Ghazal

"ishq ko jab husn se nazrein milaanaa aa gayaa khud-ba-khud ghabraa ke qadmon mein zamaana aa gayaa jab khayaal-e-yaar dil mein vaalehaana aa gayaa lauT kar guzraa huaa kaafir zamaana aa gayaa khushk aankhein phiki phiki si hansi nazron mein yaas koi dekhe ab mujhe aansu bahaanaa aa gayaa ghuncha o gul maah o anjum sab ke sab bekaar the aap kyaa aae ki phir mausam suhaanaa aa gayaa main bhi dekhun ab tiraa zauq-e-junun-e-bandagi le jabin-e-shauq un kaa aastaana aa gayaa husn-e-kaafir ho gayaa aamaada-e-tark-e-jafaa phir 'asad' meri tabaahi kaa zamaana aa gayaa"

"ahl-e-dil mushkil mein hain ahl-e-nazar mushkil mein hain aaj main kyaa mere saare ham-safar mushkil mein hain zindagi ki uljhanon kaa kyaa mudaavaa kijiye zakhm baDhte jaa rahe hain chaara-gar mushkil mein hain ye sukut-e-shab ye zulmat aur ham shorida-sar rukhsat ai zindaan tire divaar-o-dar mushkil mein hain vo bahut achchhe hain tum jin ki nazar mein kuchh nahin ham ko dekho ham tumhein pahchaan kar mushkil mein hain"

"na saathi hai na manzil kaa pata hai mohabbat raasta hi raasta hai vafaa ke naam par barbaad ho kar vafaa ke naam se dil kaanptaa hai main ab tere sivaa kis ko pukaarun muqaddar so gayaa gham jaagtaa hai vo sab kuchh jaan kar anjaan kyuun hain sunaa hai dil ko dil pahchaantaa hai ye aansu DhunDtaa hai teraa daaman musaafir apni manzil jaantaa hai"

"kuchh bhi ho vo ab dil se judaa ho nahin sakte ham mujrim-e-tauhin-e-vafaa ho nahin sakte ai mauj-e-havaadis tujhe maalum nahin kyaa ham ahl-e-mohabbat hain fanaa ho nahin sakte itnaa to bataa jaao khafaa hone se pahle vo kyaa karein jo tum se khafaa ho nahin sakte ik aap kaa dar hai miri duniyaa-e-aqidat ye sajde kahin aur adaa ho nahin sakte ahbaab pe divaane 'asad' kaisaa bharosa ye zahr bhare ghunT ravaa ho nahin sakte"

"jab apne pairahan se khushbu tumhaari aai ghabraa ke bhuul baiThe ham shikva-e-judaai fitrat ko zid hai shaayad duniyaa-e-rang-o-bu se kaanTon ki umr aakhir kaliyon ne kyuun na paai allaah kyaa huaa hai zom-e-khud-etamaadi kuchh log de rahe hain haalaat ki duhaai ghunchon ke dil bajaae khilne ke shaq hue hain ab ke baras na jaane kaisi bahaar aai is zindagi kaa ab tum jo chaaho naam rakh do jo zindagi tumhaare jaane ke baad aai"

"do-jahaan se maavaraa ho jaaegaa jo tire gham mein fanaa ho jaaegaa dard jab dil se judaa ho jaaegaa saaz-e-hasti be-sadaa ho jaaegaa dekhiye ahd-e-vafaa achchhaa nahin marnaa jiinaa saath kaa ho jaaegaa be-natija hai khayaal-e-tark-e-raah phir kisi din saamnaa ho jaaegaa ab Thahar jaa yaad-e-jaanaan ro to luun farz-e-tanhaai adaa ho jaaegaa lahza lahza rakh khayaal-e-husn-e-dost lamha lamha kaam kaa ho jaaegaa zauq-e-azm-e-baa-amal darkaar hai aag mein bhi raasta ho jaaegaa apni jaanib jab nazar uTh jaaegi zarra zarra aaina ho jaaegaa"

"giraan guzarne lagaa daur-e-intizaar mujhe zaraa thapak ke sulaa de khayaal-e-yaar mujhe na aayaa gham bhi mohabbat mein saazgaar mujhe vo khud taDap gae dekhaa jo be-qaraar mujhe nigaah-e-sharmagin chupke se le uDi mujh ko pukaartaa hi rahaa koi baar baar mujhe nigaah-e-mast ye meyaar-e-be-khudi kyaa hai zamaane vaale samajhte hain hoshiyaar mujhe bajaa hai tark-e-taalluq kaa mashvara lekin na ikhtiyaar unhein hai na ikhtiyaar mujhe bahaar aur ba-qaid-e-khizaan hai nang mujhe agar mile to mile mustaqil bahaar mujhe"

