Ghazal

"rang-birangi yaadon kaa gul-daan bachaa hai le de kar mere jiine kaa bas ik saamaan bachaa hai le de kar khaane piine ki sab chizein mahngaai ki nazr huiin mehmaanon ke aage dastarkhvaan bachaa hai le de kar raddi kaaghaz ki qimat mein bachche us ko bech na dein ghar mein jo 'ghaalib' kaa ik divaan bachaa hai le de kar baap ki saari jaagirein to baanT liin mil kar beTon ne maan ke hisse mein ghar kaa daalaan bachaa hai le de kar daulat aurat aur shohrat ki divaani is duniyaa mein mushkil se kuchh logon kaa imaan bachaa hai le de kar kyaa jaane barsaat kaTegi kaise mere bachchon ki ghar ki Dheri mein thoDaa saa dhaan bachaa hai le de kar chal kar ab 'didaar' vahin par ghar apnaa aabaad karo gaanv mein jo purkhon kaa ik khaliyaan bachaa le de kar"

"miTTi se jo juDe the vo jazbaat le liye hijrat ne khet aur mire baaghaat le liye paDh kar darud ghar se safar ko main chal paDaa naam-e-nabi ne raah ke khadshaat le liye main ik hunar ke shahr kaa farzand-e-khaas thaa ghurbat ne mere saare kamaalaat le liye sharm-o-hayaa gharon se miTaane ke saath saath T v ne masjidon ke bhi auqaat le liye daulat ki main havas mein havaa par savaar thaa shohrat ne mere arz-o-samaavaat le liye qaumon ko baa-shuur banaane ke saath hi taalim ne qadim rusumaat le liye phir doston ki saf mein koi zalzala na ho ghibat-kadon ne mere bayaanaat le liye 'didaar' chaar misron pe thaa iktifaa miraa ghazlon ke shauq ne mire qat'aat le liye"

"hamaare zakhm kaa bharnaa bahut zaruri hai ab eqtidaar mein hissa bahut zaruri hai lahu hamaaraa bahut bah chukaa hai dharti par ab inqalaab kaa aanaa bahut zaruri hai badan pe khuub hai parde kaa ehtimaam magar nazar mein sharm kaa parda bahut zaruri hai bahut ziyaada khushi bhi maza nahin deti dilon se dard kaa rishta bahut zaruri hai jo chaahte ho mohabbat mein pukhtagi aae kisi se mil ke bichhaDnaa bahut zaruri hai mire baghair tiraa zikr naa-mukammal hai diye ki lau pe patangaa bahut zaruri hai jalaa rahaa hai gharon ko jo be-sabab 'didaar' ab us charaagh kaa bujhnaa bahut zaruri hai"

"shaanon pe na zulfein bikhraao dekho ye sharaarat Thiik nahin is roz qayaamat se pahle ik aur qayaamat Thiik nahin rukh se na haTaao parde ko ye chaand chhupaa hi rahne do jal jaae na saaraa husn kahin suraj ki tamaazat Thiik nahin ai husn ki malika hosh mein aa ye pyaar vafaa sab rahne de ham khaana-ba-doshon ki khaatir mahlon se baghaavat Thiik nahin ho jaaein na TukDe TukDe sab aankhon ke sunahre khvaab tire patthar ki haveli ke aage shishe ki imaarat Thiik nahin ab maan bhi jaa ai dil mere us phuul ki khvaahish chhoD bhi de jo phuul chaman ki zinat ho us phuul ki hasrat Thiik nahin jab jalte patangon ko dekhaa 'didaar' to ye maalum huaa aaghaaz-e-mohabbat Thiik to hai anjaam-e-mohabbat Thiik nahin"

"doston se koi gila hi nahin ab mire paas kuchh bachaa hi nahin sab ke honTon pe muskuraahaT hai aisaa lagtaa hai kuchh huaa hi nahin kal to paane ko thaa bahut lekin aaj khone ko kuchh bachaa hi nahin valdiyat puchhtaa hai vo sab ki jis ke maan-baap kaa pata hi nahin laakh chaahaa yazid ne lekin ek sar thaa ki jo jhukaa hi nahin yuun lagaa hai mujhe miTaane par jaise meraa koi khudaa hi nahin varna 'didaar' kyaa nahin hotaa koi tujh saa tujhe milaa hi nahin"

"ab shikaayat kyaa karein guzre hue tufaan se raushni aane lagi hai phir se raushan-daan se khvaahishon ki arthiyaan ab to uTheingi shaan se dil lagaa baiThi hai meri muflisi dhanvaan se chhu gayaa jo bhuul se un ke dupaTTe kaa siraa khushbuein aane lagin sukhe hue gul-daan se zehn par duniyaa ki laalach phir se haavi ho gai de ke miTTi main abhi lauTaa thaa qabristaan se gar vafaadaari ki khvaahish hai to kutte paal le mat vafaa ki aas rakh is daur ke insaan se shart ye hai kuchh zamin bone ki khaatir to mile jiit lungaa main jahaan ko ek muTThi dhaan se chheDti hai yaad teri jab mujhe pichhle pahar rone lagtaa huun main lag ke 'mir' ke divaan se jin ko ho jaam-e-shahaadat ki talab 'didaar' phir vo nahin aate palaT kar jang ke maidaan se"

"Thokarein voTon ke badle mein anaaDi le gayaa maal-o-daulat sab siyaasat kaa khilaaDi le gayaa maghribi tahzib kaa hamla huaa kuchh is tarah sar se Topi aur phir chehre se daaDhi le gayaa main thaa mahv-e-shauq station ke waiting room mein koi apne saath meri rail-gaaDi le gayaa dusre khelon mein laDke jutiyaan ghiste rahe saaraa paisa ek cricket kaa khilaaDi le gayaa Taal kar bahnon ko agli eid ke vaade pe vo apni biivi ke liye resham ki saaDi le gayaa 'mir'-o-'ghaalib' daftar-e-urdu mein nange ho gae kauDiyon ke bhaav mein sab ko kabaaDi le gayaa mahnge injection davaa ki goliyaan aur botalein mukhtasar saa zakhm do din ki dihaaDi le gayaa main khaDaa taktaa rahaa 'didaar' hasrat se unhein family ko lunch pe jab maarvaaDi le gayaa"

"nadi pahaaD samundar chaTaan kuchh bhi nahin javaan ho azm to phir aasmaan kuchh bhi nahin ravish ghalat hai to raahon mein aDchanein hain bahut iraade nek hon to imtihaan kuchh bhi nahin vo apni shoala-bayaani se qatl kartaa hai agarche haath mein tir-o-kamaan kuchh bhi nahin hain mulk-o-qaum ke eazaaz sab tumhaare liye mire buzurgon ke shaayaan-e-shaan kuchh bhi nahin na ab to maan hai na hi maan ki yaad hai ghar mein sarautaa laung Dali paan-daan kuchh bhi nahin mire liye to ye baDh kar hai jaan se meri tire liye to miraa khaandaan kuchh bhi nahin ye beTiyon ki duaaon kaa nek-samra hai kaTi hai umr badan mein thakaan kuchh bhi nahin miri kahaaniyaan phaili hui hain chaaron taraf mire baghair tiri daastaan kuchh bhi nahin vatan ke naam hai 'didaar' zindagi apni vatan ke saamne ye jism-o-jaan kuchh bhi nahin"