Ghazal

"kisi ko laakh zamaana kahe vo achchhe the jo log aap ko achchhe lage vo achchhe the jo paude main ne lagaae the us mein phuul khile jo phuul tohfe mein mujh ko mile vo achchhe the thaa nok-e-tegh-e-vafaa kaa safar magar jo log idhar udhar se guzarte rahe vo achchhe the vo baad-e-vasl vafaa ki umiid karne lagaa zakaat de ke jo chalte bane vo achchhe the jo shakhs sab se buraa thaa yahaan par us ki bhi kuchh ek ghazlein thiin kuchh sher the vo achchhe the khamosh rah ke maraasim bachaae to ye khulaa jhagaDte the jo binaa baat ke vo achchhe the kahaani-kaar ne maqtaa badal diyaa varna ghazal mein vasl ke jo sher the vo achchhe the"

"sinche gae jo zakhm davaa se nikhar gae khaali hamaare dar se sabhi chaaraagar gae mushkil hai mere dil mein tire gham ko DhunDnaa saagar mein aise kitne hi dariyaa utar gae main is liye bhi dauD mein aage nikal gayaa mere harif vaqt se pahle Thahar gae aai khizaan to ishq ke maani pataa chale patton ke saath shaakhon se kuchh phuul jhaD gae laDkon ko lag rahi thi mohabbat hasin shai meri misaal di gai saare sudhar gae jaise nadi kaa hashr samundar mein girnaa hai vaise ye saanahe sabhi mujh par guzar gae tum hi nahin gae ho mujhe chhoD kar 'amulya' jaao tumhaare jaise kai log mar gae"

"faqir piir sukhan-var tire murid rahe zahin log mohabbat mein ahl-e-did rahe madad to khuub ki us ne miri par aise ki samajh lo jaise kisi tohfe pe rasid rahe manaane ruThne ke silsile bhi saath chalein safar tavil bhi ho dhundh bhi shadid rahe ye sach hai ishq mein milte hain jaan-levaa dukh ham aise vaaqion ke khud bhi chashm-did rahe tu jaate jaate mire dost kuchh to aisaa bol ki tere lauT ke aane ki kuchh umiid rahe"

"khudaa uruuj hai mujh ko zavaal DhunDhnaa hai javaab mil gae hain ab savaal DhunDhnaa hai sazaa ke taur pe mujh ko mili hai ye duniyaa sitam to ye hai ki is mein kamaal DhunDhnaa hai puraani yaadon kaa album nikaalnaa hai mujhe tumhaare saath jo guzraa thaa saal DhunDhnaa hai record room mein kuchh filein talaashni hain ghamon ke Dher mein mujh ko malaal DhunDhnaa hai khangaalne hain mujhe apne sab se achchhe sher jo tujh ko rang de aisaa gulaal DhunDhnaa hai hamaare dil mein bhare hain tamaam qimti gham ghazal ke vaaste sastaa saa maal DhunDhnaa hai"

"vo jis ki marzi se aae hain is sadi mein ham mileinge us se magar aakhiri ghaDi mein ham tumhaari yaad mujhe aise DhunDhti hai dost charaagh DhunDhte hain jaise tirgi mein ham sharif laDkiyaan yak-dam se khul nahin paati so dhire dhire se utreinge is nadi mein ham vo baat kartaa hai aur muskuraa ke dekhtaa hai simaT gae hain faqat itni si khushi mein ham tumhaare baad bichhaDne mein Dar nahin lagtaa mufid kaam kar aae the buzdili mein ham khudaa khitaab-e-siyaasat se duur rakhnaa hamein sukun chaahte hain yaar zindagi mein ham"

"tamaam dost to aae the vaapsi ke liye main aur bulb hain aakhir mein raushni ke liye jise main jitne ki baat kar rahaa huun dost vo khel hai hi nahin aam aadmi ke liye kisi ke ghar kaa agar shams Duub jaataa hai charaagh jalte hain us ghar ke raushni ke liye ye pahli raat hai main is qadar huaa huun gharib nahin hai mujh pe koi vajh khud-kushi ke liye vo mere paas thi itne ki saans lagti thi nadi ke paas main taDpaa huun tishnagi ke liye tumhein to achchhe-bure vaqt ki paDi hai yahaan taras gae hain kai log ik ghaDi ke liye kisi kisi pe ye vahshat savaar hoti hai ki mere sher nahin hote har kisi ke liye"

"hamaare chaahne vaale rahe the donon taraf lakir khinchi gai ham khaDe the donon taraf khudaa ke naam pe ik bhiiD ne hamein kaaTaa kaTe bhi aise ki kaT kar gire the donon taraf khudaa kaa kaam mohabbat hai kahne vaale log kaTaar haath mein le kar khaDe the donon taraf chhiDi thi jang bahut pahle raushni ke liye charaagh jalte hue bujh gae the donon taraf jahaan pe raah mein chhoDaa thaa aap ne mujh ko vahin se raaste kaTne lage the donon taraf vo aspataal mein aai thi dekhne mujh ko tamaam zakhm vahin bhar gae the donon taraf"

"bahut puraani hai ye pyaas aaj-kal ki nahin gilaas bhar ke pilaao zaraa zaraa si nahin kisi ko mujh se karaanaa ho aisaa vaisaa kaam to mujh ko teri qasam de kisi khudaa ki nahin ye kis tarah se taaaruf karaayaa hai meraa tumhaaraa dost huun bas dost aur kuchh bhi nahin tumhaare saath mein vo laDkaa kaun thaa kal shaam vo khair jo bhi thaa us se meri banegi nahin bichhaDte vaqt mujhe bad-duaaein de ke kahaa tumhaare chehre pe sab janchtaa hai udaasi nahin hamein pata hai adab kyaa hai shaaeri kyaa hai hamein bataayaa gayaa thaa ghazal uThegi nahin"

"maut bhi saamne aa jaae to uD saktaa huun itnaa achchhaa huun ki ab sirf bigaD saktaa huun main vo basti huun jo basti hai ujaDne ke liye mujh ko aadat hai ujaDne ki ujaD saktaa huun tum se pahle bhi kai chhoD chuke hai mujh ko tum se pahle bhi main bichhDaa huun bichhaD saktaa huun kaun kartaa hai yahaan jang natije ke liye jiit kar haarne vaale se jhagaD saktaa huun dauD mein jitne bhi laDke hain vo juute mein hain main binaa paanv huun mumkin hai pichhaD saktaa huun main tumhein chaand sitaare to nahi de saktaa tang lamhon mein magar haath pakaD saktaa huun"

"ham is tamiz ke saath us ke paas baiThte hain ki jaise shaah ke qadmon mein daas baiThte hain bas ek tu hai jise dost boltaa huun main vagarna saath mein aise pachaas baiThte hain main is liye bhi kabhi khul ke hans nahin paataa udaas log mire aas-paas baiThte hain biThaate vaqt mujhe dil mein ye kahaa us ne ye vo jagah hain jahaan log khaas baiThte hain"