Ghazal

"saahib-e-takht hai muqaddar se jo nikaalaa gayaa thaa lashkar se ab bhi hai vaqt lauT aao tum paani guzraa nahin abhi sar se ishq aisaa ki maut aane par vo bhi niklegaa mere andar se zahr khaanaa hi paD gayaa aakhir peT raazi nahin thaa patthar se tum ne achchhaa kiyaa judaa ho kar ik balaa Tal gai mire sar se main bataataa huun kyaa balaa hai ishq ishq ik jang hai muqaddar se dushmanon ko bhi us ne daavat di chaahne vaale diid ko tarse"

"mohabbat ne nahin chhoDaa kahin kaa vagarna main thaa baashinda kahin kaa kabhi kahtaa nahin rukne ko ye dil uThaa laayaa hai phir naqsha kahin kaa bhaTaktaa phir rahaa huun dar-ba-dar main kisi se puchh kar rastaa kahin kaa idhar se ham karein taarif sachchi udhar se tum kaho jhuTaa kahin kaa kahaan kar aae ham izhaar-e-ulfat kahin par ho gayaa sajda kahin kaa jise dekhe kare paane ki khvaahish ye dil jaise ho shahzaada kahin kaa mohazzab aadmi ghar jaa ke apne utaaregaa kahin ghussa kahin kaa"

"koi kitnaa bhi kahe shaad nahin hotaa hai ik luTaa dil kabhi aabaad nahin hotaa hai paidaa hote hain faqat ishq ki khaatir do chaar har koi majnun yaa farhaad nahin hotaa hai hotaa aaya hai sadaa zakhm hi pahle ijaad pahle marham kabhi ijaad nahin hotaa hai zindagi apnaa sabaq aur zaraa mushkil kar ham ko aasaan sabaq yaad nahin hotaa hai ab har ik baat pe hotaa hai faqat vaa'da-va'id ab kisi baat pe samvaad nahin hotaa hai kaise us shakhs pe laanat nahin bheje koi ishq kar ke bhi jo barbaad nahin hotaa hai aise jallaad se hai asl mein khatra sab ko apne peshe se jo jallaad nahin hotaa hai ham mohabbat bhalaa kyaa khaak kareinge jaanaa ham se to kuchh bhi tire baad nahin hotaa hai paDh lo taarikh jo ik baar huaa mulk ghulaam phir vo aasaani se aazaad nahin hotaa hai"

"vo jo chaahein hamaaraa haal karein aur ham 'ishq kaa khayaal karein ham hain achchhe se dein javaab un ko vo bhi to soch kar savaal karein aap baaton se haar jaaeinge aap ashkon se kuchh kamaal karein jo kabhi bhi nahin rahaa ham mein kaise us 'ishq ko bahaal karein teraa gham kyon karein ba-zaahir ham sab ko dikhlaa ke kyon malaal karein ham ne to yunhi kah diyaa thaa bas aap jo chaahein meraa haal karein"

"laDte hue duniyaa ki zarurat ke liye ham mar jaaeinge ik roz mohabbat ke liye ham rakkhe nahin ham se koi ikhlaas ki ummid baazaar mein baiThe hain tijaarat ke liye ham daulat na siyaasat na qayaadat na hukumat mujrim hain faqat apni jihaalat ke liye ham duniyaa ke har ik lutf ko ham chhoD dein vaaiz itne bhi pareshaan nahin jannat ke liye ham hindi ki hifaazat ke liye jaise the 'raskhaan' vaise hi hain urdu ki hifaazat ke liye ham aise hi to talvaar uThaate bhi nahin hai majbur hue honge baghaavat ke liye ham jo haal thaa pahle vahi hai haal abhi bhi kuchh bhi nahin kar paae mohabbat ke liye ham"

