Ghazal

"yaar logon kaa mohabbat mein jo me'yaar giraa yuun lagaa mujh ko main khud hi sar-e-baazaar giraa rakh diyaa yaar ne fauran se uThaa kar phir se meri tasvir se jis vaqt bhi vo haar giraa jang-ju us ke sabhi bhaag gae jaise hi khaa ke ik tir-e-'adu qaafila-saalaar giraa bakht khvaabida azal se hai so is ki khaatir is qadar ashk na ai dida-e-bedaar giraa mujh se be-nang se milne ki nahin kar khvaahish is qadar khud ko na ai saahib-e-dastaar giraa ek naakaami se ghabraa nahin kuchh mujh se siikh haar maani nahin garche main lagaataar giraa 'aalam-e-zabt to dekho ki vo jab chhoD gayaa ek aansu bhi na 'asghar' sar-e-rukhsaar giraa"

"siyaahi pheink ke tasvir par hamaari vo lagaa gai hai muqaddar pe zarb-e-kaari vo jo chand ghunT se haalat hui hai ab teri hamesha ham pe rahi kaifiyat hai taari vo hasin khvaab thaa dekhaa magar ye yaad nahin khilaa gulaab thaa yaa shakl thi tumhaari vo hamaare rashk-e-gulistaan ne phir se vaan jaa kar gulon ki baagh mein 'izzat hai phir utaari vo junun pe us ke to majnun bhi mahv-e-hairat hai ki ki hai dasht mein 'asghar' ne khaaksaari vo"

"aasmaanon aur zamin ko saath rakh ho sake to is yaqin ko saath rakh kaam aaungaa main mushkil mein tire mere jaise ham-nashin ko saath rakh jo khirad ki baat tak karte nahin tu hi aise jaahilon ko saath rakh dost jis mein saanp ki surat mein hon tu na aisi aastin ko saath rakh tu hai darvesh-e-anaa-parvar so tu kaasa-o-naan-e-javin ko saath rakh 'asghar'-e-be-khaanumaan kaa thaam haath 'umr-bhar is nukta-chin ko saath rakh"

"daaim us zulf ki khvaahish mein nahin rahnaa hai 'umr-bhar ek hi bandish mein nahin rahnaa hai ik to dil rang kaa shaidaai hai tis par is ko ek hi tarah ki poshish mein nahin rahnaa hai kuchh to hamdard hain dushman bhi hamaare aur phir yaar logon ko bhi saazish mein nahin rahnaa hai tujh ko ik aan mein chhineinge jahaan vaalon se sirf paa lene ki koshish mein nahin rahnaa hai"

"aap apne khvaab kaa lashkar banaa sakte hain ham dil mein khvaahish ho to ye manzar banaa sakte hain ham chaar-divaari ko paani se numu dete hue saahilon par sirf apnaa ghar banaa sakte hain ham par tumhaare hijr ne ham ko rulaayaa 'umr-bhar ham samajhte the ki dil patthar banaa sakte hain ham is qadar uDne ki khvaahish hai yahaan 'jurat' hamein kaaghazon par titliyon ke par banaa sakte hain ham"

"baDe buzurgon kaa ham ehtiraam karte hain safed riish ko jhuk kar salaam karte hain sajaae rakhte hain ik mahfil-e-'azaa mujh mein vo log jo mire dil mein qiyaam karte hain main un ko dost samajhtaa thaa aaj tak kyunkar jo dushmani ko shab-o-roz 'aam karte hain main un faqiron ki haalat samajh nahin sakaa huun jo halaal chizon ko khud par haraam karte hain khamoshi un ko basar kar nahin sakegi kabhi vo khush-kalaam jo khud se kalaam karte hain guzaarte hain ye din dhuup mein jabhi 'jurat' ham ek peD ke saae mein shaam karte hain"

"ashk ko lafz mein laate hue ro paDtaa huun haal-e-dil us ko sunaate hue ro paDtaa huun dasht mein phuul khilaati hai havaa chupke se aur main rang uThaate hue ro paDtaa huun aasmaan subh talak khvaab mein Dhal jaataa hai main sitaaron ko bujhaate hue ro paDtaa huun tar-ba-tar khuun mein Duubaa hai vajud-e-hasti sar-ba-sar khaak uDaate hue ro paDtaa huun apni surat pe kabhi khud bhi nazar kartaa kaash aaina jis ko dikhaate hue ro paDtaa huun"

"bad-bakht bad-nasib bure log hain yahaan sach baat hai adiib bure log hain yahaan vo mujh se koson duur hai main us se duur huun yaa'ni mire qarib bure log hain yahaan aati nahin samajh mujhe un ki kisi tarah ab kyaa kahun 'ajib bure log hain yahaan karte nahin hain zakhm kaa marham ba-zo’m-e-khud saahib sabhi tabib bure log hain yahaan main bhi unhin mein ek huun 'asghar' jahaan mein kahtaa hai vo gharib bure log hain yahaan"

"tere sivaa bhi dost mujhe kaam aur hai duniyaa mein dil lagaane kaa anjaam aur hai main sochtaa rahaa huun mohabbat ke baab mein kahte hain is vabaa kaa yahaan naam aur hai har raat meri kaTti hai is soch mein ki ab vo subh koi aur thi ye shaam aur hai meri likhe pe tanz na farmaaiye janaab meri ghazal mein lafz kaa ibhaam aur hai us ne kahaa ki mai-kada-e-dil to band thaa puchhaa jo main ne us se miyaan jaam aur hai us se nikal ke jaa nahin saktaa koi shikaar vo daam aur daam thaa ye daam aur hai main mast huun magan huun tiri kaaenaat mein kyunki ye kaaenaat mujhe khaam aur hai 'asghar' se puchhte ho jo vahshat kaa 'ishq mein vo saaf-saaf kahtaa hai kohraam aur hai"