyuun ban jaaungaa"

"janaab-e-shaikh ki harza-saraai jaari hai udhar se zulm idhar se duhaai jaari hai bichhaD gayaa huun magar yaad kartaa rahtaa huun kitaab chhoD chukaa huun paDhaai jaari hai tire alaava kahin aur bhi mulavvis huun tiri vafaa se miri bevafaai jaari hai vo kyuun kaheinge ki donon mein amn ho jaae hamaari jang se jin ki kamaai jaari hai ajiib khabt-e-masihaai hai ki hairat hai mariz mar bhi chukaa hai davaai jaari hai"

"ik hijrat ki aavaazon kaa koi bain sune darvaazon kaa zakariyyaa peDon ki mat sun ye jangal hai khamyaazon kaa tire sar mein soz nahin pyaare tu ahl nahin mire saazon kaa auron ko salaahein detaa hai koi Dasaa huaa andaazon kaa miraa nakhra karnaa bantaa hai main ghaazi huun tire ghaazon kaa ik reDhi vaalaa munkir hai tiri topon aur jahaazon kaa"

"ye us ko maan lene ki ghaDi thi vo laDki zarf mein mujh se baDi thi main raste thaam kar baiThaa huaa thaa magar us ko to jaane ki paDi thi hujum-e-dushmanaan thaa tohmatein thiin vo tanhaa thi magar DaT kar khaDi thi"

"jaagnaa aur jagaa ke so jaanaa raat ko din banaa ke so jaanaa text karnaa tamaam raat us ko ungliyon ko dabaa ke so jaanaa dekhnaa kyaa vo online hai dekhnaa muskuraa ke so jaanaa"

"charaagaahein nai aabaad hongi magar jo bastiyaan barbaad hongi main in aankhon ko paDh kar sochtaa huun ye nazmein kis tarah se yaad hongi kabhi phaansi nahin leinge dupaTTe ye saari laDkiyaan aazaad hongi"

"jo vaqt aayaa to sab ne dekhaa 'ali' akelaa hi DaT gayaa hai vo jis ko laDnaa thaa pahli saf mein vo sab se pahle palaT gayaa hai jo main ne dushman ke maan ki photo zamin pe girne se pahle thaami vo bhaai kah kar baDhaa hai aage mire gale se lipaT gayaa hai ham agli piDhi se kyaa kaheinge ki ham baDe the ki yuun laDe the ab aur kitnaa lahu bahegaa zamin kaa siina to phaT gayaa hai ab is se aage kahaaniyon ki shab-e-mohabbat tulu' hogi ba-qaul 'azhar-faraagh' yaaro hamaaraa khema simaT gayaa hai gharib maaon ke laa'l beTe bhari javaani mein rul gae hain hamaari mehnat kaa jo sila thaa amir-zaadon mein baT gayaa hai"

"kise bataaun ki tu pyaar hai sazaa koi naiin mire 'alaava yahaan teraa mubtalaa koi naiin isi liye to ye khul kar khudaa pe bolte hain pata jo hai ki inhein bhi pataa-vataa koi naiin tujhe bhi meraa gilaa bas gilaa dikhaai diyaa pataa chalaa ki tujhe bhi miraa pataa koi naiin"

"usi ke saamne be-ikhtiyaar hotaa huun main jaan-bujh ke us kaa shikaar hotaa huun isi liye main pasandida qaidi huun us kaa main us se puchh ke us se faraar hotaa huun ye fi-zamaana samajhdaari to nahin lekin main jis pe hotaa huun puuraa nisaar hotaa huun jahaan-jahaan pe mukhaalif khaDe hue hon tire vahaan-vahaan pe main teraa shumaar hotaa huun"

"ab mire haal pe kyon tum ko pareshaani hai ab to tum mujh se mohabbat bhi nahin karte ho pyaar karne ki sanad kaise tumhein jaari karun tum abhi Thiik se nafrat bhi nahin karte ho mashvare muft diyaa karte the divaanon ko kyaa huaa ab to nasihat bhi nahin karte ho"

"khvaab kaa khvaab haqiqat ki haqiqat samjhein ye samajhnaa hai to phir pahle tariqat samjhein main javaaban bhi jinhein gaali nahin detaa vo log meri jaanib se ise khaas mohabbat samjhein main to mar kar bhi na bechungaa kabhi yaar kaa naam aap taajir hain numaaish ko ibaadat samjhein main kisi beach ke raste se nahin pahunchaa yahaan haasidon se ye guzaarish hai riyaazat samjhein meraa be-saakhta-pan un ke liye khatra hai saakhta log mujhe kyuun na musibat samjhein facebōk vaqt agar de to ye pyaare bachche apne khaamosh buzurgon ki shikaayat samjhein pesh kartaa huun main khud apni giraftaari 'ali' un se kahnaa ki mujhe zer-e-hiraasat samjhein"

"pahle-pahal laDeinge tamaskhur uDaaeinge jab ishq dekh leinge to sar par biThaaeinge tu to phir apni jaan hai teraa to zikr kyaa ham tere doston ke bhi nakhre uThaaeinge 'ghaalib' ne ishq ko jo dimaaghi khalal kahaa chhoDein ye ramz aap nahin jaan paaeinge parkheinge ek ek ko le kar tumhaaraa naam dushman hai kaun dost hai pahchaan jaaeinge qibla kabhi to taaza-sukhan bhi karein ataa ye chaar-paanch ghazlein hi kab tak sunaaeinge aage to aane dijiye rasta to chhoDiye ham kaun hain ye saamne aa kar bataaeinge ye ehtimaam aur kisi ke liye nahin taane tumhaare naam ke ham par hi aaeinge"

