Ghazal

"uDne ki koi achchhi sazaa dijiye hamein behtar ye hai ki aap giraa dijiye hamein jitni bhi tohmatein hain lagaa dijiye hamein kuchh to mohabbaton kaa sila dijiye hamein pahle samundaron mein Dubaa dijiye hamein phir saahilon se khuub sadaa dijiye hamein ham log siraton ke hain qaail so aap bhi ik baar aazmaa ke ganvaa dijiye hamein jaise ki bhuul jaate hain 'ahd-e-vafaa ko aap us hi adaa se aaj bhulaa dijiye hamein"

"adhuri ik kahaani chal rahi hai musalsal zindagaani chal rahi hai luTaa di jaan ham ne doston par rivaayat khaandaani chal rahi hai bharosa bhaaiyon par kar rahaa huun vasiyyat tak zabaani chal rahi hai kareinge yaar tauba baa'd mein ham abhi to naujavaani chal rahi hai hamaare khuun ki qimat na puchho isi se raajdhaani chal rahi hai"

"in garm aansuon ki ravaani mein saath de ai shaam un ki yaad-dahaani mein saath de banvaas kaaT leinge magar ek shart hai shabri hamaari raam kahaani mein saath de piiri mein bhi to khvaahishein ho sakti hain javaan vo dil hi kyaa jo sirf javaani mein saath de sahraa se aae qais ye farhaad koh se koi to ho jo ashk-fishaani mein saath de naadaaniyon se misra’-e-avval bigaD gayaa allaah meraa misra’-e-saani mein saath de"

"is ta'alluq ko nibhaao to koi she'r kahun tum agar saamne aao to koi she'r kahun Duub jaane pe hi gahraai pata chalti hai aankh se aankh milaao to koi she'r kahun main kisi monalisa kaa nahin qaail jaanaan apni tasvir dikhaao to koi she'r kahun aap ki chup se hain khaamosh fazaaein saari aap honTon ko hilaao to koi she'r kahun tum sitaaron ko gino aur main dekhun tum ko saath ik raat bitaao to koi she'r kahun hazrat-e-qais ko kal shahr mein dekhaa to kahaa dasht mein khaak uDaao to koi she'r kahun vasl ke daur mein kab she'r huaa karte hain tum mujhe chhoD ke jaao to koi she'r kahun"

"ajab main huun ajab hi dil hai jaanaan ye paagal tujh pe hi maail hai jaanaan jise sab kah rahe hain apnaa rahbar vahi hai haan vahi qaatil hai jaanaan yahaan haami nahin koi hamaaraa ye puuraa shahr hi buzdil hai jaanaan zamaane ke sitam hain be-tahaashaa tiraa gham saath mein shaamil hai jaanaan hamaari maut kaa baais banegaa labon ke paas jo ik til hai jaanaan nahin agle janam kaa bhi dilaasa musalmaan huun baDi mushkil hai jaanaan"

"vafaaon kaa jo daavaa ho rahaa hai bataao kyaa tamaashaa ho rahaa hai mujhe sachchi mohabbat kaa gumaan thaa yahaan par bas dikhaavaa ho rahaa hai hamin sikhlaa rahe hain gur sabhi ko hamin se phir chhalaavaa ho rahaa hai raqibon par inaayat kar rahe ho mire gham kaa mudaavaa ho rahaa hai vo suntaa hi nahin hai sher mere hunar apnaa ye zaaea ho rahaa hai bahut maasum ban kar puchhte hain tumhein 'hamza' bhalaa kyaa ho rahaa hai"

"girya-o-zaari kaa saamaan uThaa lete hain hijr mein 'mir' kaa divaan uThaa lete hain koi lailaa bhi nahin apni kahaani mein magar sar pe ham dasht-o-bayaabaan uThaa lete hain ham ko talvaar se raghbat to nahin hai saain haan magar ho ke pareshaan uThaa lete hain aise taajir ki jinhein suud gavaaraa ho faqat raah-e-ulfat mein vo nuqsaan uThaa lete hain main mukhaatib huun kisi aur munaafiq se miyaan aap kyon haath mein quraan uThaa lete hain be-jhijhak aap mohabbat ko jataayaa kiije ham hasinon ke to ehsaan uThaa lete hain"

