Ghazal

"nai ghazlein likhun kis ke liye aur giit sajaaun kis ke liye miraa ham-dam mujh se ruuTh gayaa ab naghme gaaun kis ke liye vo paas jo thaa to us ke liye auron se bhi laDnaa paDtaa thaa ab kis ke liye main kis se laDun aur khud ko jalaaun kis ke liye ik us ke tabassum ki khaatir dukh-dard hazaaron sahtaa thaa ab kis ke liye dukh-dard sahun aur ashk bahaaun kis ke liye vo thaa to faqat us ki khaatir auron se bhi milnaa paDtaa thaa ab aise vaise logon ke main naaz uThaaun kis ke liye main us ke liye hi sanvartaa thaa aur khud ko sajaayaa kartaa thaa ab khud ko sanvaarun kis ke liye aur ghar ko sajaaun kis ke liye jab des mein koi apnaa thaa pardes mein kab ji lagtaa thaa ab kis ke liye ghar yaad aae aur des ko jaaun kis ke liye us kaa nahin 'aarif' koi badal aisaa hai vo meraa jaan-e-ghazal ab us ke sivaa kyaa yaad rakhun aur us ko bhulaaun kis ke liye"

"vo to meraa apnaa thaa jis ne mujh ko luuTaa thaa maut pe meri rotaa thaa meraa qaatil bholaa thaa sab jag suunaa suunaa thaa jab main tujh se bichhDaa thaa dhund si chhaai thi har-su kal kaa suraj kaisaa thaa koi birhan gaati thi dard bharaa ik naghma thaa Dartaa Dartaa saa mujh se meraa apnaa saaya thaa main barfaani raaton mein hijr ki aag mein jaltaa thaa raah-e-vafaa mein pair na rakh ik divaana kahtaa thaa insaanon ke jangal mein 'aarif' bilkul tanhaa thaa"

"main huun aur meraa kamra hai raat kaa gahraa sannaaTaa hai lab par hain insaaf ki baatein dil mein adaavat kaa jazba hai kuchh to bataa kyaa baat hai aakhir kyuun itnaa khaamosh khaDaa hai dil mein khalish rahti hai aksar teraa meraa kyaa rishta hai kis ko sunaaein kaun sunegaa dard bharaa apnaa qissa hai aankh khuli to ham ne jaanaa pyaar mohabbat ik sapnaa hai dekh liyaa sansaar ko 'aarif' tu hi jag mein sab se buraa hai"

"kam nahin ye bhi zindagi ke liye jaan jaae tiri khushi ke liye dosti ho vafaa ho nafrat ho kuchh bahaana ho zindagi ke liye aap ki yaad kaa bas ek diyaa hai bahut dil ki raushni ke liye vo jo maange to jaan bhi de duun ji rahaa huun isi khushi ke liye baarhaa khuun kar liyaa dil ko us ke honTon ki ik hansi ke liye aaj ke daur mein suno 'aarif' koi martaa nahin kisi ke liye"

"kisi kaa yuun to huaa kaun umr-bhar phir bhi na jaane kyuun thaa yaqin tere pyaar par phir bhi hazaar baar mire dil ko us ne Thukraayaa mujhe hai us se umid-e-vafaa magar phir bhi tumhaare naqsh-e-qadam par gayaa main sar-ba-sujud kisi ke aage jhukaayaa na thaa ye sar phir bhi main us ki chaah mein donon jahaan chhoD chalaa vo bevafaa na miraa ho sakaa magar phir bhi tumhaari bazm se nikle to phir mili na amaan bhaTakte phirte rahe garche dar-ba-dar phir bhi na tu hi tu vo rahaa aur na main hi main vo rahaa hai naqsh naam tiraa mere qalb par phir bhi main apni jaan bhi us par luTaa ke dekh chukaa use aziiz rahaa mujh se maal-o-zar phir bhi main tujh ko chhoD ke sar phoDne kahaan jaaun mire nasib mein hai teraa sang-e-dar phir bhi banaa sake na tire dil mein apnaa ghar 'aarif' luTaa diyaa tiri chaahat mein apnaa ghar phir bhi"

"tu bevafaa hi sahi tujh se pyaar aaj bhi hai tire liye ye dil-o-jaan nisaar aaj bhi hai main jaantaa huun na aaegaa tu palaT ke kabhi magar mujhe to tiraa intizaar aaj bhi hai tu laakh ghair sahi aaj-kal tu thaa meraa dil-o-jigar pe tiraa ikhtiyaar aaj bhi hai tire baghair bhi duniyaa bahut hasin hai magar tire firaaq mein dil be-qaraar aaj bhi hai khushi hai mujh ko tujhe mil gai tiri manzil khushi se aankh miri ashk-baar aaj bhi hai na bhar sakegaa kabhi us ko vaqt kaa marham tire karam se miraa dil figaar aaj bhi hai main tere baagh kaa barg-e-khizaan-rasida huun tu vo kali hai ki jis par bahaar aaj bhi hai bichhaD ke tujh se jiye jaa rahaa hai kyuun 'aarif' jigar mein ye khalish-e-nok-e-khaar aaj bhi hai"

"kaise safar par niklaa huun muD muD kar kyaa taktaa huun jaane phir kab lauTungaa sab se mil kar aayaa huun ruuTh gai manzil kaisi galiyon galiyon bhaTkaa huun koi mujh ko kyuun gaay dard bharaa ik naghma huun kyaa hogi taabir miri ik muflis kaa sapnaa huun zakhm tumhaari yaadon ke ab ashkon se dhotaa huun koi nahin meraa saathi ik baadal aavaara huun dekh mire dil mein aa kar jhuTaa huun yaa sachchaa huun 'aarif' is dil ke haathon martaa huun aur jiitaa huun"

"apne fan mein yaktaa huun main bhi tere jaisaa huun saare jag mein tanhaa huun jab se tujh se bichhDaa huun mujh mein bas tu hi tu hai main teraa aaina huun mujh se ye kaisi duuri main to teraa saaya huun jab se tu ne Thukraayaa galiyon galiyon bhaTkaa huun dil ki banjar dharti mein miThe sapne botaa huun zar vaalon ki basti mein 'aarif' khoTaa sikka huun"

"yaad un ki sataati rahi raat-bhar aankh aansu bahaati rahi raat-bhar ek maasum man mohni si sadaa dil pe dastak lagaati rahi raat-bhar ek talvaar siine pe chalti rahi ik khalish gudgudaati rahi raat-bhar raat Dhalti rahi ham sisakte rahe shama aansu bahaati rahi raat-bhar"