Ghazal

"baDaa kumba hai chhoTi degchi hai aur us par bhuuk munh khole khaDi hai jidhar tu ho udhar hi dekhti hai hamaari aankh bhi suraj-mukhi hai mire maulaa abhi suraj na nikle koi tahrir shabnam likh rahi hai koi nuskha na hogaa kaargar ab mohabbat kaam apnaa kar chuki hai 'inaayat par kisi ki ji rahe hain hamaari zindagi kyaa zindagi hai miri dil-jui ki khaatir kisi ne dahakti aag daaman mein rakhi hai zamin mein bhi utar jaaegaa suraj abhi to barf ki chaadar haTi hai faqat khushbu nahin titli ki chaahat vo phulon kaa lahu bhi chaaTti hai nazar aataa nahin kuchh bhi kisi ko bazaahir raushni hi raushni hai"

"ham ne to us se bhi nibhaa li hai dil mohabbat se jis kaa khaali hai ab to aa jaa ai dhuup khiDki par barf aankhon mein jamne vaali hai chhaanv bhi ab sukun nahin deti jism ne itni dhuup khaa li hai kuchh banaane ki phir zarurat kyaa us ki tasvir jab banaa li hai khatm jhagDaa nahin huaa ghar kaa jab ki divaar bhi uThaa li hai jis pe chaahat ke phuul khilte the tum ne vo shaakh kaaT Daali hai"

"tiri jab mehrbaan yaadein hui hain bahut hi khushnumaa raatein hui hain havaaon se bahut Darne lagaa huun ghani jab se miri shaakhein hui hain vo jis din se huaa hai duur mujh se miri us se bahut baatein hui hain unhin par ji rahe hain ham abhi tak jo khvaabon mein mulaaqaatein hui hain dhuaan niklaa hai teri khiDkiyon se magar pur-nam miri aankhein hui hain tiri khushbu fazaa mein ghul gai kyaa mo'attar kyon miri saansein hui hain"

"lagaa hai rog koi to jaDon mein udaasi kyon hai varna Tahniyon mein bhale hi barf ki chaadar uDhaa do jalan phir bhi rahegi aablon mein havas ki ungliyon par aa gae hain the jitne rang titli ke paron mein bahut nuqsaan kar detaa hai paani Thahar jaae agar kachche gharon mein tasalli mil gai pyaasi zamin ko huaa Takraav jab bhi baadalon mein tire naqsh-e-qadam ko chhoD kar ham ulajh kar rah gae hain raaston mein"

"haath pahunche bhi na the mahtaab tak ho gae miTTi sunahre khvaab tak chaal to dariyaa ki ham ne rok di aa gai naubat magar sailaab tak baadalon ki mehrbaani ho gai varna kyaa aati nadi taalaab tak is zamin ki aabyaari kaise ho kam hai jis ki pyaas ko sailaab tak dukh to ye hai kauDiyon mein bik gae kuchh gharon ke gauhar-e-naayaab tak khair ho maulaa siyaasat aa gai masjidon ke mimbar-o-mehraab tak hausla tinke kaa vo bhi dekh le le chalo maujo mujhe girdaab tak"

"hotaa hai mire haal kaa charchaa mire aage bantaa hai miraa roz tamaashaa mire aage afsos miri aankh mein aansu bhi nahin the dam toD rahaa thaa koi pyaasaa mire aage itnaa bhi ujaale na karein meraa ta'aaqub aa jaae mire jism kaa saaya mire aage ye daur-e-guzishta mein thaa raftaar kaa 'aalam manzil mire pichhe rahi rasta mire aage is vaqt main khud laash huun khud nauha-saraa huun rakkhaa hai miraa apnaa janaaza mire aage naakaami-e-qismat ki shuru'aat hui hai aataa hai abhi dekhiye kyaa kyaa mire aage"

"samajh rahe the ki baadal hain sar pe chhaae hue magar ghubaar pe nazrein the ham jamaae hue tamaam raat alaao pe kaaTne ke liye sune gae kai qisse sune-sunaae hue jhulas rahaa hai badan dhuup ki tamaazat se umiid sukhe darakhton se hain lagaae hue adaa na kar sake ham qarz teri chaahat kaa tiri gali se guzarte hain sar jhukaae hue vo jin ki khuun pasine se aabyaari ki unhin darakhton ke haasil hamein na saae hue vo kyaa samajhte ujaalon ki ahmiyat ai 'chaand' jinhein charaagh mile the jale jalaae hue"

