Ghazal

"manzil nahin hai paas to kyaa rahguzar to hai is dasht-e-zindagi mein ghubaar-e-safar to hai duniyaa agar nazar bhi phiraa le to gham nahin meri nazar ke saath tumhaari nazar to hai vo mujh se duur duur sahi be-khabar nahin maanaa guhar nahin magar aab-e-guhar to hai jab chaaheinge rihaai dilaa deinge vo kahin qaid un ki zulf hi mein hamaari sahar to hai jiinaa hi jab hai ham ko to hans ke jiyeinge ham daulat nahin hai haath mein lekin hunar to hai 'raahi' mujhe siyaahi-e-shab kyaa Daraaegi pahlu mein qalb ban ke naqib-e-sahar to hai"

"ai sitam-gar sitam ki baat nahin kam se kam aaj gham ki baat nahin subh-e-nau kaa hai zikr mahfil mein ab yahaan shaam-e-gham ki baat nahin saari duniyaa hai mehrbaan to kyaa un ke lutf-o-karam ki baat nahin tazkira hai vafaa ki manzil kaa raah ke pech-o-kham ki baat nahin munhasir hai amal to niyyat par sirf qaul-o-qasam ki baat nahin zikr shisha-garon kaa hai 'raahi' pattharon ke sanam ki baat nahin"

"kahaa hai kis ne jahaan mein khudaa nahin miltaa khulus shart hai DhunDo to kyaa nahin miltaa har ek jism ki takhliq ek jaisi hai har ek chehre se kyon dusraa nahin miltaa kuchh aise moD bhi aae vafaa ki raahon mein jahaan se aage khud apnaa pataa nahin miltaa har ik jafaa hai tumhaari har ik jafaa se alag tumhaare jaisaa koi baa-vafaa nahin miltaa main phir rahaa huun jabin mein sameT kar sajde magar kahin bhi tiraa naqsh-e-paa nahin miltaa vahi hai gaanv vahi main vahi hai pagDanDi bas ik kami hai tiraa naqsh-e-paa nahin miltaa vafaa kaa shauq mubaarak vafaa karo lekin rahe khayaal vafaa kaa sila nahin miltaa tumhaaraa aks hai mahfuz jis mein sadiyon se na jaane kyon vahi ik aaina nahin miltaa ham aa ke gaanv se pachhtaae shahr mein 'raahi' yahaan kisi kaa bhi asli pata nahin miltaa"

"tere baghair zindagi kyaa zindagi miyaan ek ek lamha hai mujhe ek ik sadi miyaan hairat se dekhtaa hai mujhe har koi miyaan jaise main apne shahr mein huun ajnabi miyaan har baat mein hai talkhi-o-afsurdagi miyaan hai mustaqil azaab miri zindagi miyaan kahne ko yuun to sab nazar aate hain aadmi mushkil se bhi milaa na koi aadmi miyaan jurat agar hai tujh mein to aa khul ke saamne parde mein dosti ke na kar dushmani miyaan main ne to us kaa saath diyaa hai tamaam umr kyon meraa saath chhoD gai zindagi miyaan 'raahi' ko jab khushi ki zarurat nahin rahi nikli hai DhunDhti hui us ko khushi miyaan"

"divaar-o-dar ke vaaste manzar na laaiye baahar ke rahne vaale ko andar na laaiye patthar se mere sar ke hain rishte hazaar-haa ab aap sar ke vaaste patthar na laaiye insaan lag rahaa hai ik aaseb ki tarah aaseb kyaa hai is ko zabaan par na laaiye phulon se kheliyegaa agar phuul se hain haath Dho Dho ke mere vaaste patthar na laaiye manzur hai qiyaam jo patthar ke shahr mein shishe kaa apne saath koi ghar na laaiye 'raahi' ye aasmaan hi achchhaa hai saaebaan ab mere ghar ke vaaste chhappar na laaiye"

