Ghazal

"rukne ke liye dast-e-sitam-gar bhi nahin thaa afsos kisi haath mein patthar bhi nahin thaa baahar jo nahin thaa to koi baat nahin thi ehsaas-e-nadaamt magar andar bhi nahin thaa jannat na mujhe di to main dozakh bhi na lungaa momin jo nahin thaa to main kaafir bhi nahin thaa lauTaa jo vatan ko to vo raste hi nahin the jo ghar thaa vahaan vo to miraa ghar bhi nahin thaa anjaam to zaahir thaa safein TuuT chuki thiin saalaar-e-muazzaz sar-e-lashkar bhi nahin thaa afsos qabile pe khulaa ghair ke haathon sardaar ke pahlu mein to khanjar bhi nahin thaa jo baat kahi thi vo bahut saaf kahi thi dil mein jo nahin thaa vo zabaan par bhi nahin thaa ye sach hai qasida na 'hilaal' ek bhi likkhaa ye sach hai ki main shaah kaa naukar bhi nahin thaa"

"kabhi to sehn-e-anaa se nikle kahin pe dasht-e-malaal aayaa hamaari vahshat pe kaisaa kaisaa 'uruj aayaa zavaal aayaa adaavatein thiin mohabbatein thiin na jaane kitni hi hasratein thiin magar phir aisaa huaa ki sab kuchh main khud hi dil se nikaal aayaa kabhi 'ibaadat kabhi 'inaayat kabhi du'aaein kabhi ataaein kahin pe dast-e-talab bane ham kahin pe ham tak savaal aayaa gulon ke chehre khile hue hain havaa mein khush-bu mahak rahi hai ye meri aankhon ne khvaab dekhaa ki sail-e-husn-o-jamaal aayaa tamaam ranj-o-mehan ko chhoDein tumhin ko dekhein tumhin ko sochein baDe zamaane ke baa'd dil mein ye bhulaa bisraa khayaal aayaa ghazal sunaaun to daad paaun magar main tum se bhi kyaa chhupaaun tumhi ne saare hunar sikhaae tumhi se rang-e-'hilaal' aayaa"

"thi ajab hi daastaan jab tamaam ho gai ik misaal ban gai ik payaam ho gai raat jab javaan hui jab diyon ke sar uThe tab havaa bhi aur kuchh tez-gaam ho gai ek bas nazar paDi us ke baad yuun huaa main ne jo ghazal likhi tere naam ho gai miT rahi thi tishnagi baDh rahi thi dosti phir anaa ki tegh kyuun be-niyaam ho gai falsafe ko chhoDiye kyaa kaheinge sochiye zindagi jo aap se ham-kalaam ho gai tanz to bahut hue par ajiib baat hai raah jo hamaari thi raah-e-aam ho gai kaisi umda qaum thi kyaa hi zinda qaum thi aakhir us ko kyaa huaa kyuun ghulaam ho gai jaam-e-ishq pi chuke zindagi bhi ji chuke ab 'hilaal' ghar chalo ab to shaam ho gai"

"aankhon mein vo khvaab nahin baste pahlaa saa vo haal nahin hotaa ab fasl-e-bahaar nahin aati aur ranj o malaal nahin hotaa is aql ki maari nagri mein kabhi paani aag nahin bantaa yahaan ishq bhi log nahin karte yahaan koi kamaal nahin hotaa ham aaj bahut hi pareshaan hain is vaqt ke pher se hairaan hain hamein le ke chalo kisi aisi taraf jahaan hijr o visaal nahin hotaa jitni hai nadaamat tum ko ab utne hi pashimaan ham bhi hain tum us kaa javaab hi kyuun socho ham se jo savaal nahin hotaa vo basti bhi ik basti thi ye basti bhi ik basti hai vahaan TuuT ke dil juD jaate the yahaan koi khayaal nahin hotaa is shahr ki riit ko aam karein jhuk jhuk ke sabhi ko salaam karein har kaam to ham kar lete hain yahi kaam 'hilaal' nahin hotaa"

"ham khud bhi hue naadim jab harf-e-duaa niklaa samjhe the jise patthar vo shakhs khudaa niklaa is dasht se ho kar bhi ik sail-e-anaa niklaa kuchh barg-e-shajar TuuTe kuchh zor-e-havaa niklaa uljhan kaa sulajh jaanaa ik khaam-khayaali thi jab ghaur kiyaa ham ne ik pech nayaa niklaa ai fitrat-e-sad maani 'ghaalib' ki ghazal hai tu jab husn tiraa parkhaa pahle se savaa niklaa ham paas bhi jaane se jis shakhs ke Darte the chhu kar jo use dekhaa miTTi kaa banaa niklaa phulon mein 'hilaal' aao ab raqs-e-khizaan dekhein kaanTon ke nagar mein to har baagh haraa niklaa"