"adaa-e-ishq huun puuri anaa ke saath huun main khud apne saath huun yaani khudaa ke saath huun main mujaavaraan-e-havas tang hain ki yuun kaise baghair sharm-o-hayaa bhi hayaa ke saath huun main safar shurua to hone de apne saath miraa tu khud kahegaa ye kaisi balaa ke saath huun main main chhu gayaa to tiraa rang kaaT Daalungaa so apne aap se tujh ko bachaa ke saath huun main durud-bar-dil-e-vahshi salaam-bar-tap-e-ishq khud apni hamd khud apni sanaa ke saath huun main yahi to farq hai mere aur un ke hal ke biich shikaayatein hain unhein aur razaa ke saath huun main main avvalin ki izzat mein aakhirin kaa nuur vo intihaa huun ki har ibtidaa ke saath huun main dikhaai duun bhi to kaise sunaai duun bhi to kyuun varaa-e-naqsh-o-navaa huun fanaa ke saath huun main ba-hukm-e-yaar lavein qabz karne aati hai bujhaa rahi hai? bujhaae havaa ke saath huun main ye saabirin-e-mohabbat ye kaashifin-e-junun inhi ke sang inhin auliyaa ke saath huun main kisi ke saath nahin huun magar jamaal-e-ilaaha tiri qism tire har mubtalaa ke saath huun main zamaane bhar ko pataa hai main kis tariq pe huun sabhi ko ilm hai kis dil-rubaa ke saath huun main munaafiqin-e-tasavvuf ki maut huun main 'ali' har ik asiil har ik be-riyaa ke saath huun main"

"paraai niind mein sone kaa tajraba kar ke main khush nahin huun tujhe khud mein mubtalaa kar ke usuli taur pe mar jaanaa chaahiye thaa magar mujhe sukun milaa hai tujhe judaa kar ke ye kyuun kahaa ki tujhe mujh se pyaar ho jaae taDap uThaa huun tire haq mein bad-duaa kar ke main chaahtaa huun kharidaar par ye khul jaae nayaa nahin huun rakhaa huun yahaan nayaa kar ke main jutiyon mein bhi baiThaa huun puure maan ke saath kisi ne mujh ko bulaayaa hai iltijaa kar ke bashar samajh ke kiyaa thaa naa yuun nazar-andaaz le main bhi chhoD rahaa huun tujhe khudaa kar ke to phir vo rote hue minnatein bhi maante hain jo intihaa nahin karte hain ibtidaa kar ke badal chukaa hai miraa lams nafsiyaat us ki ki rakh diyaa hai use main ne an-chuaa kar ke manaa bhi lungaa gale bhi lagaaungaa main 'ali' abhi to dekh rahaa huun use khafaa kar ke"

"man jis kaa maulaa hotaa hai vo bilkul mujh saa hotaa hai aankhein hans kar puchh rahi hain niind aane se kyaa hotaa hai miTTi ki izzat hoti hai paani kaa charchaa hotaa hai jaantaa huun mansur ko bhi main apne hi ghar kaa hotaa hai achchhi laDki zid nahin karte dekho ishq buraa hotaa hai vahshat kaa ik gur hai jis mein qais apnaa bachcha hotaa hai baaz-auqaat mujhe duniyaa par duniyaa kaa bhi shubh hotaa hai tum mujh ko apnaa kahte ho kah lene se kyaa hotaa hai"

"tum sarvat ko paDhti ho kitni achchhi laDki ho baat nahin sunti ho kyuun ghazlein bhi to sunti ho kyaa rishta hai shaamon se suraj ki kyaa lagti ho log nahin Darte rab se tum logon se Darti ho main to jiitaa huun tum mein tum kyuun mujh pe marti ho aadam aur sudhar jaae tum bhi had hi karti ho kis ne jeans kari mamnua pahno achchhi lagti ho"

"kyaa puchhnaa hai is mein bhulaa mujh ko dijiye paDh kar darud khaak-e-shifaa mujh ko dijiye vo ho chukaa kisi kaa magar main usi kaa huun in'aam us ko diije sazaa mujh ko dijiye phir dekhiye ki faisle hote hain kyaa se kyaa ik roz ikhtiyaar-e-jazaa mujh ko dijiye mere sivaa kisi ke jo haq mein na ho sake yaa'ni ki apne jaisi du'aa mujh ko dijiye nafrat ki aag sirf mohabbat bujhaaegi rukiye janaab izn-e-navaa mujh ko dijiye saffaak ho diler ho behad hasin ho aisi kisi balaa kaa pata mujh ko dijiye"

"duniyaa kaa nahin mujh ko sahaaraa thaa tumhaaraa sach kyaa hai mujhe jhuuT bhi pyaaraa thaa tumhaaraa ab kis ki taraf dekh ke kahte ho ki ye hai pahle to miri samt ishaara thaa tumhaaraa tum jis ki judaai mein gale mujh se mile ho dekhaa to vahi shakhs dubaara thaa tumhaaraa"