Ghazal

"hamaare khvaab sab taabir se baahar nikal aae vo apne-aap kal tasvir se baahar nikal aae ye ahl-e-hosh to ghar se kabhi baahar nahin nikle magar divaane har zanjir se baahar nikal aae koi aavaaz de kar dekh le muD kar na dekheinge mohabbat tere ik ik tiir se baahar nikal aae dar-o-divaar bhi ghar ke bahut maayus the ham se so ham bhi raat is jaagir se baahar nikal aae baDi mushkil zaminon mein gulaabi rang bharnaa thaa bahut jaldi bayaaz-e-'mir' se baahar nikal aae"

"dard aasaani se kab pahlu badal kar niklaa aankh kaa tinkaa bahut aankh masal kar niklaa tere mehmaan ke svaagat kaa koi phuul the ham jo bhi niklaa hamein pairon se kuchal kar niklaa shahr ki aankhein badalnaa to mire bas mein na thaa ye kiyaa main ne ki main bhes badal kar niklaa mere raste ke masaail the nokile itne meraa dushman bhi mire pairon se chal kar niklaa Dagmagaane na diye paanv ravaa-daari ne main sharaabi thaa magar roz sanbhal kar niklaa"

"amir-e-shahr se mil kar sazaaein milti hain is haspataal mein naqli davaaein milti hain ham ek paarTi mil kar chalo banaate hain ki teri meri bahut si khataaein milti hain puraani dilli mein dil kaa lagaanaa Thiik nahin na dhuup aur na taaza havaaein milti hain ab un kaa naam-o-nasab dusre bataate hain uruuj milte hi kyaa kyaa adaaein milti hain kisi gharib ki imdaad kar ke dekh kabhi zaraa se kaam ki kitni duaaein milti hain"

"shauq se aap ye angrezi davaa bhi lete ham faqiron se magar thoDi duaa bhi lete is liye hansne-hansaane ki banaa li aadat main jo rotaa to kai log mazaa bhi lete tere bikne ki khabar kaash ki pahle hoti itni daulat to miri jaan kamaa bhi lete ab koi biis baras baad ye ehsaas huaa chaahte ham to kahin haath chhuDaa bhi lete is qadar bojh thaa dil par hamein marnaa hi paDaa zahr thoDaa saa jo hotaa to pachaa bhi lete"

"khulaa ye raaz ki ye zindagi bhi hoti hai bichhaD ke tujh se hamein ab khushi bhi hoti hai vo phone kar ke miraa haal puchh letaa hai namak-haraamon ki category bhi hoti hai mizaaj puchhne vaale mazaa bhi lete hain kabhi jo dard mein thoDi kami bhi hoti hai yahi to kholti hai dushmani kaa darvaaza kharaab chiiz miyaan dosti bhi hoti hai tum apne qadmon ki raftaar par bahut khush ho ye rail-gaaDi kahin par khaDi bhi hoti hai"

"vo ek raat ki gardish mein itnaa haar gayaa libaas pahne rahaa aur badan utaar gayaa hasab-nasab bhi kiraae pe log laane lage hamaare haath se ab ye bhi kaarobaar gayaa use qarib se dekhaa to kuchh shifaa paai kai baras mein mire jism se bukhaar gayaa tumhaari jiit kaa matlab hai jang phir hogi hamaari haar kaa matlab hai intishaar gayaa tu ek saal mein ik saans bhi na ji paayaa main ek sajde mein sadiyaan kai guzaar gayaa"

"hamaare doston mein koi dushman ho bhi saktaa hai ye angrezi davaaein hain reaction ho bhi saktaa hai kisi maathe pe har dam ek hi label nahin rahtaa bhikaari chand hafton mein mahaajan ho bhi saktaa hai siyaasat naqli noTon ki tarah dhoke se chalti hai jise rahbar samajhte ho vo rahzan ho bhi saktaa hai mire bachchon kahaan tak baap ke kaandhon pe baiThoge kisi din fail us gaaDi kaa engine ho bhi saktaa hai kabhi chashma haTaa kar dekh aankhon se taassub kaa tire daaman se ujlaa meraa daaman ho bhi saktaa hai"

"ab use chhoD ke jaanaa bhi nahin chaahte ham aur ghar itnaa puraanaa bhi nahin chaahte ham sar bhi mahfuz isi mein hai hamaaraa lekin kyaa karein sar ko jhukaanaa bhi nahin chaahte ham apni ghairat ke liye faaqa-kashi bhi manzur teri sharton pe khazaana bhi nahin chaahte ham haath aur paanv kisi ke hon kisi kaa sar ho is tarah qad ko baDhaanaa bhi nahin chaahte ham aankhein jab di hain nazaare bhi ataa kar yaa-rab ek kamre mein zamaana bhi nahin chaahte ham"

"nazar na aae ham ahl-e-nazar ke hote hue azaab-e-khaanaa-ba-doshi hai ghar ke hote hue ye kaun mujh ko kinaare pe laa ke chhoD gayaa bhanvar se bach gayaa kaise bhanvar ke hote hue ye intiqaam hai yaa ehtijaaj hai kyaa hai ye log dhuup mein kyuun hain shajar ke hote hue tu is zamin pe do-gaz hamein jagah de de udhar na jaaeinge hargiz idhar ke hote hue ye bad-nasibi nahin hai to aur phir kyaa hai safar akele kiyaa ham-safar ke hote hue"

"zaraa si choT lagi thi ki chalnaa bhuul gae sharif log the ghar se nikalnaa bhuul gae tiri umiid pe shaayad na ab khare utrein ham itni baar bujhe hain ki jalnaa bhuul gae tumhein to ilm thaa basti ke log kaise hain tum is ke baad bhi kapDe badalnaa bhuul gae hamein to chaand sitaaron ko rusvaa karnaa thaa so jaan-bujh ke ik roz Dhalnaa bhuul gae 'hasib'-soz jo rassi ke pul pe chalte the paDaa vo vaqt ki saDkon pe chalnaa bhuul gae"

"khud ko itnaa jo havaa-daar samajh rakkhaa hai kyaa hamein ret ki divaar samajh rakkhaa hai ham ne kirdaar ko kapDon ki tarah pahnaa hai tum ne kapDon hi ko kirdaar samajh rakkhaa hai meri sanjida tabiat pe bhi shak hai sab ko baaz logon ne to bimaar samajh rakkhaa hai us ko khud-daari kaa kyaa paaTh paDhaayaa jaae bhiik ko jis ne purus-kaar samajh rakkhaa hai tu kisi din kahin be-maut na maaraa jaae tu ne yaaron ko madad-gaar samajh rakkhaa hai"

"yahaan mazbut se mazbut lohaa TuuT jaataa hai kai jhuTe ikaTThe hon to sachchaa TuuT jaataa hai na itnaa shor kar zaalim hamaare TuuT jaane par ki gardish mein falak se bhi sitaaraa TuuT jaataa hai tasalli dene vaale to tasalli dete rahte hain magar vo kyaa kare jis kaa bharosaa TuuT jaataa hai kisi se ishq karte ho to phir khaamosh rahiyegaa zaraa si Thes se varna ye shisha TuuT jaataa hai"