Ghazal

"aadhaa jism sulagtaa aadhaa jal-thal hai jaane kaisi dhuup hai kaisaa baadal hai khvaabon kaa ik shahr hai meri aankhon mein aur is shahr ke chaaron jaanib jangal hai mere saath nahin vo phir bhi jaane kyuun us ke bichhaD jaane kaa dhaDkaa pal pal hai lamha lamha dhanstaa jaataa hai manzar shaayad meri aankh mein koi daldal hai kaash use ho jaae ye maalum 'hasan' koi us ke pyaar mein kitnaa paagal hai"

"raat-din pur-shor saahil jaisaa manzar mujh mein thaa tum se pahle maujzan koi samundar mujh mein thaa aaj teri yaad se Takraa ke TukDe ho gayaa vo jo sadiyon se luDhaktaa ek patthar mujh mein thaa jite-ji sahn-e-mazaar-e-dost thaa meraa vajud ik shikasta saa piyaala aur kabutar mujh mein thaa main kahaan jaataa dikhaane apne andar kaa kamaal jo kabhi mujh par na khul paayaa vo jauhar mujh mein thaa DhunDhtaa phirtaa huun us ko raat din khud mein 'hasan' vo jo kal tak mujh se bhi ik shakhs behtar mujh mein thaa"

"kabhi jo aankhon ke aa gayaa aaftaab aage tire tasavvur mein ham ne kar li kitaab aage vo baad-e-muddat milaa to rone ki aarzu mein nikal ke aankhon se gir paDe chand khvaab aage dil-o-nazar mein hi apne kheme lagaa liye hain hamein khabar hai ki raasta hai kharaab aage nazar ke hairat-kade mein kab kaa khaDaa huaa huun ik aaine mein khilaa huaa hai gulaab aage guzarne vaalaa thaa rah-guzaar-e-hayaat se main vo ek lamha ki aa gae phir janaab aage 'hasan' jo maazi kaa safha ulTaa to aa gae hain khajur ke peD Tiile aur maahtaab aage"

"khvaab mein nuur barasne kaa samaan hotaa hai aankh khulti hai to kamre mein dhuaan hotaa hai dhuup aisi dar-o-divaar pe Thahri aa kar ghar pe aaseb ke saae kaa gumaan hotaa hai khvaab mein jaa ke use dekh to aauun lekin ab vo aankhon ke darichon mein kahaan hotaa hai din ko hoti hai jo logon ke guzarne ki jagah shaam ke baad vahaan meraa makaan hotaa hai khauf an-jaanaa koi pichhe paDaa hai aise jis jagah jaataa huun kam-bakht vahaan hotaa hai yuun mire aage ubhar aataa hai vo shakhs 'hasan' mere andar hi kahin jaise nihaan hotaa hai"

"jab us kaa naam labon par duaa ke saath utre to chaand aankh mein koi ghaTaa ke saath utre tumhaari yaad utarti hai is tarah dil mein ki jaise sahn mein baarish havaa ke saath utre kabutaron ki tarah uDte hain tire gham bhi ki dil ki chhat pe to pahli sadaa ke saath utre faraaz-e-koh se aataa hai jis tarah paani kabhi vo aankh se aisi adaa ke saath utre main niind vaadi mein jab bhi 'hasan' utarne lagaa hazaar rang ke sapne bhi aa ke saath utre"

"raat ye kaun mire khvaab mein aayaa huaa thaa subh mein vaadi-e-shaadaab mein aayaa huaa thaa ik parinde ki tarah uD gayaa kuchh der hui aks us shakhs kaa taalaab mein aayaa huaa thaa main bhi us ke liye baiThaa rahaa chhat par shab bhar vo bhi mere liye mahtaab mein aayaa huaa thaa sard khitte mein sulagtaa huaa jangal thaa badan aag se niklaa to barfaab mein aayaa huaa thaa ye to sad-shukr khayaalon ne tire khinch liyaa main to haalaat ke girdaab mein aayaa huaa thaa yaad hain dil ko mohabbat ke shab-o-roz 'hasan' gaanv jaise koi sailaab mein aayaa huaa thaa"

"ghar se meraa rishta bhi kitnaa rahaa umr bhar ik kone mein baiThaa rahaa apne honTon par zabaan ko pher kar aansuon ke zaaiqe chakhtaa rahaa vo bhi mujh ko dekh kar jiitaa thaa aur main bhi us ki aankh mein zinda rahaa nisbatein thiin ret se kuchh is qadar baadalon ke shahr mein pyaasaa rahaa shahr mein sailaab kaa thaa shor kal aur main tah-khaane mein soyaa rahaa khaa rahi thi aag jab kamra 'hasan' main bas ik tasvir se chimTaa rahaa"