"bad-qismati pe zor miraa chal nahin rahaa ye haadisa kisi bhi tarah Tal nahin rahaa aaseb ke vo saae musallat hain in dinon aankhon mein ek khvaab talak pal nahin rahaa jaan-e-bahaar ab ye takalluf bhi chhoD de jab main tiri nigaah mein avval nahin rahaa kyaa khuub mo'jiza hai ki sho'la-badan ke main pahlu mein aa gayaa huun magar jal nahin rahaa is masale kaa hal to faqat aap the huzur ab aap kah rahe hain koi hal nahin rahaa she'r-o-sukhan bhi band hai pichhle baras se aur is dil kaa kaarobaar bhi ab chal nahin rahaa 'hamza-bilaal’ sakht hai aisaa balaa kaa sakht sab kuchh ganvaa ke haath talak mal nahin rahaa"

"ham ko tiri taraf se ishaara nahin milaa aankhein milin magar vo nazaara nahin milaa milne ki aarzu to rahi umr bhar mujhe lekin mujhe vo shakhs dobaara nahin milaa ham ne safar tamaam samundar mein tai kiyaa afsos hai yahi ki kinaara nahin milaa saude jahaan hue ye usul-o-zamir ke hargiz vahaan nishaan hamaaraa nahin milaa gham ki tijaaraton mein munaafea rahaa bahut 'hamza' hamein kahin bhi khasaara nahin milaa"

"bujhti aankhon mein hasin khvaab kahaan aate hain ab sar-e-baam vo mahtaab kahaan aate hain bazm-e-aghyaar mein baiThaa huun tamaashaa ban kar dil dukhaane mire ahbaab kahaan aate hain haath rakh letaa huun dil par main taDap kar dekho mujh ko bhi hijr ke aadaab kahaan aate hain ham se divaane mayassar hi nahin duniyaa ko siip mein gauhar-e-naayaab kahaan aate hain is mohabbat ke safar mein hai aziyyat 'hamza' dasht ke biich mein taalaab kahaan aate hain"

"kabhi mere liye do pal nikaalo mire is masale kaa hal nikaalo hain sahraa-zaad divaane tumhaare miri jaan zulf ke baadal nikaalo mujhe Dar lag rahaa hai tirgi se tum apni aankh kaa kaajal nikaalo vo baahein ab kisi ki ho chuki hain amaan tum bag se kambal nikaalo jahaan milte the us se aap 'hamza' vahaan se qaafila paidal nikaalo"

"she'ron mein apnaa dard raqam kar nahin sake yaa'ni shumaar apne alam kar nahin sake meri tabaahiyon pe hain maatam-kunaan sabhi ik aap hain jo aankh bhi nam kar nahin sake ham se munaafiqon ne kahaa saath mein raho ham apni zaat par ye sitam kar nahin sake kahne ko she'r ham ne hazaaron kahe magar tum ko kisi khayaal mein zam kar nahin sake 'hamza-bilaal' aap se ummid hai bahut vo kijiye jo ahl-e-qalam kar nahin sake"

"ashk aankhon mein bahaane ke liye rakkhe hain qimti moti luTaane ke liye rakkhe hain TukDe TukDe tiri tasvir nahin ki hai faqat sun le ye khat bhi jalaane ke liye rakkhe hain ghair ke saath rifaaqat hai magar ham jaise bazm mein she'r sunaane ke liye rakkhe hain in piyaadon se mohabbat hi nahin hai tum ko ye to bas jaan ganvaane ke liye rakkhe hain mujh ko maa'lum hai ye honT mire gaalon par tu ne ehsaan jataane ke liye rakkhe hain kuchh munaafiq to khudaa tu ne hamaari saf mein sirf ehsaas dilaane ke liye rakkhe hain chand bose jo mire naam ke hote 'hamza' us ne mahfuz zamaane ke liye rakkhe hain"

"hamaari chhat pe bhi suraj kaa intizaam huaa ye aur baat ki ye kaam vaqt-e-shaam huaa uThe raqib to phir mujh se baiThne ko kahaa tumhaari bazm mein yuun meraa ehtiraam huaa safar mein tum se kinaara kiyaa tumhaare liye magar bichhaDne kaa afsos gaam gaam huaa ki jaise DaanT de koi yatim bachche ko hamaari hasrat-e-dil kaa yuun ikhtitaam huaa hamaare dil ko dikhaai gai nai duniyaa kuchh is tarah ye parinda bhi zer-e-daam huaa bichhaD ke tujh se hunar shaa'iri kaa siikh liyaa yuun ahl-e-dard ke jiine kaa intizaam huaa"

