Ghazal

"paas har pal ye rahaa hote judaa dekhaa nahin dard se behtar koi bhi ham-navaa dekhaa nahin hijr ki raatein ye aansu aur ye tanhaaiyaan tum ne mere saath kyaa ye qaafila dekhaa nahin yaad hai tum ne dilaai thi qasam na milne ki is liye sadiyon se main ne aaina dekhaa nahin kaaT kar shah-rag kabhi haasil huaa hai ishq kyaa is se bad-tar aur duujaa raasta dekhaa nahin ishq ko likhne jo baiThi jab kabhi pannon pe main ye qalam bhi bolaa aisaa haadisa dekhaa nahin"

"apne sapnon ko jalaa kar har taraf ki raushni is tarah se duur ki raahon ki teri tirgi jo nadi makhmur thi saagar ki bas ik chaah mein vo bujhaati aaj hai aansu ko pi kar tishnagi maut aane par badalti ruuh apnaa pairahan kyaa pata thaa ruuh mujh ko chhoD degi jiite ji"

"khvaahishon kaa qatl kar khud hi lagaani aag hai khaak hote khvaab ki saari kahaani aag hai jism ki chaadar mein chhupti har javaani aag hai naam de kar 'ishq kaa sab ko bujhaani aag hai ek dil patthar tumhaaraa ek dil patthar miraa donon dil Takraa gae to sirf aani aag hai jhuuT hain rishte ye naate sach hai keval maut hi aakhiri saathi sabhi kaa khaak paani aag hai"

"makaan dil ko banaane kaa ye vaada ru-ba-ru kar ke makin ghar chhoD dete hain ye baatein ku-ba-ku kar ke lagi jo choT bhi tum ko sahaa mujh se na jaaegaa ye baatein karne vaale chhoD jaate dil lahu kar ke kabhi nashtar se jo us ne diye the ghaav is dil par vahaan paivand yaadon kaa lagaayaa hai rafu kar ke nahin sukhi hain belein aaj bhi dil mein mohabbat ki unhein sinchaa hai ashkon ko lahu ko aab-ju kar ke tumhein sachchi mohabbat kaa sila main aur kyaa deti tumhein agle janam bhi maangti huun aarzu kar ke"

"ye gham khushiyon ki kyon mujh par nazar hone nahin dete mujhe aaghosh mein le kar sahar hone nahin dete baDi khaamoshi se rahte mizha-e-dil pe ye aansu kisi ko dard ki mere khabar hone nahin dete shajar par dil ke baiThe hain parinde hijr ke kuchh yuun ki shaakhon par mohabbat ke samar hone nahin dete sajaa kar log sapne ik hasin saa ghar banaane ke banaa lete makaan par us ko ghar hone nahin dete"

"diyaa mauqa nahin khud ko na un zakhmon ko bharne kaa hunar aaya nahin mujh ko vafaa kar ke badalne kaa nikal kar aankh se ye ashk jab dil tak pahunchte hain tabhi matlab samajh aataa namak zakhmon pe paDne kaa baDi jaldi utaaraa aaj us ne qabr mein mujh ko kiyaa kartaa thaa jo vaada hamesha saath chalne kaa nayaa kandhaa vo khojegaa shab-e-maatam guzarte hi dikhaavaa phir karegaa vo mohabbat mein bikharne kaa gulaabon se sajaa hogaa paraayaa haath phir koi bhalaa vo kab talak yuun gham karegaa mere marne kaa"

"mujhe shiddat se chaaho tum vo manzar dekh lete hain chalo aisaa karein qismat badal kar dekh lete hain banaayaa hai mohabbat ne tumhein patthar to phir ham bhi tumhin se TuTne ko kaanch ban kar dekh lete hain badal kar phone number vo samajhte duur hain ham se unhein dene ko khat ham bhi kabutar dekh lete hain na thaame haath jo na saath meraa rahguzar mein de khudaayaa is janam aisaa hi rahbar dekh lete hain"

"rukhsati ke din chukaanaa hogaa jurmaana sanam ik dafa denaa paDegaa phir se ye shaana sanam bhuul kar mujh ko jo tum ne bhuul ki thi ik dafa zikr bhi us bhuul kaa lab par nahin laanaa sanam tum sajaa denaa khile sadhaa gulaabon se mujhe aakhiri hogaa tumhaaraa ye hi harjaana sanam jo chhupaa kar aaj bhi rakkhe hain khat sanduq mein chaahte hain un khaton ko saath le jaanaa sanam chaand ke jaane se hi raatein badalti subh mein jaate jaate bas yahi kahtaa hai divaana sanam"

"bas mohabbat hi nahin hai par sadaaqat hai bahut ai khudaa us shakhs ke dil mein sharaafat hai bahut chumtaa hai vo hazaaron phuul har din baagh mein har kali ko phir bhi us bhanvre se ulfat hai bahut hans rahi huun main agar to khush huun ye na sochnaa khauf hai khone kaa tujh ko ye hi vahshat hai bahut is liye karti nahin main dard ko apne bayaan har zabaan par bas nasihat uf nasihat hai bahut"