"khvaab apne miri aankhon ke havaale kar ke tu kahaan hai mujhe nindon ke havaale kar ke meraa aangan to ba-juz tere mahaktaa hi nahin! baarhaa dekhaa hai phulon ke havaale kar ke ek gumnaam jazire mein utar jaaungaa apni kashti kabhi lahron ke havaale kar ke kaisaa suraj thaa ki phir lauT ke aayaa hi nahin chaand taare miri raaton ke havaale kar ke mujh ko maa'lum thaa ik roz chalaa jaaegaa! vo miri 'umr ko yaadon ke havaale kar ke ghar ki viraani badal Daali hai raunaq mein 'hasan' sahn kaa peD parindon ke havaale kar ke"

"khamosh rah kar pukaarti hai vo aankh kitni sharaarti hai hai chaandni saa mizaaj us kaa samundaron ko ubhaarti hai main baadalon mein ghiraa jazira vo mujh mein saavan guzaarti hai ki jaise main us ko chaahtaa huun kuchh aise khud ko sanvaarti hai khafaa ho mujh se to apne andar vo baarishon ko utaarti hai"

"koi aisaa hal nikaalein silsila yunhi rahe mar bhi jaaein to hamaaraa raabta yunhi rahe chalti jaae kashti yunhi baadbaan khole hue ye jazire ye dhuaan aab-o-havaa yunhi rahe khatm ho jaae dukhon kaa ye pahaaDi silsila aur qaaem do dilon kaa hausla yunhi rahe meri aankhon mein sadaa khilte rahein ashkon ke phuul aur tire maasum honTon par duaa yunhi rahe"

"udaas shaamon bujhe darichon mein lauT aayaa bichhaD ke us se main apni galiyon mein lauT aayaa chamakti saDkon pe koi meraa nahin thaa so main malul peDon ujaaD raston mein lauT aayaa khizaan ke aaghaaz mein ye achchhaa huaa ki main bhi khud apne jaise fasurda logon mein lauT aayaa hasin yaadon ke chaand ko alvidaaa kah kar main apne ghar ke andhere kamron mein lauT aayaa main khul ke royaa nahin thaa pichhle kai baras se 'hasan' vo sailaab phir se aankhon mein lauT aayaa"

"hasin kitnaa ziyaada ho gayaa hai vo jab se aur saada ho gayaa hai chalo ham bhi mohabbat kar hi leinge agar us kaa iraada ho gayaa hai bhulaa dungaa use agle janam tak miraa us se ye vaada ho gayaa hai ghaDi-bhar us ki aankhon mein utar kar samundar bhi kushaada ho gayaa hai bichhaDne kaa use bhi dukh hai shaayad ki ab to vo bhi aadhaa ho gayaa hai"

"sunahre khvaab aankhon mein bunaa karte the ham donon parindon ki tarah din bhar uDaa karte the ham donon ilaahi zindagi yunhi mohabbat mein guzar jaae namaaz-e-fajr paDh kar ye duaa karte the ham donon hamesha ThanDi ho jaati thi chaae baaton baaton mein vo baatein jo in aankhon se kiyaa karte the ham donon guzar jaataa thaa saaraa din ikaTThe sipiyaan chunte samundar ke kinaare par rahaa karte the ham donon havaa ke ek jhonke se laraz jaate darichon mein charaaghon ki tarah shab bhar jalaa karte the ham donon mohabbat mein kaThin raste bahut aasaan lagte the pahaaDon par suhulat se chaDhaa karte the ham donon 'hasan' rusvaai kaa khadsha kabhi dil mein nahin aayaa khayaalon aur khvaabon mein milaa karte the ham donon"

"ab to aankh se itnaa jaadu kar letaa huun jis ko chaahun us ko qaabu kar letaa huun mere haath mein jab se us kaa haath aayaa hai khaar ko phuul aur phuul ko khushbu kar letaa huun raat ki tanhaai mein jab bhi ghar se niklun us ki yaadon ko main jugnu kar letaa huun dil kaa dariyaa sahraa hone se pahle hi apni har ik khvaahish aahu kar letaa huun jab bhi dil ki samt 'hasan' baDhtaa hai koi us ke aage apne baazu kar letaa huun"

"na main us kaa na vo meraa huaa hai chalo jo bhi huaa achchhaa huaa hai giraa duun apne patte kis tarah main vo meri chhaanv mein baiThaa huaa hai chalo paDhte hain is patthar ko chal kar sunaa hai us pe sach likkhaa huaa hai ghanaa viraan aur khaamosh jangal mire atraaf mein phailaa huaa hai udhar us paar jaanaa chaahtaa huun magar dariyaa kaa pul TuuTaa huaa hai"