"raasta der tak sochtaa rah gayaa jaane vaale kaa kyuun naqsh-e-paa rah gayaa aaj phir dab gaiin dard ki siskiyaan aaj phir gunjtaa qahqaha rah gayaa ab havaa se shajar kar rahaa hai gila ek gul shaakh par kyuun bachaa rah gayaa jhuuT kahne lagaa sach se bachne lagaa hausle miT gae tajraba rah gayaa hanste gaate hue lafz sab miT gae aansuon se likhaa haashiya rah gayaa vaqt ki dhaar mein bah gayaa sab magar naam divaar par ik likhaa rah gayaa us ke dam se kahe sher main ne 'hilaal' phuul is dhuup mein jo khilaa rah gayaa"

"vaqt ne rang bahut badle kyaa kuchh sailaab nahin aae miri aankhein kab viraan huiin kab tere khvaab nahin aae dil sahraa kaa vo tishna-lab har baar yahi sochaa jis ne mumkin hai ki aage dariyaa ho aur koi saraab nahin aae ham log kyuun itne pareshaan hain kis baat par aakhir naalaan hain kyaa saari bahaarein ruuTh gaiin kyaa ab ke gulaab nahin aae tum qurb ki raahat kyaa samjho tum hijr ki vahshat kyaa jaano tum ne vo raat nahin kaaTi tum par vo azaab nahin aae pahle bhi jahaan par bichhDe the vahi manzil thi is baar magar vo bhi be-laus nahin lauTaa ham bhi be-taab nahin aae ye bazm-e-'hilaal' hai khuub magar jab tak na sunaaein aap ghazal chehron ke gulaab nahin mahkein mahfil pe shabaab nahin aae"

"vahi huaa ki khud bhi jis kaa khauf thaa mujhe charaagh ko jalaa ke bas dhuaan milaa mujhe kabhi miTaa sakaa na koi dusraa mujhe shikast de gai magar miri anaa mujhe javaab is savaal kaa bhi de zaraa mujhe uDaa ke laai hai yahaan pe kyuun havaa mujhe hari-bhari si shaakh par khilaa huaa gulaab na jaane ek khaar kyuun chubhaa gayaa mujhe us ajnabi se vaasta zarur thaa koi vo jab kabhi milaa to bas miraa lagaa mujhe abhi na mujh ko Tokiye abhi to zindagi sunaa rahi hai giit roz ik nayaa mujhe ye muddaton ke baad jo kahi ghazal 'hilaal' vo kaun hai jo aaj yaad aa gayaa mujhe"

"mumkin hi nahin ki kinaaraa bhi karegaa aashiq hai to phir ishq dobaara bhi karegaa pardes mein aayaa huun to kuchh main bhi karungaa kuchh kaam mire takht kaa taaraa bhi karegaa andaaz yahi hai yahi atvaar hain us ke baiThegaa bahut duur ishaara bhi karegaa roegaa kabhi khuub kabhi hansegaa kyaa aur tire tiir kaa maaraa bhi karegaa jab vaqt paDaa thaa to jo kuchh ham ne kiyaa thaa samjhe the vahi yaar hamaaraa bhi karegaa sheron mein 'hilaal' aap ko kahnaa hai faqat sach sach baat magar koi gavaaraa bhi karegaa"

"ye visaal o hijr kaa masala to miri samajh mein na aa sakaa kabhi koi mujh ko na paa sakaa kabhi main kisi ko na paa sakaa kai bastiyon ko ulaT chukaa koi taab is ki na laa sakaa magar aandhiyon kaa ye silsila tiraa naqsh-e-paa na miTaa sakaa miri daastaan bhi ajiib hai vo qadam qadam mire saath thaa jise raaz-e-dil na bataa sakaa jise daagh-e-dil na dikhaa sakaa na hi bijliyaan na hi baarishein na hi dushmanon ki vo saazishein bhalaa kyaa sabab hai bataa zaraa jo tu aaj bhi nahin aa sakaa kabhi raushni ki talab rahi kabhi hauslon ki kami rahi main charaagh ko tire naam ke na jalaa sakaa na bujhaa sakaa vo jo aks rang-e-'hilaal' thi vo jo aap apni misaal thi mujhe aaj tak hai khalish yahi tujhe vo ghazal na sunaa sakaa"