"palaT jaane kaa khatra ho agar bilkul kinaare hi shikasta naav phir dariyaa mein koi kyon utaare hi vagarna faisla munsif hamaare haq mein jaaegaa hamaaraa faisla karnaa binaa soche-vichaare hi jise kahte hain sab duniyaa ye vo baazaar hai jis mein mohabbat DhunDhne vaale phireinge maare maare hi ab aksar nafraton ki aag hi uThti hai dharti se ab aksar aasmaan se bhi baraste hain sharaare hi zarurat lab-kushaai ki nahin kuchh khaas hai is mein mohabbat mein ziyaada kaam aate hain ishaare hi duaa jab khaas koi maangni hogi hamein us vaqt gireinge baal palkon se na TuTeinge sitaare hi mohabbat ki tarah ham se siyaasat pesh aati hai na rakhti hai qarib apne na karti hai kinaare hi khushi kaa aasraa hogaa yahaan mushkil se pal-do-pal kaTegi umr duniyaa mein faqat gham ke sahaare hi mohabbat mein nazar tum par nahin jaaegi duniyaa ki sabhi ilzaam rakkhe jaaeinge sar par hamaare hi kahaan se laaeinge itnaa bujhaane ke liye paani zamin par dikhte hain har-su hamein jalte nazaare hi mohabbat bechne niklo faqat is shart par 'balvant' lageinge haath is byopaar mein keval khasaare hi"

"jism se duur the ki lat bhi to lag sakti thi ham ko is khel ki aadat bhi to lag sakti thi jab gale mere musibat hi koi lagni thi to gale se ye mohabbat bhi to lag sakti thi un ko har haal miraa qatl thaa karnaa varna mere imaan ki qimat bhi to lag sakti thi kam se kam naam nadaamat se na lein bachche mere mujh se aisi koi tohmat bhi to lag sakti thi saikDon baar lagi haath ye gham ki daulat ik dafa haath masarrat bhi to lag sakti thi dosti tum se baDhaane mein ye khatra thaa mujhe dosti tum ko mohabbat bhi to lag sakti thi jaise duniyaa ki tumhein aab-o-havaa raas aai tum ko achchhi miri sohbat bhi to lag sakti thi main ne is Dar se bulaayaa nahin milne tanhaa tum ko khoTi miri niyyat bhi to lag sakti thi"

"gila kaisaa koi pardes mein apnaa nahin hotaa kisi sahraa mein sar par peDon kaa saayaa nahin hotaa hai apni ziist ki miTTi ki kuchh taasir hi aisi ki is ke baagh kaa koi bhi phal miThaa nahin hotaa bari ho jaati hai ik bhiiD apne sab gunaahon se isi ik baat se ki bhiiD kaa chehra nahin hotaa tumhaari bazm mein kyaa kaam hai ham jaise logon kaa jahaan patthar hi patthar hon vahaan shisha nahin hotaa khasaare ishq ke batlaao par ye bhi to batlaao vo hai kyaa kaam ki jis mein koi khatra nahin hotaa hamaare paanv ki beDi hamaari soch hoti hai koi patthar hamaari raah kaa roDaa nahin hotaa koi kuchh bhi kahe lekin ye bhi apni jagah sach hai kisi par shak koi yunhi kabhi paidaa nahin hotaa mukammal chaand par jaane kaa sapnaa ho gayaa kab kaa mohabbat kaa hi sapnaa jaane kyon puuraa nahin hotaa parinde puchhte phirte pata kyunkar ke pinjron kaa agar kuchh aasmaanon mein inhein khatra nahin hotaa nikalti hai sadaa kaDvi se kaDvi baat hi jin se unhin lab kaa diyaa bosa kabhi kaDvaa nahin hotaa hamaare dil ke junction par mohabbat naam hai jis kaa kabhi ghalati se bhi us train kaa ruknaa nahin hotaa muaafi maang kar hairat mein Daalo mat hamein 'balvant' yahaan apne kiye par koi sharminda nahin hotaa isi khaatir main dushman ki kabhi ginti nahin kartaa mujhe maalum hai ke bhiiD kaa chehra nahin hotaa miyaan farhaad-o-majnun se to aashiq aaj kaa achchhaa kam-az-kam ishq mein ab jaan kaa khatra nahin hotaa"