"lab o rukhsaar ki qismat se duuri rahegi zindagi kab tak adhuri bahut taDpaa rahe hain do dilon ko kai naazuk taqaaze laa-shu'uri kai raaton se hai aaghosh suunaa kai raaton ki nindein hain adhuri khudaa samjhe junun-e-justuju ko sar-e-manzil bhi hai manzil se duuri 'ajab andaaz ke shaam-o-sahar hain koi tasvir ho jaise adhuri khudaa ko bhuul hi jaae zamaana har ik jo aarzu ho jaae puuri"

"gham-e-hayaat se jab vaasta paDaa hogaa mujhe bhi aap ne dil se bhulaa diyaa hogaa sunaa hai aaj vo ghamgin the malul se the koi kharaab-e-vafaa yaad aa gayaa hogaa navaazishein hon bahut ehtiyaat se varna miri tabaahi se tum par bhi tabsiraa hogaa kisi kaa aaj sahaaraa liyaa to hai dil ne magar vo dard bahut sabr-aazmaa hogaa judaai ishq ki taqdir hi sahi gham-khvaar magar na jaane vahaan un kaa haal kyaa hogaa bas aa bhi jaao badal dein hayaat ki taqdir hamaare saath zamaane kaa faisla hogaa khayaal-e-qurbat-e-mahbub chhoD daaman chhoD ki meraa farz miri raah dekhtaa hogaa bas ek naara-e-rindaana ek jura-e-talkh phir us ke baad jo aalam bhi ho nayaa hogaa mujhi se shikva-e-gustaakhi-e-nazar kyuun hai tumhein to saaraa zamaana hi dekhtaa hogaa 'asad' ko tum nahin pahchaante taajjub hai use to shahr kaa har shakhs jaantaa hogaa"

"jab zaraa raat hui aur mah o anjum aae baar-haa dil ne ye mahsus kiyaa tum aae aise iqraar mein inkaar ke sau pahlu hain vo to kahiye ki labon pe na tabassum aae na vo aavaaz mein ras hai na vo lahje mein khanak kaise kaliyon ko tiraa tarz-e-takallum aae baar-haa ye bhi huaa anjuman-e-naaz se ham surat-e-mauj uThe misl-e-talaatum aae ai mire vaada-shikan ek na aane se tire dil ko bahkaane kai talkh tavahhum aae"

"tum duur ho to pyaar kaa mausam na aaegaa ab ke baras bahaar kaa mausam na aaegaa chumungaa kis ki zulf ghaTaaon ko dekh kar ik jurm-e-khush-gavaar kaa mausam na aaegaa chhalke sharaab barq gire yaa jalein charaagh zikr-e-nigaah-e-yaar kaa mausam na aaegaa vaada-khilaafiyon ko taras jaaegaa yaqin raaton ko intizaar kaa mausam na aaegaa tujh se bichhaD ke zindagi ho jaaegi tavil ehsaas ke nikhaar kaa mausam na aaegaa"

"jab zindagi sukun se mahrum ho gai un ki nigaah aur bhi maasum ho gai haalaat ne kisi se judaa kar diyaa mujhe ab zindagi se zindagi mahrum ho gai qalb o zamir be-his o be-jaan ho gae duniyaa khulus o dard se mahrum ho gai un ki nazar ke koi ishaare na paa sakaa mere junun ki chaaron taraf dhuum ho gai kuchh is tarah se vaqt ne liin karvaTein 'asad' hansti hui nigaah bhi maghmum ho gai"

"main khush-nasib huun mujh ko kisi kaa pyaar milaa baDaa hasin mire dil kaa raazdaar milaa hai dil mein pyaar zabaan chup jhuki jhuki nazrein ajab adaa se koi aaj pahli baar milaa kisi ko paa ke mire dil kaa haal mat puchho ke jaise saare zamaane se ikhtiyaar milaa kisi ne puure kiye aaj pyaar ke vaade meri vafaa kaa sila mujh ko shaandaar milaa mere chaman kaa har ik phuul muskuraane lagaa vo kyaa milaa ki mujhe mausam-e-bahaar milaa"

"zindagi kaa har nafas mamnun hai tadbir kaa vaaizo dhokaa na do insaan ko taqdir kaa apni sannaai ki tujh ko laaj bhi hai yaa nahin ai musavvir dekh rang uDne lagaa tasvir kaa aap kyuun ghabraa gae ye aap ko kyaa ho gayaa meri aahon se koi rishta nahin taasir kaa dil se naazuk shai se kab tak ye harifaana suluk dekh shisha TuuTaa jaataa hai tiri tasvir kaa har nafas ki aamad-o-shud par ye hoti hai khushi ek halqa aur bhi kam ho gayaa zanjir kaa farq itnaa hai ki tu parde mein aur main be-hijaab varna main aks-e-mukammal huun tiri tasvir kaa"