"ye samjhaayaa hai is dil ne khudaa hi par yaqin rakkho tumhaaraa jo bhi sarmaaya ho saahab vo tumhin rakkho hamaari baadshaahi ke sune honge kai qisse ki ham har chiiz de deinge magar kaasa vahin rakkho labon ko kar diyaa hai naam us ne in raqibon ke hamein ye kah diyaa aap lo meri jabin rakho khudaa jaane bahaana thaa dilaasa thaa ki vaada thaa mujhe ik baar phir zulmat ne samjhaayaa yaqin rakkho banaae yaar hain tum ne baDi taadaad mein 'hamza' miraa ik mashvara hai ab silaa kar aastin rakkho"

"yahaan maahaul kuchh aisaa huaa hai mohabbat lafz tak rusvaa huaa hai hukumat raushni ne chhoD di ab tabhi zulmat tiraa qabza huaa hai hamaari jiit pakki ho gai thi hamein shak hai kahin dhoka huaa hai baDhi hai yuun to mahngaai vatan mein lahu apnaa magar sastaa huaa hai tiraa marham tujhe hi ho mubaarak ki is se zakhm aur gahraa huaa hai tumhein maalum ho 'hamza' to bolo nizaam-e-shahr kyon bigDaa huaa hai"

"sab ke ghar mein ye charaaghaan nahin dekhaa jaataa juz tire koi bhi shaadaan nahin dekhaa jaataa kyaa kahein ye gham-e-dauraan nahin dekhaa jaataa hijr kaa chaand farozaan nahin dekhaa jaataa ham hain majnun ke parastaar miyaan ham se to suunaa suunaa ye bayaabaan nahin dekhaa jaataa ham vafaaon kaa taqaaza nahin karte us se ham se vo shakhs pashemaan nahin dekhaa jaataa main to saabir huun kabhi uf nahin kartaa lekin yaar hamraah-e-raqibaan nahin dekhaa jaataa dil mein raunaq to rahe tu na sahi aur sahi ab to khaali ye khumistaan nahin dekhaa jaataa aa tire haq mein du'aa kar duun ai dushman mere mujh se ab tu bhi pareshaan nahin dekhaa jaataa shahr vaale to ye kah kah ke taras khaate hain aisaa barbaad sukhan-daan nahin dekhaa jaataa itnaa taarik hai ye daur hamaaraa 'hamza' ab koi saahib-e-‘irfaan nahin dekhaa jaataa"

"hamein ab hijr us kaa khal rahaa hai kyaa kiyaa jaae jo vaa'da vasl kaa thaa Tal rahaa hai kyaa kiyaa jaae kabhi jis ki badaulat ham ko sab aadaab karte the bulandi kaa vo suraj Dhal rahaa hai kyaa kiyaa jaae tiri pyaari si surat ko basaate dil ke mandir mein magar tu aankh se ojhal rahaa hai kyaa kiyaa jaae main saari hasraton ko dafn to kar aayaa huun lekin tumhaaraa khvaab dil mein pal rahaa hai kyaa kiyaa jaae na raavan hai kahaani mein na siitaa zindagaani mein magar banvaas phir bhi chal rahaa hai kyaa kiyaa jaae"

"har ik taklif samjhi hai tumhaari phir is ke baad marzi hai tumhaari nahin saabit hue kaafir kabhi ham parastish is tarah ki hai tumhaari hamaare baad jaanaan sach bataao kisi ne kyaa khabar li hai tumhaari khazaana umr bhar khaali na hogaa abhi ik yaad bechi hai tumhaari miri aankhein na paDh paae kabhi tum amaan degrē hi farzi hai tumhaari"

"adhuri ik kahaani chal rahi hai musalsal zindagaani chal rahi hai luTaa di jaan ham ne doston par rivaayat khaandaani chal rahi hai kareinge yaar tauba baad mein ab abhi to naujavaani chal rahi hai bharosa bhaaiyon par kar rahaa huun vasiyyat tak zabaani chal rahi hai nae kirdaar is mein aa gae hain magar picture puraani chal rahi hai hamaare khuun ki qimat na puchho isi se raajdhaani chal rahi hai"