Ghazal

"dil hai ki hamein phir se udhar le ke chalaa hai ummid se phir rishta-e-jaan baandh liyaa hai aahaT pe na chaunko ki na aaegi yahaan maut dastak pe na jaao ki ye aavaara huaa hai ab sang mudaavaa nahin aashufta-sari kaa yaan sang se bhi phoD ke sar dekh liyaa hai kyaa kijiye har kaavish-e-darmaan hui mahdud har jaada-e-imkaan hai ki masdud huaa hai zinda hain bahar-taur ki marnaa nahin bas mein taa-umr hamaare liye jiine ki sazaa hai ai dil kabhi patthar bhi kahin mom hue hain jo khvaab mein dekhaa hai kahin sach bhi huaa hai"

"ek sard jang hai ab mohabbatein kahaan TuTte hue tilism phailtaa huaa dhuaan vo bhi apne husn se be-khayaal ho chalaa aur khvaab ban gaiin meri sar-giraaniyaan qais ki mohabbatein kohkan ki chaahatin aur ye rivaayatein bhulti kahaaniyaan ham se pahle aur bhi kar gae vafaa bahut khaak mein milaa chale ham bhi zindagaaniyaan apne silsile se bhi kyaa khayaal aae hain jaan ki qadr kuchh nahin dil-ba-dast dil-baraan"

"magar nahin thaa faqat 'mir' khvaar main bhi thaa ki ahl-e-dard mein aashufta-kaar main bhi thaa sabaa ki tarah use bhi na thaa sabaat kahin na jaane kyaa thaa bahut be-qaraar main bhi thaa panaah leni paDi thi mujhe bhi saae mein rahin-e-minnat-e-divaar-e-yaar main bhi thaa hazaar apni tabiat pe jabr kartaa thaa main sabr kartaa thaa be-ikhtiyaar main bhi thaa ye kis ne dekhaa ki mujh be-navaa ke daaman mein mohabbatein thiin bahut saaya-daar main bhi thaa"

"bhule hue hain sab ki hai kaar-e-jahaan bahut lekin vo ek yaad hai dil par garaan bahut kuchh raftagaan ke gham ne bhi rakkhaa hamein niDhaal kuchh sadma-haa-e-nau se rahe nim-jaan bahut ham ko na zulf-e-yaar na divaar se gharaz ham ko to yaad-e-yaar ki parchhaaiyaan bahut vo sard-mehriyaan ki hamein raakh kar gaiin sunte hain pahle ham bhi the aatish-ba-jaan bahut ik mauj-e-fitna-sar ki ravaan har nafas mein hai har dam yaqin se pahle uThe hain gumaan bahut ab ke junun mein mauj-e-sabaa kaa bhi haath hai mauj-e-sabaa ki ab ke uThi sargiraan bahut ab ye khabar nahin vo samundar hai yaa saraab apne yahaan hai tishnagi-e-jism-o-jaan bahut sahraa se varna apnaa ilaaqa nahin hai kuchh aashuftagi-e-sar ki havaa hai yahaan bahut"

"aankh be-khvaab hui hai kaisi ye havaa ab ke chali hai kaisi tu miri yaad mein rotaa to nahin ye havaaon mein nami hai kaisi saaya hai aur kashida kitnaa dhuup hai aur kaDi hai kaisi kaisaa soyaa hai muqaddar apnaa aur zamin ghuum rahi hai kaisi rasm-e-duniyaa hai jise jaanaa hai ham pe uftaad paDi hai kaisi gung hain zinda-dilaan-e-lahore rasm-e-pursish bhi uThi hai kaisi"

"vo be-hunar huun ki hai zindagi vabaal mujhe kamaal gar nahin detaa to de zavaal mujhe vo bad-gumaan huaa huun ki e'tibaar uThaa sadaaqaton pe bhi kyaa kyaa hain ehtimaal mujhe main apne aap ko pahchaanne se Dartaa huun tabaah kar gai ye gard-e-maah-o-saal mujhe ghazab huaa tiri yaadon ne saath chhoD diyaa hanuz meri mohabbat hai ik savaal mujhe ye kyaa huaa ki havas ki giraft tang hui main tujh se haath chhuDaane ko huun sambhaal mujhe vo faasle hain ki aankhon mein khvaab naachte hain mili firaaq mein bhi lazzat-e-visaal mujhe vo bevafaa hai to is kaa bhi gham bahut hai magar main baa-vafaa huun to is kaa bhi hai malaal mujhe"

"sahraa se bhi viraan miraa ghar hai ki nahin hai is tarah se jiinaa bhi hunar hai ki nahin hai ye duniyaa basaai hai jo ik be-khabari ki is mein kahin yaadon kaa guzar hai ki nahin hai hai jism ke zindaan mein vahi ruuh ki fariyaad is karb-e-musalsal se mafar hai ki nahin hai divaar ke saae ne tumhein rok liyaa thaa ab himmat-e-imaa-e-safar hai ki nahin hai jis ke liye be-khvaab rahaa karti hain aankhein vo aankh bhi aashufta magar hai ki nahin hai ham shola-e-jaan tez havaaon se bachaa kar zinda hain magar us ko khabar hai ki nahin hai ab kaun rahaa hai jo hamein itni khabar de jo haal idhar hai vo udhar hai ki nahin hai"

"ham bhi the gosha-gir ki gumnaam the bahut is tarz-e-zist mein magar aaraam the bahut duniyaa hai kaar-khaana-e-vahm-o-gumaan tamaam sachche vahi fasaane the jo aam the bahut khud apne iztiraar-e-tabiat se tang the ham jo shikaar-e-gardish-e-ayyaam the bahut lipTi rahi to sar-basar asraar thi vo zulf khulti kabhi to us ke bhi paighaam the bahut ik umr tajrabaat mein guzri to ye khulaa yaan aazmuda-kaar hi naakaam the bahut"

"kaisi aashuftagi-e-sar hai yahaan raas sahraa yahaan na ghar hai yahaan ek gham hai ki be-mudaavaa hai ek ronaa ki umr bhar hai yahaan jo bhi kaavish hai be-sila be-sud jo shajar hai vo be-samar hai yahaan ik masaafat ki tai nahin hoti manzilon manzilon safar hai yahaan yuun rivaayat se kaT gae lekin tajraba jo hai talkh-tar hai yahaan"

"saae ki tarah koi mire saath lagaa thaa kyaa ghar ki tarah dasht bhi aaseb-zada thaa pursish ko na thaa koi to tanhaa thaa bahut main mahrum jo thaa sab se khafaa rahne lagaa thaa har dam nae ehsaas kaa tufaan thaa dil mein kyaa jaaniye main kaun si miTTi se banaa thaa kyaa kyaa na pareshaani-e-khaatir se guzar aae kyaa kyaa na paDe ranj ki dekhaa na sunaa thaa naale ko usi dil mein utar jaane ki hasrat aur nai ko usi bhulne vaale kaa gilaa thaa aashuftagi-e-sar ki jo tohmat hai ghalat hai main apni hi khushbu se pareshaan phiraa thaa ye kaun dil-o-jaan se ham-aahang huaa hai is darja to mahsus khudaa bhi na huaa thaa"