Ghazal

"goyaa ki chhini pairon ke niche ki zamin hai kyaa paas tire jhuTi tasalli bhi nahin hai ham ne to use kar hi diyaa dil se bahut duur par us kaa khayaal us ki mohabbat to yahin hai maalum hai yaarab hai tu shah-e-rag se qarin-tar vo shakhs magar jo miri dhaDkan ke qarin hai hain aap hi kyuun haalat-e-afsos ki jaa par kyaa hogi 'anam' aap ki jab apni nahin hai"

"darun-e-dil jo charaagh jalte rahe musalsal hain un se aankhon mein nuur ke silsile musalsal kahin pe marte hain bhuuk se kuchh yatim bachche kahin pe kaase hain saailon ke bhare musalsal miri udaasi pe is tarah tu udaas mat ho ki zakhm rahte nahin hain aksar hare musalsal vo khvaab aankhon mein bhar sake yaa unhein ganvaa de vo apne Dar pe to baat khul kar kare musalsal kabhi khushi mein bhi ashk aankhon mein aa gae aur kahin udaasi mein muskuraanaa paDe musalsal ye us ki zid mein 'anamataa' nindon se laD paDi thiin ham apni aankhon se der tak shab laDe musalsal"

"jab tire hijr ke aasaar nazar aate hain mujh ko phulon mein bhi phir khaar nazar aate hain muund liin is liye barbaadi pe aankhein main ne mere apne hi zimmedaar nazar aate hain yaa vahi bughz vahi kiina vahi nafrat hai yaa mohabbat ke bhi aasaar nazar aate hain main havaaon ke taaaqub mein bhaTak jaati huun phir ishaare mujhe be-kaar nazar aate hain main bulandi se giraai gai jis mehnat se is mein apnon ke bhi kirdaar nazar aate hain shash-jihat dukh ke hain ambaar hi poshida yahaan jis qadar hain pas-e-divaar nazar aate hain aankh lagti hai to main khauf se uTh jaati huun khvaab mein qaafile khun-khaar nazar aate hain"

"hamaari maut kaa vaahid hai ye gavaah badan nahin hai ruuh pe koi bhi zakhm-gaah badan hamaari aankh se zaahir ho raushni kaise hamaare saamne rakkhaa gayaa siyaah badan jo gunge logon ki basti mein koi naam liyaa sunaai dene lage mujh ko be-panaah badan hamaari ruuh pe nashtar chubhe udaasi ke hazaar aahon pe maatam-kada hai aah badan use mare hue ghanTe guzar gae kitne ab aage kyaa hai nahin hai agar tabaah badan main us pe naqsh banaaungi apni vahshat ke nai nikaalungi tujh se main koi raah badan main andhe logon mein shaamil huun un ke jaisi huun so ek shart hi rakkhi gai nibaah badan"

"aate hain kitne khvaab tire roz-o-shab mujhe vahshat si hone lagti hai koi ajab mujhe tum ko main gar qubul huun aise hi Thiik huun aataa nahin sanvarne kaa koi bhi Dhab mujhe zaalim hai baadshah ki hai sab pe furaat band mahsus ho rahe hain sabhi sukhe lab mujhe bas kuchh dinon ki baat hai main lauT aaungi hargiz sadaa na de koi pichhe se ab mujhe ye dekhnaa hai kaun miraa is jahaan mein yaaqub ki to aankhein ataa kar ai rab mujhe vo shakhs jab ki ab to miri dastaras mein hai karni nahin hai aur kisi ki talab mujhe baandi ki tarah qaid huun us ke huzur main vo baadshah hai aur milegaa hi kab mujhe"

"raushni ki ashad zarurat hai aap ke paas thoDi fursat hai aap se jhuuT kah rahaa thaa koi zindagi Dher khubsurat hai ek duuje ko kho diyaa ham ne aur ye ujlat nahin himaaqat hai us ke mere visaal mein haail aur kuchh bhi nahin hai ghurbat hai aap jaise sukhan-nigaaron ko aaina dekhne ki haajat hai aur kuchh ho na ho tumhaare paas ek doshiza ki mohabbat hai aap ko kyaa gharaz hai 'anam' se vo mohabbat hai yaa musibat hai"

"ghup khaamoshi jaise qabristaan mein huun kyaa main zinda laashon ke asthaan mein huun raat Dhale viraani milne aati hai jaanti hai main us ke aqd amaan mein huun sard havaaein yaad us ki biphraa mausam vahshat-e-zist bataa main kis ke dhyaan mein huun phir sarsabz hue jaate hain saare peD lagtaa hai ik main hi namak ki kaan mein huun jaante ho is vaqt miri haalat hai kiyaa kaalaa phuul udaasi ke gul-daan mein huun vaapas jaane vaale ghar ko jaate hain main aazaad parinda kis zindaan mein huun lu se ziyaada tez nigaahon ki aandhi main jivan ke aise registaan mein huun"

"pahle mujh par bahut fidaa honaa us ki chaahat kaa phir fanaa honaa ye bhi bakhiye udheD deti hai us ko halkaa na le havaa honaa khud ko mahrum-e-raushni rakh kar kitnaa mushkil hai ik diyaa honaa is suhulat se zindagi kaaTi mujh ko aayaa na paarsaa honaa tu miri mushkilaat kyaa samjhe tujh ko aataa hai bas khudaa honaa meri tartib se rahi naalaan ziist ko aa gayaa khafaa honaa us ke jivan mein aa gayaa koi khaa gayaa mujh ko dusraa honaa"

"ghar mein daraaD Daalte rishton ki khair ho is aastin mein aa base saanpon ki khair ho vo TuTne lagin to suhulat mujhe bhi hai shab mein qaraar bakhshte taaron ki khair ho ye log har qadam pe giraane lage mujhe lekin sambhaalti tiri baanhon ki khair ho tu jo nahin to phuul to hain aas-paas bhi is habs mein khile hue ghunchon ki khair ho ruk saa gayaa nadi kaa bahaav baras se thaa us mein dhule hue tire pairon ki khair ho jis samt huun ravaan-davaan manzil bhi hai vahin raston mein jaa-ba-jaa paDe kaanTon ki khair ho main kyaa kahun ki kitne zamaane guzar gae hisse mein mere aaein na khushiyon ki khair ho mauj-e-fanaa ne dasht mein laa kar jhaTak diyaa hairat se dekhti tiri aankhon ki khair ho ye iztiraab-e-ishq se tohfa milaa mujhe munh ko chiDaa rahe tire lafzon ki khair ho baaghon mein sair karte hue jugnuon mein tum tum se ziyaa pakaDte charaaghon ki khair ho un ke sabab se hi hui main dar se be-amaan 'anam' tumhaare haal pe hanston ki khair ho"

"rone kaa saliqa mujhe aslaaf ne bakhshaa ye maatami aankhein mujhe virse mein mili hain ye karb ki duniyaa kaa hai naqsha ise dekho sab purkhein hamaari isi shajre mein mili hain main ghuur ke dekhun to buraa maantaa hai vo kaise kahun ye talkhiyaan tarke mein mili hain khvaabon ne bhi marne ki hi Thaani hai bil-aakhir do chaar ki laashein mire kamre mein mili hain TuuTe hue raston pe tiraa haath pakaD luun ye khvaahishein bas ishq ke badle mein mili hain jo laDkiyaan jiiti thiin mohabbat ke sahaare do gaz ki hi qabrein unhein tohfe mein mili hain"