"vahi bulandi se niche hamein giraate hain vo jin ke vaaste ham siDhiyaan banaate hain bikharne lagte hain ham ko sameTne vaale kabhi kabhaar to ham itnaa Tuut jaate hain sukun miltaa hai dil ko isi vazife se ham apne she'r akele mein gungunaate hain unhein sanad nahin milti kabhi mohabbat mein jo sar bachaate hain aur ungliyaan kaTaate hain ab aur is se ziyaada bhi rabt kyaa hogaa vo dhuup mein hon pasine mein ham nahaate hain rasaai dhuup ki hoti kahaan hai kamre mein hamaare kapDe badan par hi suukh jaate hain"

"tapish kyon baDh rahi hai raaston ki qazaa aane ko hai kyaa aablon ki hamaare haath hiiraa ho gae hain ghisaai karte karte pattharon ki havaa ke saath chalnaa paD rahaa hai baDi majburiyaan hain baadalon ki jahaan tak saath le jaaein havaaein vahin tak zindagi hai khushbuon ki yaqinan phuul koi khil gayaa hai nahin to bhiiD kyon hai titliyon ki usi ke saamne roungaa jaa kar jo qimat jaantaa hai aansuon ki haTaa kar 'chaand' ne chehre se parda zabaanein kaaT diin taarikiyon ki"

"pahle to apne aap ko tujh saa kare koi phir mujh se dosti kaa iraada kare koi harkat dil-o-dimaagh mein paidaa kare koi jo qaum mar chuki use zinda kare koi suraj ke saath saath badalti hain apnaa rukh parchhaaiyon pe kaise bharosaa kare koi khushbu ki tarh bikhraa huaa hai fazaaon mein kaise tire vajud ko yakjaa kare koi ye bulb ye charaagh mire kaam ke nahin kamre mein muskuraa ke ujaalaa kare koi dil kaa mu'aamla to hai dil kaa mu'aamla kab tak khud apne aap se jhagDaa kare koi buniyaad hi khisakne lage jab makaan ki divaar-o-dar pe kaise bharosaa kare koi mujh khaaksaar kaa bhalaa aisaa kahaan nasib do chaar din jo meri tamanna kare koi ai 'chaand' ye 'ajuba to hone se ab rahaa aa kar hamein sameTe ikaTThaa kare koi"

"fazaa behtar banaanaa chaahti hai kali ab muskuraanaa chaahti hai khulaa rahtaa hai darvaaza bhi lekin havaa khiDki se aanaa chaahti hai 'ajab dimak hai miTTi mein yahaan ki nae paudon ko khaanaa chaahti hai milaa karte the jis par do parinde vo shaakh ab suukh jaanaa chaahti hai"

"safar kaisaa ye karnaa paD rahaa hai sharaaron se guzarnaa paD rahaa hai fazaaein to mo'attar ho rahi hain gulaabon ko bikharnaa paD rahaa hai kisi ko zindagi dene ki khaatir hamein har roz marnaa paD rahaa hai badan mein hain hazaaron zakhm phir bhi samundar mein utarnaa paD rahaa hai jahaan chalte hue jalte hain talve vahaan ham ko Thaharnaa paD rahaa hai shikam se baandh kar shaa'ir ke patthar ghazal kaa peT bharnaa paD rahaa hai"

"aisaa mahsus huaa hai tire in'aam ke baa'd jaise mazdur ko mazduri mile kaam ke baa'd ye mohabbat kaa safar aisaa safar hotaa hai jis mein mahsus thakan hoti hai aaraam ke baa'd mere bistar pe miri laash paDi rahti hai apne paikar se nikal jaataa huun main shaam ke baa'd guftugu khatm isi vaaste kar di main ne kaun saa naam liyaa jaataa tire naam ke baa'd zi-shu'ur us mein kahaan ahl-e-junun jitte hain ibtidaa hoti hai jis khel ki anjaam ke baa'd"

"shiddat balaa ki hoti hai jis vaqt pyaas mein dariyaa dikhaai detaa hai khaali gilaas mein vo chiiz DhunDne se bhi milti hai phir kahaan jo chiiz khoi jaati hai hosh-o-havaas mein un raaston se ham ko guzaaraa fareb ne kaanTe chhupe hue the jahaan narm ghaas mein bekaar kar rahe hain shikaayat nasib se resham ke kiiDe paalne vaale kapaas mein ham ne qalam ki nok chalaa kar dimaagh par Taanke hain bel buuTe ghazal ke libaas mein ai 'chaand' meri samt abhi apnaa rukh na kar is vaqt koi aur hai mere qayaas mein"