Ghazal

jis kaa hotaa nahin vo log usi kaa samjhe

kyaa buraai hai bure ko ki na achchhaa samjhe

itnaa kaafir ho ki puchhe nahin ahvaal talak

aise kaafir ko bhalaa kaun masihaa samjhe

· · ·

mohabbatein jab hisaab maangeingi nafraton kaa javaaz hogaa

vo jis safar mein saubatein hon vo aabgina-navaaz hogaa

kuchh aisi mushkil si aa paDi hai ki chehra aaina ban gayaa hai

mujhe ye dhaDkaa hai dil mein rakkhaa ayaan vo muddat kaa raaz hogaa

· · ·

kabhi jo aap ko dekhun to dil mein phuul khilte hain

kahun main aap se kaise mujhe aap achchhe lagte hain

mire dil ki ye khvaahish hai banun main aap ki dulhan

ki dil mein aap rahte hain mire honTon pe sajte hain

· · ·

suntaa nahin hai dil to us bevafaa ki baatein

kal par uThaa ke rakkho us bevafaa ki baatein

dil hai udaas ab to is tazkire ko badlo

kyon ho musir ki sun lo us bevafaa ki baatein

· · ·

garche nisbat bhi us ko gham se hai

vo miri zindagi qasam se hai

us ko sajda bhi kar nahin sakti

dair se vo nahin haram se hai

· · ·

kuchh ziyaada na kam hui labrez

had-e-qaul-o-qasam hui labrez

teri yaadon ne dil ko taDpaayaa

dard se chashm-e-nam hui labrez

· · ·

shahr mein aa gae kyaa log bayaabaanon ke

karb mein ho gae gum qahqahe armaanon ke

tum ne dekhe nahin jazbon ke falak-bos shajar

shab ki taariki mein jalte hue daalaanon ke

· · ·

hairat se apnaa chehra vo dekhaa kiyaa gayaa

bikhraa huaa jo dil miraa yakjaa kiyaa gayaa

ik aks ko davaam dilaayaa gayaa hai aaj

koi to kaam aankh se achchhaa kiyaa gayaa

· · ·

kaho un se ki aa jaaein na mujh ko ab sataaein vo

karein vo pyaar ji bhar ke na ab lekin rulaaein vo

mohabbat ruuTh jaaegi na gar izhaar ho paayaa

kaho un se ki ab ke baar mat duuri baDhaaein vo

· · ·

haathon kaa lams mujh ko kabhi bhej bhi to de

khushbu saa hai khayaal tiraa zindagi to de

alfaaz gungunaaun tiri chaahaton ke main

de ishq kaa shuur mujhe shaairi to de

· · ·

calendar phir palaTtaa hai december phir badaltaa hai

'duaa' phir chaar-su mere nayaa manzar ubhartaa hai

ghaTaa jab chhuTne lagti hai to us ki oT se yak-dam

falak par sard mausam mein hasin suraj nikaltaa hai

· · ·

ai dost tu ne vaar ye bharpur kar diyaa

pahle qarib kar ke mujhe duur kar diyaa

rahti huun teri yaad mein madhosh raat din

tere surur-o-kaif ne makhmur kar diyaa

· · ·

nazar mein taar be-mehri kaa dukh hai

ajab sarshaar be-mehri kaa dukh hai

hamaare zakhm taaza phuul hain aur

hamin ko baar be-mehri kaa dukh hai

· · ·

dil ki tafhim kaa moaamla thaa

ham ko darpesh aisaa masala thaa

ham ne tadbir kuchh kiyaa huaa thaa

aur muqaddar ajiib silsila thaa

· · ·

vaahima kyon mujhe ye khaas huaa

koi mujh mein hai bad-havaas huaa

main use yaad hi nahin aati

bas ye sochaa to dil udaas huaa

· · ·

kuchh der us ki laash pe ronaa kiyaa thaa bas

ik phuul man ke baagh kaa murjhaa chukaa thaa bas

jo saari kaaenaat mein apnaa rafiq thaa

mere liye malul vo harf-e-duaa thaa bas

· · ·

sabz jazbon ki jal-tarang kathaa

aaj kar degi sab ko dang kathaa

teri aankhon mein rang bhar degi

khvaab-zaaron ki khvaab-rang kathaa

· · ·

diid ko teri main tarsi chaand ki is raat mein

baiThi to bas dekh baiThi chaand ki is raat mein

chaand kuchh dhire se bolaa to thaa mere kaan mein

chaand ki main baat sunti chaand ki is raat mein

· · ·

mire dil se tire dil tak safar hai

mohabbat ki kahaani mukhtasar hai

kahoge kyaa ise ai bakhiya-gar tum

ye ik aansu hai yaa taar-e-nazar hai

· · ·

teri nazron mein mo'atabar na hui

main moattar hui magar na hui

haal duniyaa pe khul gayaa meraa

ek bas aap ko khabar na hui

· · ·

mire dil se tire dil tak safar hai

mohabbat ki kahaani mukhtasar hai

kahoge kyaa use ai bakhiya-gar tum

ye ik aansu hai yaa taar-e-nazar hai

· · ·

guftugu jaise duaa hone lagi

har musibat phir havaa hone lagi

saans lenaa jab sazaa hone lagaa

main 'duaa' khud se judaa hone lagi

· · ·

ek din degi daghaa aisaa kabhi sochaa na thaa

zindagi kaa ruup ye ham ne kabhi dekhaa na thaa

main pakaD laai thi jugnu raushni ke vaaste

kaali raaton kaa tasalsul thaa tiraa chehra na thaa

· · ·

zaraa ye kaam mere mehrbaan kar

khamoshi ko kabhi apni zabaan kar

main apne aap se chhup si gai huun

kabhi aa kar mujhe mujh par ayaan kar

· · ·