Ghazal

"saanson ke paasbaan bahut thak chuki huun main khud kah rahi hai jaan bahut thak chuki huun main ummid ke ai dhundhle sitaare na jagmagaa ab mat ho mehrbaan bahut thak chuki huun main saanson ke donon haathon se khud apne jism kaa thaame hue makaan bahut thak chuki huun main pal pal junun-e-ishq ki manzil kaa aap ko de de ke itminaan bahut thak chuki huun main mujh ko bulandiyon se pukaaraa gayaa to phir kah dungi aasmaan bahut thak chuki huun main dafnaa do mujh ko mere hi maazi ki qabr main ji ji ke vartamaan bahut thak chuki huun main bujhte hue charaagh si kahti hai ab 'shikhaa' ai rabb-e-do-jahaan bahut thak chuki huun main"

"tum ne puchhaa to bataa deti huun kyon thaa yuun thaa sabab-e-tark-e-mohabbat bhi junun thaa yuun thaa tum ne aansu jinhein samjhaa thaa nahin the aansu meri aankhon se jo niklaa thaa vo khuun thaa yuun thaa is liye tum ne bhi shaayad miri tauqir na ki mujh mein jo shakhs darun thaa vo barun thaa yuun thaa yaar ab tum hi mire haq mein gavaahi de do varna kis kis ko bataaungi main yuun thaa yuun thaa aur bhaDak jaati thi siine mein teri yaad ki aag sabab-e-baada-kashi teraa fusun thaa yuun thaa aur kuchh vajh nahin thi miri khaamoshi ki dil ko tanhaai ke aalam mein sukun thaa yuun thaa main lagaataar kiyaa karti thi ulfat ke savaal us ki jaanib se 'shikhaa' haan thaa na huun thaa yuun thaa"

"kise pukaare madad ko kise bulaae badan akele ishq ko kaise sanbhaal paae badan main apni ruuh se milvaa duun us ko khush ho kar vo darmiyaan se apne agar haTaae badan na jaane phunk diyaa kyaa shikaari ne paDh kar chhuri ke niche parindon ne khud bichhaae badan kabhi jo dekho to baazaar-e-husn mein jaa kar yahaan vahaan rakhe honge saje sajaae badan andhere khauf ke tabdil hon ujaalon mein hamaari qabr mein ai kaash teraa aae badan are shuur nahin hai use to itnaa bhi chhupaae bhi to vo kis tarah se chhupaae badan ye ji mein aataa hai ab to utaar kar rakh dein kahaan kahaan phirein aakhir 'shikhaa' uThaae badan"

"phuul khushbu yaa havaa hai fikr ki dahliz par kaun dastak de rahaa hai fikr ki dahliz par kashtiyaan maujon se laD kar paar kab ki ho gaiin naakhudaa ab tak khaDaa hai fikr ki dahliz par aaj phir maazi ki dhun par raqs hogaa bazm mein aaj phir se ratjagaa hai fikr ki dahliz par tum ne mujh ko ishq mein ik din masihaa kyaa kahaa dard kaa jamghaT lagaa hai fikr ki dahliz par lafz-o-maani ke parindo shor itnaa mat karo ek aansu so rahaa hai fikr ki dahliz par ho rahi hai ruuh tak ik raushni tahlil si kyaa kisi kaa dil jalaa hai fikr ki dahliz par shart thi har ek lab par mohr-e-khaamoshi to phir hashr saa kyunkar bapaa hai fikr ki dahliz par chaand taare kahkashaan raushan falak jugnu charaagh shams bhi aakar paDaa hai fikr ki dahliz par ishq mein aisaa bhi main ne vaqt dekhaa hai 'shikhaa' zakhm khud marham huaa hai fikr ki dahliz par"

"kahkashaan ko toD kar saare ke saare aa gae chaand ko main ne pukaaraa thaa sitaare aa gae sar-phire suraj ke marne kaa tamaasha dekhne shaam ke manzar bhi baalon ko sanvaare aa gae yaad jab main ne kiyaa un ko bhare manjdhaar mein khud-ba-khud kashti mein chal kar ye kinaare aa gae haan yahi sach hai bichhaDte vaqt apni aankh mein un ki galiyon ke liye rangin nazaare aa gae prem-dhan ki baansuri aisi bajaai shyaam ne nafraton ke devtaa bhi munh utaare aa gae mai-kashon ki bazm mein thaa ranj-o-gham par tabsira main ne di aavaaz sab ulfat ke maare aa gae hamd likhne ko qalam jab bhi uThaai hai 'shikhaa' lafz saare baa-adab baanhein pasaare aa gae"

"ghamon ko apne dabaa ke rakhnaa kamaal hai yaa nahin hai bolo ye dil ki daulat chhupaa ke rakhnaa kamaal hai yaa nahin hai bolo har ik tamanna ki rahguzar par mukhaalifat ki havaa ke sar par charaagh-e-ulfat jalaa ke rakhnaa kamaal hai yaa nahin hai bolo samundaron kaa mizaaj ho kar zamin-e-chaahat pe ashk bo kar labon pe khushki sajaa ke rakhnaa kamaal hai yaa nahin hai bolo rafaaqaton ke usuul jaise mahakte khush-rang phuul jaise jigar ko patthar banaa ke rakhnaa kamaal hai yaa nahin hai bolo vo guzre lamhe vo saal saare diye jo rumaal tum ne saare vo apne dil mein sajaa ke rakhnaa kamaal hai yaa nahin hai bolo vo raushni kaa suraagh ban kar khuli chhaton kaa charaagh ban kar khilaaf khud ko havaa ke rakhnaa kamaal hai yaa nahin hai bolo nae zamaana ke qaasidon se hai bachnaa kis tarah haasidon se 'shikhaa' ko sab kuchh sikhaa ke rakhnaa kamaal hai yaa nahin hai bolo"

"jigar ke chaak pe raqsaan ye pyaar ki miTTi mahak rahi hai tire intizaar ki miTTi shikasta hijr ke mausam mein ham ne dekhi hai khizaan ki shakl mein fasl-e-bahaar ki miTTi guzarte vaqt ki maanind mere haathon se phisal na jaae tire eatibaar ki miTTi main us ke badle mein de duun jahaan ki daulat kahin mile jo mujhe ku-e-yaar ki miTTi lagi hai bhiiD farishton ki khair-maqdam ko zarur hai ye kisi din-daar ki miTTi kise khabar hai ki hijrat ki aandhiyon ke sabab kahaan ko jaaegi kis ke dayaar ki miTTi simaT hi jaaegi ik roz sun le ‘dip-shikhaa' ye tere jism ki tere hisaar ki miTTi"

"tamaam aish-o-tarab aur sukun ek taraf ataa-e-ishq hamaaraa junun ek taraf makaan mein khiDkiyaan divaar-o-dar zaruri hain magar jo roke hai chhat vo sutun ek taraf isi mahine mein tum chhoD kar gae the mujhe nikaal dungi calender se june ek taraf main zindagi ke sabaq ek or rakhti huun tamaam hikmat-o-ilm-o-funun ek taraf hai ek aur ishaara tiri nigaahon kaa zamaana bhar ke sabhi aflaatun ek taraf banaa ke bhejungi is baar ishq kaa sweater nikaal ke abhi rakh li hai uun ek taraf ragon mein vaise to har vaqt dauDtaa hai 'shikhaa' magar jo aankh se Tapkaa vo khuun ek taraf"