"nahin makaan na sahi sar pe aasmaan to hai zamin pe hai dar-o-divaar saaebaan to hai hazaar mujh pe ghamon ke pahaaD TuuT paDein mujhe bachaane tiri yaad ki chaTaan to hai nahin khudaai mein koi bhi mehrbaan na sahi khudaai jis ki hai vo mujh pe mehrbaan to hai nahin hai mujh ko koi daavaa-e-zabaan-daani yahi bahut hai ki urdu miri zabaan to hai mujhi pe aaj sitam hain bajaa-e-lutf-o-karam khushi hai ye mujhe ik rabt darmiyaan to hai karein hazaar buraai vo ghair ki 'raahi' magar zamaane ko kyaa kiije bad-gumaan to hai"

"na raas aaya tasavvur mein qurbatein rakhnaa kisi ke naam se be-vajh nisbatein rakhnaa jahaan bhi aap pe ilzaam aane vaalaa ho miri qasam hai vahaan mujh pe tohmatein rakhnaa rivaayaton se baghaavat ke baad mushkil hai guzishta daur ki qaaem rivaayatein rakhnaa mujh aise khvaab mein jin ki nahin koi taabir tum aise khvaabon ki dil mein na hasratein rakhnaa vo be-naqaab huaa hai na hone vaalaa hai abas hai diid ki aankhon mein hasratein rakhnaa khulus-e-dil se milo har kisi se ai 'raahi' tumhaaraa kaam nahin hai riqaabatein rakhnaa"

"dil mein yaadon ke daagh jalte hain yaa bahaaron mein baagh jalte hain jagmagaataa hai aur vo chehra raat mein jab charaagh jalte hain jab kabhi chaandni chaTakti hai khaali khaali ayaagh jalte hain lab pe aataa hai jab bhi naam un kaa hasraton ke charaagh jalte hain dushmanon ki saliqa-mandi se doston ke dimaagh jalte hain maut ki raushni baDhaane ko zindagi ke charaagh jalte hain ek bujhtaa hai ik sulagtaa hai ziist ke yuun charaagh jalte hain haae kyaa shai hai rang-e-aatish-e-gul bulbulon ke dimaagh jalte hain shoala shoala ho dil agar 'raahi' aandhiyon mein charaagh jalte hain"

"gham ki aaghosh mein pali hai abhi uljhi uljhi si zindagi hai abhi jaam par jaam pi rahaa huun magar mere honTon ko tishnagi hai abhi zindagi mere haq mein tere baghair lamha lamha sadi sadi hai abhi raushni ban ke tum chale aao khaana-e-dil mein tirgi hai abhi kab se huun apni zindagi ke saath aur vo mujh se ajnabi hai abhi vaqt hai mujh ko dekhte jaao meri aankhon mein zindagi hai abhi"

"kuchh na puchho kyuun huaa kyaa kyaa huaa jo huaa haq mein mire achchhaa huaa vo zamaane mein bahut rusvaa huaa jo bhi un ke husn kaa shaidaa huaa mujrim-e-ishq-o-vafaa hain aur bhi kyon mire hi naam kaa charchaa huaa us ki nazron mein hai narmaahaT bahut vo agar patthar huaa to kyaa huaa be-iraada hi to uTThi thi nazar kyon isi kaa bazm mein charchaa huaa simTaa simTaa jis qadar mahfil mein thaa us qadar bikhraa huun jab tanhaa huaa naam vaalaa thaa bahut 'raahi' magar naam le kar aap kaa rusvaa huaa"

"aas shamein jalaati rahi raat bhar tirgi munh chiDaati rahi raat bhar yaad un ki dilaati rahi raat bhar raat mujh ko sataati rahi raat bhar un ki khushbu se aangan mahaktaa rahaa chaandni muskuraati rahi raat bhar aap ki raah mein raushni ke liye aarzu jagmagaati rahi raat bhar gul ke lab par hansi dekhne ke liye shabnam aansu bahaati rahi raat bhar ik sanobar tale ThanDi ThanDi havaa ik kahaani sunaati rahi raat bhar chashm-e-saaqi mein 'raahi' vo kyaa baat thi aankh se niind uDaati rahi raat bhar"

"maazi ko apne bhuul na jaaein to kyaa karein kab tak ham aasmaan ke taare ginaa karein yaadon ke qaafile ko liye saath kyaa karein manzil hi jab nahin hai to phir kyon chalaa karein tum ho hamaare saath to duniyaa hai saath saath jab tum nahin ho saath to duniyaa ko kyaa karein rah rah ke de rahaa hai dil aavaaz-e-baaz-gasht aadam ki tarah ham bhi na kyon ik khataa karein tanhaai duur ho ke rahegi isi tarah chup-chaap jab bhi vaqt mile ham milaa karein ailaan-e-haq karungaa zarur un ke saamne ab chaahe mere sar ko vo tan se judaa karein mumkin hai is duaa se hi baab-e-asar khule aao uThaa ke haath ko apne duaa karein titli ki tarah phuul se lipTaa rahungaa main chalne do laakh tez havaaein chalaa karein kyaa lutf-e-mai vo saamne 'raahi' agar nahin uThti hain aasmaan pe ghaTaaein uThaa karein"

"jis ko apnaa kah sakun koi jahaan aisaa to ho jab zamin aisi nahin hai aasmaan aisaa to ho sar chhupaane ko zamin par ik makaan aisaa to ho saaebaan kaa shak ho jis par saaebaan aisaa to ho mehrbaan koi nahin duniyaa mein ye sach hai magar vaqt par kaam aae koi mehrbaan aisaa to ho jis tarah aati hai har dam mere aangan mein sabaa teri aahaT kaa kabhi dil mein gumaan aisaa to ho shama vo apne hi haathon se bujhaa kar kah gae kam se kam uThtaa huaa dil se dhuaan aisaa to ho sab ko ho tark-e-taalluq par taalluq kaa gumaan kuchh na kuchh rabt-o-taalluq darmiyaan aisaa to ho"

"kyaa haal-e-dil sunaaun tujhe dekhne ke baad vo dil kahaan se laaun tujhe dekhne ke baad dekhe baghair the kai shikve gile magar kaise zabaan pe laaun tujhe dekhne ke baad mabhut ho gayaa huun tiri ik jhalak se main lab kis tarah hilaaun tujhe dekhne ke baad duniyaa kaa zikr kyaa hai ki khud apne aap ko mumkin hai bhuul jaaun tujhe dekhne ke baad sarshaar ho gayaa huun tiri ik nigaah se ab kyaa piyun pilaaun tujhe dekhne ke baad nazron mein ishtiyaaq-e-nazar hi nahin rahaa kis se nazar milaaun tujhe dekhne ke baad aasaan the pahle saare masaail mire liye ab kuchh samajh na paaun tujhe dekhne ke baad kis raaste se ho ke main aaya nahin hai yaad ab ghar ko kaise jaaun tujhe dekhne ke baad 'raahi' bhi mere saath thaa didaar mein sharik ab kaise saath laaun tujhe dekhne ke baad"

"zor yuun dard kaa kam hone lagaa aakhir-e-shab jis tarah TuTne lagtaa hai nasha aakhir-e-shab be-sabab hi to miri aankh nahin khul sakti kis ne bhule se mujhe yaad kiyaa aakhir-e-shab shaayad aa pahunche hain nazdik safiraan-e-sahar koi detaa hai dar-dil pe sadaa aakhir-e-shab jaan-nisaari mein patangon ne kami kyaa ki thi shama ne kis liye dam toD diyaa aakhir-e-shab aap ke paanv ki aahaT kaa gumaan hotaa hai ghar ke aangan mein jab aati hai sabaa aakhir-e-shab kis ke ashkon kaa khudaa jaane asar hai 'raahi' bhigi bhigi si jo rahti hai fazaa aakhir-e-shab"